VOV4.M’nông: Tĭng nau tă bah Rnâng kan rđau nau kan njrăng rdâng srê Covid-19 tâm n’gor Dak Lak tâm lơ 27/7, n’gor geh tay 13 nŭih ntưp, 3 nŭih bah. Tâm 13 nŭih geh kơp dơn lah ntưp ma srê Covid-19, geh 5 nŭih saơ tâm ƀon lan, geh tât nau geh srê tơm bah nkuăl ƀon têh Hồ Chí Minh, Bình Dương ndrel Long An. 8 nŭih hôm e geh nau ntưp bah ăp nŭih geh mbơh bah năp nê. Nau ngăn lah, tâm 8 nŭih aơ geh 3 nŭih geh tât nŭih ji mrô 95.008. Aơ lah ntŭk srê tâm ƀon Khoá, xã Cư Pui, nkuăl Krông Bông. Kơt rim tât 5h kêng măng 27/7, n’gor Dak Lak geh 141 nŭih, 7 nŭih hŏ săm bah, ê geh nŭih khĭt. Tâm rnoh 134 nŭih dôl ma geh săm ri geh 8 nŭih ji jâk dôl geh nai dak si uănh n’ôi ndrel ma săm tĭng nau dơi.

Nău lư bah Ƀan rđău đă njrăng n'gang nuh srê COVID-19 nkual ƀon têh Buôn Ma Thuột, n'gor Dak Lak, kêng măng nar 27-7, Nhih dak si nkual ƀon têh Buôn Ma Thuột hŏ manh rlu kan n'hanh ntĭl mpông khoa Nội bah Nhih dak si tă geh tât test ngăch nuĭh ntưp đah SARS-CoV-2. Na nê , nar 26-7, nhih dak si nkual ƀon têh Buôn Ma Thuột dơn du hê nuĭh tât but săm ji đah nău mpơl ji kroh ko ji bôk n'hanh rdeng săm ta khoa Nội. Tât ôi 27-7, lôch rnôk but săm, saơ geh nău mpơl mĭn ntưp, bác sĩ khoa Nội hŏ đă ƀư test ngăch SARS-CoV-2 đah nuĭh ji dja n'hanh an saơ mpơl ntưp. Lôch nê, Nhih dak si hŏ njuăl mham bah nuĭh ji tât Ntŭk rgum mât njrăng kop ji gay ƀư uănh năl mham RT-PCR. Nhih dak si hŏ manh rlu kan but săm ji n'hanh ƀư mpă wêl khoa Nội gay rhŏ dŏng pah kan ôp uănh, ƀoi tĭng têl njrăng n'gang nuh srê COVID-19.

Bah năp nau tât bah srê Covid-19 tâm nkuăl, UBND TP BMT, n’gor Dak Lak hŏ ntrŭnh ƀư nau kan pă phiếu ân ƀon lan mpeh nau tâm ƀah hăn chợ ân ƀon lan gay ma đăp mpăn nau njrăng rdâng srê. Tĭng nê, nau kan hăn chợ mra geh pă phiếu ntơm lơ 29/7. UBND TP HCM hŏ geh rđau UBND ăp xã, phường, ntơm pă thẻ hăn chợ (hăn siêu thị, chợ, ntŭk tăch ndơ ngêt sa, dak ngêt) ân ƀon lan tâm nkuăl đah nau dơi 03 nar du tŏ, tâm pleh đah ăp rnăk vâl. Nŭih ƀon lan nchih êng nar tâm thẻ lor ma hăn chợ ndrel đăp mpăn thẻ mbu moh săk ri nŭih nê hăn, mô ân nŭih êng hăn ndơn. Thẻ hăn chợ geh dơi dŏng du tŏ/du tợ tâm nkuăl. UBND ăp xã, phường pă remôt kan nkân njrăng tâm ăp mpông chợ gay ma uănh thẻ hăn chợ, nkre kơl an ƀon lan ƀư ăp nau kan 5k tâm nau njrăng rdâng srê./.

Nŭih rblang: H’Thi