VOV4.M’nông: Gay kơl an nau kan ân ueh ân rơh săch kan ntơh măt Quốc hội gưl XV ndrel HĐND ăp gưl năm kan 2021-2026, Công ty Điện lực (PC) Dak Lak hŏ ndrel ma dôl ntrŭnh ăp nau kan pă điện ân đăp mpăn, mro tât ăp mrôt yâm rnôk geh săch kan. Tĭng wa Trần Tấn Phụng-Groi Giám đốc Công ty Điện lực Dak Lak, jêh bah nar săch kan Công ty hŏ rđau ăp rmôt ƀư nau kan, uănh njrăng nau kan mêt uănh ƀư ueh trong điện tâm ăp ntŭk bu săch kan gay ma mât đăp mpăn trong leo dŏng ndrel trong điện đăp mpăn, geh rnơm nâp.

Công ty điện lực Ea súp mêt uănh trong điện gay đăp mpăn ân nar săch kan

Công ty kŏ n’hao nau pă dŏng điện khlay, đah 100% nŭih kơl leo dŏng trong điện, nchrăp âk máy mpoh ang njrăng lor gay ma rklaih ân ueh lah geh nau tât.

 ‘ Phung hên nchrăp du máy mpoh ang điện dơi ntrơn leo đah nau dăng 250 KVA gay lah geh nau tât khuch ƀư roh điện tâm ăp ntŭk săch kan tâm nkuăl ƀon têh Buôn Ma Thuột ri mra hăn pă leo mpoh ang nkre, êng êng, tâm 15 nkuăl, nkuăl têh kŏ nchrăp ân ăp ntil máy dăng 5-10KVA kŏ nchrăp dŏng gay ma rklaih ngăch ndrel ma mât nau pă mpoh ang điện mô geh kol”.

Rơh rƀŭn săch kan Quốc hội gưl XV ndrel ntơh măt HDND ăp gưl năm kan 2021-2026 ta Dak Lak geh 1,2 rkeh nŭih săch ta 1.849 rmôt săch, tâm nê geh 8 ntŭk tâm ăp xã nkuăl n’har bri mra ƀư săch kan ơm tâm lơ 22/5, hôm e lah 1.841 rmôt ƀư nklăch phiếu tâm lơ 23/5./.

rblang: H’Thi