VOV4.M’nông: Tât rnôk aơ, rlau 140 nŭih, tâm 47 rnăk tâm hẻm 189/1 Mai Hắc Đế, Phường Tân Thành, nkuăl ƀon têh Buôn Ma Thuột, n’gor Dak Lak hôm tâm rnoh geh bu nchueng rdâng yor geh 2 nŭih ntưp srê Covid-19. Nŭih ƀon lan ta aơ dôl ma ndơn geh nau kơl an ueh ngăn bah ƀon lan ndrel âk ntŭk kơl an êng. Ăp ƀao phe, tăp kik, byăp play geh leo tât, kơl an an khân păng đăp mpăn nuih n’hâm ndrel n’gâng kan ntrŭt jăng srê ji.

            Ndơn geh ăp ndơh ndơ kơl an tâm ntŭk tâm nkhah êng, yuh Nguyễn Thị Lý (manh ngih gŭ tâm hẻm 189/1 Mai Hắc Đế) nkoch, yuh ntơm nkuăl Ea Kar hăn nkuăl ƀon têh Buôn Ma Thuột manh ngih gŭ gay ma pah kan. Nau geh ăp nar tŏng răk rong ân barr me kon ndrel ma prăk manh ngih gŭ ăp khay. Măng 8/5 tăng lah tâm hẻm nơm gŭ geh nŭih ntưp srê Covid-19 yuh rvê ngăn. Yơn lan, rnôk geh cán bộ tâm nkuăl nkoch mbơh mpeh nau ƀư tĭng aơ nau ntrŭnh mpeh nau njrăng srê ri yuh đăp mpăn ngăn ndrel rnơm lah srê ji mra ơm geh bah. Ăp nar kơt tĭng nau nchueng rdâng, yuh mro uănh kơt tĭng ăp nau ntrŭnh mpeh nau njrăng rdâng srê gay ma mât ân nơm ndrel ma nŭih êp nơm.

Ndơ sa geh tâm pă

Bol ma mô dơi hăn kan tâm âk nar rlau aơ, yơn đah nau kơl an bah ăp mrôt kan, nŭih ndrel n’gâng kan, nau rêh ăp nar bah bar me kon yuh hŏ ntơm geh nau đăp mpăn, mô rvê nau mô tŏng ndơ sa ăp nar:

             ‘Nar tâm nkah lah 21 nar ri phung hên kŏ mâp du đê̆ nau jêr, yơn n’gâng kan tâm nkuăl kơl an âk ngăn. Phung hên ndơn geh phe, piăng ndrel âk ndơ sa”.

            Tâm rnoh 47 rnặk rêh tâm hẻm 189/1 Mai Hắc Đế, geh 20 rnăk, đah 47 nŭih, lah nŭih manh ngih tâm 4 njăr ngih. Âk ngăn ăp nŭih aơ mô geh nau kan, mô geh âk prăk, ri ma nau rêh mâp jêr ngăn. Tâm ntŭk geh nchueng rdâng srê, tâm ban ma nau khân păng mô dơi hăn kan, mô geh prăk dŏng tâm nau rêh ăp nar. Yor ri, đah khân păng, piăng m’êt bu ân mông ôi, ndơ sa ma ăp nŭih bu tâm rgop kơl an lah nau khlay ngăn.

Băp rêh geh pă leo tât ngih ƀon lan

Wa Đặng Thị Liệu, nŭih manh ngih tâm ntŭk bu nchueng aơ nkoch, 3 nar ma aơ, đah nau kơl an bah ƀon lan, rnăk wa mô rvê mô tŏng ndơ sa ăp nar. Wa saơ đăp mpăn nuih n’hâm đah ăp nau kơl an bah ăp nŭih đah kônh wa geh nau nchueng rdâng kơt nê:

             ‘Rnơm ăp nŭih geh nuih n’hâm lŏng, rmôt kan, n’gâng kan bah nkuăl, kơl an hên gay ma rlet rlau nau jêr jŏt aơ. Phung hên kŏ blau nau ma lah ueh ân ăp nŭih dơm”.

            Kơp tât lơ 15/5, UBND Phường Tân Thành hŏ ndơn geh nklăp 30 rkeh prăk ndrel 300 kg phe, 100 thùng mì tôm, rlau 2 tạ byăp ndrel âk ndơ ngêt sa êng êng. Yuh Vũ Thị Mai Tuyên, Kruanh rmôt kan bu ur Tổ dân phố 10 Phường Tân Thanh nkoch, ntơm ăp nklâm ndơ bah nŭih kơl an, ăp nar rlau aơ rmôt bu ur hŏ tâm rgop nsum ma UBND ndrel rmôt kan bah Phường Tân Thành pă tât ăp ty nŭih geh ndơn. Nsing tâm ndơ geh rgop kơl an, rmôt kan mra rgum ăp nŭih kơl an tât kơl pă, nklâm ma dŭng gay pă ân ăp rnăk.

  Ndơ sa geh tâm pă ma nklâm ân ƀon lan

Đah ăp ntil ndơ byăp, bum play ri ăp nŭih mra pă nkre, ăp ndơ êng ru ri mra tâm pă tâm ban:

             ‘Tât rnôk aơ, ăp rnăk kŏ geh đăp mpăn nau rêh tâm ntŭk tâm nkhah. Nar nkhah lah 21nar ri ŭch geh nau nsum ty kơl an bah ăp nŭih đah ăp nŭih ƀon lan tâm hẻm 189 aơ. Đah nau kan bah nơm ri mô dơi ân rnăk mô tŏng ndơ sa kŏ kơt lah ndơ dŏng ăp nar”

            Nau kơl an bah n’gâng kan bah nkuăl, ndrel nau kơl an bah ăp nŭih nuih nuih n’hâm lŏng hŏ kơl an ân ăp nŭih ƀon lan rêh tâm ntŭk geh tâm nkah geh đăp mpăn mpeh nuih n’hâm. Bah nê rgop tay n’hâm gay khân păng rlet nau jêr tâm nau rêh ndrel nsum n’hâm tâm nau ntrŭt jăng lơi srê ji./.

Nŭih rblang: H’Thi