VOV4.M’nông - Đah mpŏng ŭch năp blău re n’hanh trong mkra rnôk geh rmok dak an kon se ta ăp thôn, ƀon nkual jru ngai, ăp gưl đoàn ta Dak Lak lĕ ƀư âk nău kan, pơk jrô ntĭm re dak an dơm an kon se. Tâm nĕ, trong ƀư mhe bah nkuăl đoàn Cư M’gar lah ndơ̆ “bể re hăn ăp ntŭk” tât ăp thôn, ƀon, kơl an âk kon se ta nkual jêr jŏt dơi nti re.

                   Ndăn kêng ôi lor mông hăn kan, yuh Đinh Thị Yên, ta thôn Hiệp hòa, xă Quảng Hiệp, nkuăl Cư Mgar, n’gor Dak Lak rdêng kon bu ur 7 năm tât jrô nti re mhe dơi pơk êp jay. Yuh Yên nkoch, aƀaơ dôl tâm nar rlu nti bah ăp kon, ur sai yuh hăn kan da dê jêng an njuăl kon an u che mât an. Bôl ntĭnh kon knŭng pâl wăr tâm jay yơn yuh hôm e dŭt rvê yor rnôk dăch aơ, báo chí na nao ndơ̆ đah ăp nău rmok dak n’hanh sôt rmanh geh. Nkual yuh rêh geh âk n’glău ka yor nuĭh ƀon lan kuih êng. Yor nê, rnôk tăng nău mbơh geh jrô ntĭm re dak an dơm an kon se dơi ƀư êp jay, yuh lĕ dăn n’hanh uănh mông nar gay rdêng kon hăn nti.

         “Mhe aơ ƀon lan nkoch mư gĭt ntŭk aơ geh ntŭk re ri gâp hăn dăn. An kon se hăn re ri ôi taơ klak kon se dơi dêr nău mô lap kơt khĭt rmok yor aƀaơ dŭt âk nău khĭt rmok, gâp klach jêng dăn an kon hăn nti. Gâp saơ ăp jrô re dak an dơm kơt aơ ri dŭt uĕh an ƀon lan, yor bôk năp lah mô hoach, tal 2 lah ăp băl dơi hăn nti dŭt âk ăp băl tâm xă, dơi tâm nđŭr”.

Nai ntĭm re dak an tĭng kon se

                   Jrô ntĭm re dak an dơm Câu lạc bộ Yor mpôl oh he (npeh tâm Hội đồng đội nkuăl Cư Mgar) tâm rgop đah Đoàn Thanh niên xă Quảng Hiệp ƀư ta xă. Râng jrô nti geh 90 oh kon se bah 7 tât 15 năm deh, dơi pă ƀư 6 rơh tâm pleh nti. Du rơh nti tâm 1 mông, mbra geh 2 nai mât uănh n’hanh ntĭm ta ntŭk re. Ndrel đah nĕ hôm geh bah 1 tât 2 đoàn viên druh ndăm ntop kơl mât uănh jrô nti, ntĭm ăp oh ntơm re, răk ao săk jan lor rnôk lăp ntŭk re.

          Tâm n’gul khay, ăp nuĭh nti mbra dơi trêng ntĭm ăp ntil re nơih; mbơh nău gĭt mpeh njrăng dêr rmanh rmok dak, trong mkra rnôk mâp nuĭh rmok dak. Nău ŭch lĕ rngôch nuĭh nti gĭt da dê jêh rnôk lôch khay nti.

         Nai Mai Văn Chuyền, chủ nhiệm câu lạc bộ Yỏ mpôl oh he, nai ntĭm re ta jrô nti an gĭt, gay pơk jrô nti, câu lach bộ lĕ rgŏ jă tơm prăk kon nuĭh rgop bơi 50 rkeh prăk gay rwăt ndoh ndơ, kuăl jă ăp nai thể dục ta ăp ngih sam ƀŭt tâm xă ŭch êng râng ntĭm. Bể re ê nkra hvi 5,1 mét, jong 15,6 mét n’hanh prêh 1,2 mét dơi ƀư ta jâng gung nsoih bah năp jay nuĭh ƀon lan, dŏng dak ntu khoan bơm bah ăp jay ƀon lan tâm nkual n’hanh tă 2 nar răk rao tay, rgâl dak du tơ̆. Jrô nti lĕ dơi geh nău kơl dŭt n’hâm bah nuĭh ƀon lan n’hanh n’gâng kan ta ntŭk. UBND xă Quảng Hiệp hôm ntop kơl chor nkŭm đah jal gay mô duh an jrô nti.

