VOV4.M’nông: Măng 30/5, wa Nay Phi La, Giám đốc n’gâng kan dak si n’gor Dak Lak kơp dơn tâm n’gor geh du hênŭih ntưp srê Covid-19. Nê lah bu ur, ta Thôn 7, xã Cư Mốt, nkuăl Ea Hleo, n’gor Dak Lak. Păng aơ lah nŭih gŭ ndrel ma jrâu đah nŭih ntưp Covid-19 ta Quận 12, nkuăl ƀon têh Hồ Chí Minh. Păng ncho ndeh năch tât Thôn 7, xã Cư Mốt rnôk 6h ôi lơ 26/5/2021. Ntơm lơ 26 tât 29/5 păng mâp ma nŭih tâm nkuăl.

Ôi lơ 30/5 păng geh leo tât ntŭk nkhah rgum nsum tâm Ngih săm ƀŭt Cao đẳng Công nghệ Tây Nguyên ndrel geh sŏk mham uănh năl geh ntưp srê Covid-19. Tâm măng 30/5 n’gor Dak Lak hŏ rƀŭn nchră ndal gay ntrŭnh nau nchueng rdâng lĕ ntŭk nŭih aơ tă rêh ndrel nkhah ăp nŭih geh mâp dăch. Nkre joi ăp nŭih F1 ndrel F2. UBND n’gor Dak Lak kŏ đă nsrŭng nau nchuen rdeng năch ma ndeh ô tô tĭng ăp trong. Ndeh hợp đồng, ndeh taxi, ndeh hăn pâl n’aih tă bah Dak Lak tât ăp n’gor: Nkuăl ƀon têh Hồ Chí Minh, Bắc Ninh, Bắc Giang ndrel rlŏ sĭt ntơm n’gul măng 31/5/2021./.

Nŭih rblang: H’Thi