VOV4.M’nông: Rơh tât bah srê Covid-19 aơ, Dak Lak lah ntŭk tơm geh jêng nau njrăng uănh tâm nkuăl Tây Nguyên đah du đê̆ nŭih ntưp tă bah nkuăl êng sĭt. Ndrel ma nau tât jêr tâm nkuăl ƀon têh Hồ Chí Minh mô êng ta Dak Lak ma ăp nkuăl êp nê, tâm nê geh n’gor Gia Lai kŏ dôl ma nsôih tâm nau njrăng rdâng srê.

            Nkuăl Chư Pưh, n’gor Gia Lai lah nkuăl tâm êp đah ntŭk gŭ bah nŭih ji mrô 7186 bah n’gor Dak Lak. Ndal jêh nê, n’gor Gia Lai ndâk rmôt njrăng rdâng trong hăn tâm Quốc lộ 14, ntŭk ntung 110 tâm dăch ma n’gor Dak Lak. Rmôt kan geh: Cảnh sát gung trong, thanh tra gung trong, dak si…hŏ ƀư nau kan ân nsrŭng ndeh, veh duh n’ik săm, mbơh nau dak si đah nŭih hăn rlet. Tĭng nô Dương Quốc Hiệu, nŭih ƀĭt ndeh tâm nkuăl têh Đăk Đoan, nkuăl Đăk Đoa, mhe tă bah nkuăl ƀon têh Hồ Chí Minh hăn rlet Gia Lai, nau kan kơt tĭng nau mbơh nau dak si kŏ kơt lah ăp nau kan njrăng rdâng srê tă bah rmôt kan ƀư nô ndrel âk nŭih ƀĭt ndeh êng êng đăp mpăn lơn:

             ‘Jur tât ta aơ geh ăp nô mpeh rmôt kan nai dak si mêt uănh gay ma sĭt nkuăl nơm đăp mpăn ri săk gâp saơ oh nô ta aơ ƀư ueh ngăn. Gâp hăn rlet trong ri saơ nau kan njrăng rdâng srê bah ăp nô ƀĭt ndeh tâm trong aơ ueh ngăn. Nau kan ngêt sa ri ăp nô ƀĭt ndeh phung hên hăn tât ăp nkuăl, đăp mpăn gŭ ta klơ ndeh gay ma sĭt ƀon lan ri hôm geh mât nau đăp mpăn ân ur, kon ndrel rnăk vâl nơm đŏng”.

            Nô Ksor Mướt, cán bộ nai dak si ƀư naui kan tâm ntŭk nkân njrăng 110-Quốc lộ 14 rlet n’gor Gia Lai mbơh, êng nau kan nchâp đă put bok put mbung, veh duh n’ik săk jăn ndrel ƀư nau mpuh nkhĭt kman, ăp nŭih ân geh mbơh nau dak si du trong rjăp ngăn, tŏng ăp. Ngăn lah ntŭk ntơm hăn, ntŭk tât, n’hấmoan nơm ndrel ăp nau ji ơm geh tâm săk jăn. Bol ma geh roh đê̆ mông, yơn lah ăp nŭih kŏ kơt tĭng nau ntrŭnh da dê, ntĭm mbơh bah rmôt kan:

             ‘Lah ji kop dẹuh mô lah geh nau mpơl ntôn ntưp ri ân geh nkhah, hôm lah veh săk jăn lah mô geh nau ri a ri đă nŭih ƀon lan mbơh nau dak si, jêh ri ân bu hăn. Ntă xã, ntă thôn ri sĭt mbơh dak si tâm nê, hôm ăp nŭih hăn ngai sĭt mô lah tă bah nkuăl ƀon têh Hồ Chí Minh sĭt ri ân geh mbơh nau nai dak si”.

            Tât rnôk aơ, ăp nŭih geh tât nŭih ntưp ji mrô 7186 tâm Dak Lak kŏ geh nau uănh năl mham mô geh nau ntưp rơh bôk năp đah SARS-Cov2, yơn lah ân geh lŏ nkhah, uănh. Hôm đah ăp n’gor tâm nkuăl Tây Nguyên, ngăn lah rnôk hăn tâm trong Quốc lộ 14 hăn trong Hồ Chí Minh hŏ nsrŭng nau nchuăn rdeng năch. Du đê̆ nŭih mô kơt tĭng nau đă bah n’gâng kan ri hŏ geh mhal ân rjăp. N’gâng kan ndrel rmôt kan bah nkuăl tâm ntŭk dôl ma tâm rgop ân rjăp ngăn gay ma ntủ\nh ân tâm ban, nsôih rjăp, gay nau kan njrăng rdâng srê Covid-19 geh nau dơi săk tam ngăn ngên./.

                        Nŭih rblang: H’Thi