         “Ăp năm bah năp ri câu lạc bộ kơt Đoàn xă Ea Mdroh ri geh ƀư tâm bể re bah ngih sam ƀŭt THCS Ngô Mây. Yơn lah yor ndoh ndơ mô nâp nâl ta ngih sam ƀŭt jêng an rêng hvi ăp ntŭk, đê̆ đŏng hăn tât ăp thôn, ƀon dŭt jêr jŏt. Jêng geh bể re kơt aơ nău hăn tât ăp thôn, ƀon, ăp ntŭk geh hô ri pơng dơh lơn. N’hanh nău rƀŏng bah ăp bể re ta aơ mbra hăn tât ăp thôn, ƀon, nkoch trêng an ăp oh ăp nău blău, nău wât an đăp mpăn tâm dak, trong mkra rnôk mâp nuĭh rmanh rmok dak, năp an ăp oh blău re, gĭt rêh tâm dak”.  

         Tĭng yuh Võ Thị Mỹ Trinh, Groi bí thư Nkuăl Đoàn, Kruanh Hội đồng đội nkuăl Cư Mgar, nău ƀư ntĭm re an dơm aơ mpeh tâm nău kan Hoa phượng đỏ, lah du nău ƀư tâm druh ndăm kơl tâm khay mih năm aơ bah druh ndăm nkuăl Cư Mgar ƀŏt tât ăp oh kon se. Aơ lah du trong ƀư mhe bah câu lạc bộ yor ăp bể re ê nkra aơ jêh rnôk dŏng dơi pơk dak, klôn n’hanh rdêng hăn tât ăp ntŭk êng du trong dơh. Knơm nĕ dơi pơk hvi dơi geh an ăp oh ta ăp xă nkual jru, ngai đêt dơi gĭt n’hanh nti re. Ăp trong ƀư aơ dơh pơk hvi n’hanh jao an ăp xă.

Mô knŭng kon hŏk ma me bơ̆ dŭt ŭch đah ăp nar nti

         “Ta năp măt mpôl hên mbra rlong ƀư ta xă Quảng Hiệp, jêh nĕ mbra sĭt xă Ea Mdroh n’hanh xă Cư Mgar. Nău săk rnglăy njŭn tât ta ăp thôn ƀon ri na nê̆ pơng mbra uĕh lơn. N’hanh nĕ lah mbra pơk trong an nău kan aơ. Jêh rnôk câu lạc bộ yor mpôl oh he mbơh ƀư săk rnglăy ri mpôl hên mbra pơk hvi sĭt ăp xă nkual jru ngai, mbra geh trong pah kan đah nkuăl gay mbơh ƀư pơk hvi nău kan kon nuĭh tâm rgop ăp n’glău re ê nkra gay an sĭt ăp xă”.

         Tĭng kơp uănh bah N’gâng kan lao động-Thương binh n’hanh xã hội n’gor Dak Lak, bah bôk năm tât aƀaơ ta n’gor lĕ geh 31 nuĭh rmok dak ƀư 39 kon se khĭt, âk rlău bơi 2 tơ̆ nkôp đah rơh aơ năm e. Yor nê, tâm nău kan druh ndăm khay mih năm aơ, druh ndăm n’gor Dak Lak lĕ ndơ̆ nkô̆ nău mât njrăng n’hanh uănh rong kon se tâm bôk nău kan ƀư n’hanh rnoh an bah nău kan. Nô Trần Doãn Tới, groi bí thư n’gor Đoàn, Kruanh Hội đồng đội n’gor Dak Lak an gĭt:

         “Tâm khay tât ri Ban thường vụ N’gor đoàn mbra jao an Ntŭk tiărr nti gĭt blău bah N’gor Đoàn, mbra jă ăp nuĭh way kan geh nău blău mpeh re dak ta lam n’gor ƀư ăp jrô nti nău nơih bôk năp an rmôt tổng phụ trách đội ta lam n’gor gay jêh nĕ ăp đồng chí nĕ plơ̆ sĭt ta ntŭk ntĭm ăp oh. N’hanh tâm khay tât dăn đă môn nti bah dih nĕ lah năp gĭt nău blău re dak an ăp oh kon hŏk tâm ngih sam ƀŭt tiểu học n’hanh trung học cơ sở”.

         Đah nău nsrôih bah ăp rmôt kan nsum mpôl gay năp gĭt blău bôk năp mpeh re dak n’hanh gĭt njrăng n’gang rmok dak an kon se, mpŏng ăp oh geh tay ăp nău blău gay njrăng êng săk nơm. Kơt nĕ rgop n’hŭch ăp nău rmanh geh yô̆ nđach, gay ăp oh geh du yan rlu nti ngăn ngên uĕh lăng n’hanh đăp mpăn.

                   Nuĭh rblang: Y Sưng Phê Ja