VOV4.M’nông: Nar ôi taơ, 23/5, cử tri lam dak hăn râng nau kan chính trị khlay, săch kan ntơh măt Quốc hội gưl XV ndrel ntơh măt HĐND ăp gưl, năm kan 2021-2026. Ndrel ma lam dak, ntrong kan chính trị n’gor Dak Lak nsôih ƀư ăp nau kan dăch dŭt, mra ân nau săch kan geh đăp mpăn, tâm di luật, ƀon lan ƀư tơm ndrel ngăn lah nar rgum bah ƀon lan.

            Lah ngoai tâm ăp nkuăl tơm bah Nkuăl ƀon têh Buôn Ma Thuột, Phường Thành Công geh 13 ntŭk nklăch phiếu đah 5000 cử tri. Ăp nau geh mpeh ndoh ndơ, nŭih râng, nau nchih lir moh săk cử tri ndrel rnoh nŭih ân geh săch hŏ geh ăp rmôt pă ân tâm di, khoa học, mra ân nar săch kan lam ƀon lan. Gay đăp mpăn rna ửnăng, Rnâng kan săch kan Phường Thành Công kŏ pă ân rmôt, n’hao nau mêt uănh gay ma năn saơ, rklaih nau kan lah geh ntoh luh. Wa Phan Hữu Trí, Bí thư Đảng uỷ, Kruanh Hội đồng nhân dân, Kruanh rnâng kan rđau nau săch kan Phường Thành Công, nkuăl ƀon têh Buôn Ma Thuột, n’gor Dak Lak, ngơi:

             ‘Phung hên rđau Uỷ ban săch kan ân geh kơp uănh ăp nau kan geh tât săch kan. Tal 2, đăp mpăn ân ueh rnoh moh săk cử tri. Jêh nê đŏng lah mât đăp mpăn ân ăp nŭih geh săch, jêh rnôk geh moh săk ăp nŭih ân geh săch geh lir ri phung hên pă mrôt kan măng nar geh rmôt công an, mrôt tổ dân phố, rmôt kan mêt uănh bah phường gay ma phung hên jao nau kan ân ăp nŭih ân geh nkah njrăng ntŭk nklăch phiếu. Tât mông aơ ăp rnoh moh săk geh phung hên mât ân đăp mpăn ueh hôm”.

         Rnoh moh săk ntoh măt Quốc hội

  Tâm gưl nkuăl ƀon têh, Rnâng kan rđau nau săch kan, Uỷ ban săch kan ndrel Uỷ ban MTTQ nkuăl ƀon têh Buôn Ma Thuột hŏ ndâk rmôt kan, ƀư nau mê5t uănh nau kan săch kan tâm ăp xã, phường, đăp mpăn ăp nkô̆, nau kan ƀư tĭng di nau kan ndrel di luật. Wa Nguyễn Khắc Long, Groi Kruanh Hội đồng săch kan nkuăl ƀon têh mbơh, tât rnôk aơ, âk ngăn cử tri hŏ ndơn thẻ cử tri ndrel nau kan mpeh rnoh nŭih mpeh nau ân săch kan bah Ntoh măt Quốc hội gưl 15 ndrel ntơh măt HĐND ăp gưl năm kan 2021-2026, rnoh moh săk ăp nŭih geh njoăl tât ăp rnăk, gay mĭn ntrŭnh nau săch ăp nŭih ân tâm di. Đah cử tri lah sinh viên rnôk sĭt nkuăl mra geh ntop moh săk ân năn đăp mpăn nau dơi bah nơm:

             ‘Rnoh moh săk cử tri rnôk aơ phung hên lŏ kơp ndrel ma nchih rnoh moh săk cử tri ân tât lôch lơ 21/5. Yor rnôk aơ srê Covid-19 ri ma du đê̆ ngih săm ƀŭt Đại học, Cao đẳng ân kon se nti trựuc tuyến ri ma kon se mra sĭt ngih, sinh viên ăp ntŭk êng tât ta aơ ân geh đăng ký mhe, mô lah sinh viên Đại học Tây Nguyên mra sĭt ntŭk gŭ, mô gŭ ta aơ ri nơm ân geh kơp tay moh săk cử tri gay phung hên năn geh ntop ân tâm di”.

          Ƀon lan uănh moh săk nŭih geh săch

  Tĭng wa Y Biêr Niê, Groi Bí thư n’gor uỷ, Kruanh HĐND n’gor, Kruanh mrôt kan ntoh măt Quốc hội n’gor, Kruanh Uỷ ban săch kan bah n’gor Dak Lak, lam n’gor geh 1.794 rmôt săch kan ndrel 1.802 ntŭk nklăch phiếu. Ăp nau nchrăp ân nar săch kan tâm Dak Lak hŏ geh jêh, tŏng dơi nau ŭch bah Hội đồng săch kan neh dak nchrăp luh. Ngăn lah, bah năp nau tât bah srê ji ndrle nau tât mât đăp mpăn tâm nkuăl. Tiểu ban rnă njrăng, đăp mpăn ndrel dak si hŏ ntrŭnh nau kan mât đăp mpăn chính trị, đăp mpăn nau rêh jêng tâm lam n’gor tâm rnôk ƀư nau săch kan. Rmôt kan công an ntrŭnh âk nau kan tâm rơh rdâng lơh, rgot joi phung tih dôih, rgum uănh, rklaih ăp nau tih dôih hình sự geh nŭih ƀon lan uănh njrăng. N’gâng kan dak si mra ƀư ăp nau kan ân nar săch kan lah geh srê Covid-19 tât…wa Y Biêr Niê lah rjăp:

             ‘Mra dơi lah rnôk aơ nau nchrăp ân nar săch kan tâm Dak Lak geh nau kan kŏ kơt lah ăp nhoat ƀư nau kan hŏ đăp mpăn tĭng tâm di nau nchrăp luh ndrel tĭng nau nchrăp rnôk nau kan rnôk aơ kơp n’ăp ma nau mât đăp mpăn nau kan dak si geh uănh nâp. Nau ŭch ngăn ntơm rnôk aơ tât nar săch kan mra geh nau dơi ueh, mhâm ƀư ân nơm geh du nar săch kan tâm Dak Lak geh nau dơi ueh, rgop nau ân geh nau dơi nsum bah lam dak”.

            Nar săch kan êp tât. Nar aơ, lơ 22/5, 7 đồn Biên phòng ndrel Tiểu đoàn ntĭm nti cơ động, tâm N’gâng kan rđau tahen Biên phòng Dak Lak hŏ hăn săch kan ơm ân rơh săch kan Quốc hpội gưl XV ndrel ntơh măt HĐND ăp gưl năm kan 2021-2026.

            Đah nau nsôih lăp kan bah lam ntrong kan chính trị ntơm n’gor ân tât tâm dâng ndrel nau ŭch, nau nsôih bah cử tri, rơh săch kan ntơh măt Quốc hội gưl XV ndrel ntoh măt HĐND ăp gưl năm kan 2021-2026 bah n’gor Dak Lak dôl rƀŏng tât nau dơi, đăp mpăn rnă njrăng, săk tam, ngăn lah nar rgum bah ƀon lan./.

                                                Nŭih rblang: H’Thi