VOV4.M’nông:  N’gor Dak Lak aƀaơ geh rlău 209 rbăn ha cà phê, ndơ geh ăp năm rlău 500 rbăn tấn, lah ndơ pĕ lêh khlay bah hang rhiăng rbăn nuĭh ƀon lan. Gay njrăng n’gang nău ntŭng rmoănh, đăp mpăn drăp ndơ bah nuĭh ƀon lan tăm cà phê, ăp ngih pah kan dơi kan n’hanh ƀon lan mât uănh êng ta n’gor dôl nsrôih ƀư ăp trong mkra nău kan.

N’gor Dak Lak aƀaơ geh rlău 209 rbăn ha cà phê, ndơ geh ăp năm geh rlău 500 rbăn tấn.

Tâm 3 ôi du pơh jêh mông sông piăng măng, wa Trương Văn Đệ, thôn 3, xă Ea Kpam, nkuăl Cư M’gar lŏ nchrăp kho ao răm, ntô jôt, môp, ŭnh pil... tâm rgop đah ăp nuĭh tâm rmôt mât uănh êng hăn uănh nđôi mât njrăng mir cà phê. Wa Đệ nkoch, mir cà phê bah rnăk wâl ta dŭt thôn 3, ngai nkual ƀon lan gŭ jêng dơh geh ntŭng. Yor nê, bah bôk khay 10, rnôk play cà phê ntơm kranh, mpôl mât uănh thôn lĕ hăn uănh nđôi, kâp mât.

“Năm e jay gâp geh mpôl m’hĭk pĕ ntŭng roh nklăp 40 tơm cà phê, dĭng lĕ rlău 20 bao play. Klach roh ntŭng ir, rnăk wâl an manh nuĭh pĕ ơm, yơn yor play mô hŏ dŭm ƀư săk geh rlăy jŭr âk. Nuĭh m’hĭk pĕ ntŭng hôm klih pă âk n’ging, đê̆ đŏng sŏk pêh koh lĕ ma n’ging play an dơh, ƀư khuch tât năm bah kơi. Năm aơ dơi oh nô rmôt mât uănh êng thôn ntop kơl kâp njrăng ri mô geh roh ntŭng tay, jay gâp an dŭm lĕ mư pĕ”.

Lam xă Ea Kpam geh rlău 1.200 ha cà phê, jong tât êp n’har nkual ƀon têh Buôn Ma Thuột n’hanh nkual têh Buôn Hồ. Thiếu tá Lưu Quang Chiến-Kruanh Công an xă Ea Kpam, nkuăl Cư M’gar an gĭt, ta ăp rnoh neh cà phê kâng n’har, ăp nuĭh m’hĭk way pĕ ntŭng, ƀư roh rnă njrăng đăp mpăn, khuch drăp ndơ an nuĭh ƀon lan. Năm aơ, công an xă tâm rgop đah ăp mpôl, nău kan, nsum mpôl ndâk njêng 8 rmôt mât uănh êng ta lĕ rngôch ăp thôn, ƀon, ƀư nău kan uănh nđôi jêng cà phê bah nuĭh ƀon lan lĕ dơi đăp mpăn.

“Công an xă lĕ an ăp trong nchrăp mbơh ƀư tât tĭng rmôt mât uănh n’hanh ăp rmôt hăn leo lor gay ƀư uănh nđôi tâm măng ta ăp nkual mir mô geh nuĭh way geh nu nău ntŭng rmoănh cà phê gay nking n’gang. Nkre, rmôt kan nchih mbơh nău, rup ndah ta ăp trang zalo, facebook bah xă, nkuăl mpeh trong ƀư, nău lơh bah ăp rmôt ntŭng gay kônh wa njrăng. Kơp uănh rmôt nuĭh krŭng sĭt, ƀa ƀơ ntŭng rmoănh drăp ndơ gay ntĭm nti, ntêt nkri, bah nĕ ăp nuĭh ntlơi nău ƀư tih dôih”.

N’gor Dak Lak aƀaơ geh rlău 209 rbăn ha cà phê, ndơ geh ăp năm geh rlău 500 rbăn tấn.

N’gor Dak Lak geh rlău 209 rbăn ha cà phê, ndơ geh rlău 500 tấn, jêng ăp tơ̆ tâm yan pĕ lêh, ŭch dŭt âk nuĭh kan gay mât njrăng. Tĭng thượng tá Nguyễn Văn Quý-Groi Kruanh jrô kan Cảnh sát Hình sự Công an n’gor Dak Lak, ndrel đah ăp rmôt mât uănh êng ta ntŭk, công an n’gor mbơh ƀư ăp trong mkra way kan, gay joi jŭt jăng ăp rmôt mpôl ntŭng ndơ lŏ mir, nkra rgâl nău ƀư pĕ lêh, đăp mpăn rnă njrăng ta ntŭk.

“Jrô Cảnh sát Hình sự Công an n’gor tâm pă nuĭh hăn uănh nđôi ăp trong ntŭk geh nu nău ntŭng ndơ lŏ mir geh âk gay tâm rgop đah công an ăp nkuăl, nkual têh, nkual ƀon têh ƀư hăn uănh nđôi, jŭt jăng, nhŭp kân ăp nuĭh ƀư ntŭng rmoănh ndơ lŏ mir bôk yan pĕ lêh. Ƀư nkoch trêng n’hao nău wât mât njrăng drăp ndơ bah nuĭh ƀon lan; mĭn mât uănh uĕh rnoh nuĭh ntôn geh tih dôih; nkah ntĭnh ăp ntŭk tăch rwăt ndơ lŏ mir mô rwăt ndơ mô gĭt tu tơm kloh na nê̆...”./.

          Nuĭh rblang: Y Sưng Phê Ja