VOV4.M’nông: Ta năp nău tât krit nji bah nuh srê COVID-19, kêng măng 31/5, UBND nkual ƀon têh Buôn Ma Thuột, n'gor Dak Lak pơk tay ăp ntŭk gŭ kâp chăm tâm rgop âk n'gâng kan ta trong Hồ Chí Minh gâl hăn rlău ntung 14 mpeh xã Hòa Phú gay njrăng, n'gang nuh srê COVID-19.

Tĭng nê, ntơm tâm rnôk 17h kêng măng 31/5, ăp mpôl kan lah Cảnh sát Giao thông, rnă njrăng, dak si… ta ntŭk gŭ kâp njrăng, ôp uănh nuĭh luh, lăp tâm n'gor Dak Lak gay nking nchăng bah nuh srê; ôp uănh nău tĭng ƀư jăp pah kan njrăng, n'gang nuh srê COVID-19 n'hanh weh duh săk, wăn bok put mbung, mbơh ngăch dăng n'hâm suan, puh nkhĭt kaman nuĭh n'hanh ndeh rklư hăn rlău ntŭk kâp chăm. Nkre tĭng groi  nđôi, uănh tĭng, geh trong nkra năn ngăch ăp nuĭh geh mĭn ntưp mô lah mĭn geh ntưp ji, ăp nuĭh sĭt tă bah ntŭk nuh srê Covid-19 gay an ƀư gŭ rgum êng, săm năn ngăch lah saơ geh nuĭh ntưp ji.

Măng 31/5, wa H’Yim Kđoh, Groi Kruanh UBND n’gor Dak Lak nkre Kruanh Rnâng kan rđau nau kan njrăng rdâng srê Covid-19 bah n’gor ký nau ntrŭnh ăp nau kan ndal mpeh nau njrăng rdâng rsê Covid-19 rnôk kơp dơn geh tay nŭih ntưp srê Covid-19 tal 4 tâm nkuăl Ea H’Leo (nŭih ji mrô 7186). Tĭng nau ntrŭnh, dĭng lĕ nkuăl ƀon têh Buôn Ma Thuột mô ân rgum rlau 10 nŭih đah ăp ngih tăch ndơ sa, dak ngêt, ntŭk pâl n’aih. Nsrŭng nau kan tăch rgâl ndơ sa, dak ngêt pĭt meng trong. Kŏ tĭng nau ntrŭnh đă aơ, nŭih ƀon lan sĭt tă bah n’gor geh srê Covid-19 geh nau khuch hô ri ân tât nkre ngih dak si êp ngăn gay ma mbơh mpeh dak si nchâp đă ndrel geh ntĭm mbơh nau nkah êng tâm ngih tâm 21 nar. Tâm nkuăl Ea H’Leo ƀư rjăp nau kan nchueng tdâng, tâm nkhah, ntơm 9h măng lơ 31/5/2021 ân tât rnôk geh nau mbơh mhe./.

Nuĭh rblang: Điểu Thân