VOV4.M’nông – Dak Lak an ntop jrô tâm rlong nchrăp lor tâm rơh tâm rlong tốt nghiệp THPT năm 2021, aơ lah nău đă bah groi kruanh N’gâng kan ntĭm nti Nguyễn Văn Phúc ta nar pah kan đah Ban ntĭm rđău rơh tâm rlong tốt nghiệp THPT năm 2021 n’gor Dak Lak mpeh trong nchrăp an rơh tâm rlong tốt nghiệp THPT ta ntŭk kêng măng 2/7. Mpôl pah lan lĕ uănh nđôi nkual in sao đề tâm rlong, nkual ƀư phách, chấm tâm rlong n’hanh ndoh ndơ ta du đêt ntŭk tâm rlong ta n’gor. Tâm nĕ, rgum uănh nđôi ta ăp ntŭk geh âk kon hŏk bah dih. Ta năp nu nău Covid-19 dôl geh jêr jŏt, groi kruanh N’gâng kan ntĭm nti Nguyễn Văn Phúc lah ndrel đah đăp mpăn rơh tâm rlong ƀư rjăp, di trong ƀư n’gor Dak Lak an uănh tât nău đăp mpăn njrăng n’gang srê an cán bộ, nai, nuĭh rhŏ kan rơh tâm rlong n’hanh kon hŏk râng tâm rlong. Rơh tâm rlong tốt nghiệp THPT năm aơ, Dak Lak geh rlău 19.800 kon hŏk râng tâm rlong. N’gor pă an 32 ntŭk tâm rlong đah rlău 840 ntŭk tâm rlong. Rlău 2,700 cán bộ, nai, nuĭh kan nău kan ntĭm nti, công an, nai dak si.... dơi rgŏ jă râng ăp nău kan uănh tâm rlong, groi nđôi, đăp mpăn rnă njrăng.

Nŭih rblang: Y Sưng Phê Ja