VOV4.M’nông – Nar 16/6, nău kan dak si n’gor Dak Lak ntơm ƀư chuh vaccine njrăng Covid-19 rơh 2 an bơi 30.000 nuĭh lah ăp nuĭh kơl bôk năp ta lam n’gor. Rơh aơ, Dak Lak wơt dơn 27.210 dĭng vaccine AstraZeneca. Dĭng lĕ nuĭh nchrăp chuh tâm rơh 2 lah 29.900 nuĭh.

Dak Lak: Bơi 30.000 nuĭh mbra chuh vaccine njrăng Covid-19 rơh 2

Tâm nĕ, nuĭh chuh nglai 1 lah 21.787 nuĭh, geh rmôt ntŭk bôk năp njrăng n’gang srê mô hŏ chuh rơh 1 kơt nuĭh kan dak si, nuĭh râng rchăng n’gang srê, tahen, công an râng njrăng n’gang srê, nuĭh pă ndoh ndơ trong mpăr, nchoăn rdêng, pâl nđaih; nuĭh pă ndơ dŏng điện, dak, nai (mẫu giáo, mầm non, tiểu học); nuĭh pah kan ta ăp ntŭk ntĭm nti; nuĭh pah kan ta ăp ngih pah kan, ntŭk kan hành chính ƀa ƀơ mâp đah âk nuĭh (ăp N’gâng kan Ban ngành ta nkual ƀon têh Buôn Ma Thuột). Nuĭh chuh nkah tay rơh 2 geh 8.113 nuĭh kan dak si lĕ chuh rơh 2 ƀư chuh vaccine njrăng Covid-19, mô chuh an nuĭh geh ji ơm n’hanh rlău 65 năm deh.

Nŭih rblang: Y Sưng Phê Ja