VOV4.M’nông: Đah nău nsum ti bah âk mpôl kan, nsum mpôl n'hanh ăp nuĭh, tâm ăp nar rlău aơ, Ủy ban mặt trận tổ quốc Việt Nam n'gor Dak Lak hŏ rgum geh bơi 200 tấn bum biăp ăp ntil, "kơl an" nkual ƀon têh Hồ Chí Minh gay ntop nuĭh ƀon lan nkual nklang tơm nuh srê.

Đah nău buăt nthoi ma trang mạng xã hội Facebook, mô dơn nuĭh ƀon lan ta Dak Lak, ma ăp nuĭh tơm mir tăm biăp ta Lâm Đồng kơl đŏng, njuăl bum biăp sĭt gay kơl kônh wa nkual geh mpă wêl tă bah nuh srê Covid-19. Wa H Kim Hoa Byă, Kruanh ban Dân vận Tỉnh ủy, Kruanh Ủy ban mặt trận tổ quốc Việt Nam n'gor Dak Lak an gĭt, 1 pơh aơ, mặt trận ăp gưl tâm n'gor hŏ rgum geh bơi 200 tấn bum biăp.

Ăp tơm ndơ dja dơi rgum sĭt du ntŭk gay tâm pă ntil, ntlơi jăng ăp bum biăp geh ôm ŭr, khuch djơh lor rnôk nklâm njuăt tât nkual ƀon têh Hồ Chí Minh. Ăp bôk ndeh rdeng bêng bum biăp n'hanh ndơ dŏng sa khlay ndjôt nău rŏng, nuih n'hâm uĕh lŏng ndrel nău rgŏ jă bah ƀon lan dak Dak Lak nsum ti lam dak ntrôl rŭch nuh srê./.

Nuĭh rblang: Điểu Thân