VOV4.M’nông: Tâm rnôk bah năp, Mặt trận tổ quốc ăp gưl n’gor Dak Lak lĕ mbơh ƀư âk nău kan ngăn ngên gay rgŏ jă ăp rơh kơn nuĭh ƀon lan ndrel ty râng njrăng n’gang srê. Tă bah nĕ, rgop ndrel gưl ủy, n’gâng kan ƀon lan n’hanh lam ƀon lan ntrôl rŭch chôt srê, mât uănh săk soan ntŭk gŭ rêh.

Jêh rnôk nchoeng n’gang rhŏ an njrăng n’gang srê Covid-19, nău rêh bah kônh wa ƀon Tơng Jŭ, xă Ea Kao, nkual ƀon têh Buôn Ma Thuột lĕ plơ̆ tay nău nâm ơm mhe, ngăch lăp yan pĕ lêh cà phê. Wa H Yam Bkrông, Kruanh ƀon Tơng Jŭ nkoch, rnôk bôk khay 10, rnôk ƀon ntoh rkum nuĭh ntưp Covid-19 đah hang rhiăng nuĭh ntưp, lam ƀon rlău 440 rnăk, 2.200 nuĭh an ƀư tĭng nchoeng n’gang, nkhah êng dak si. Knơm nău ndrel ty, ntop kơl bah ăp gưl, ăp nău kan, ăp rmôt lŏng bôk tôr, nău ƀư dŭt n’hâm bah rmôt kan covid-19 ntŭk gŭ rêh, kônh wa đăp mpăn nkhah êng, tĭng rjăp ăp nău ntrŭnh njrăng n’gang chôt srê. Nău tâm rnglăp, du nuih n’hâm bah nuĭh ƀon lan lĕ rgop kơl ƀon lan nking n’gang chôt srê, ndơ̆ nău rêh plơ̆ tay nâm ơm.

          “Bah gưl ủy n’gor tât bah dâng, geh ăp nuĭh lŏng bôk tôr, ăp nuĭh lŏng bôk tôr uănh kơl mro kônh wa tâm rnôk nkhah êng. Rmôt kan Covid ntŭk gŭ rêh bah ƀon geh 17 nuĭh pah kan dŭt gơih, dŭt lah nsrôih rhŏ an kônh wa bah ndơ sa jêh nĕ kônh wa ƀư sa kơt mât ndrôk sŭr, ri rmôt kan Covid rhŏ an tât lôch tât dŭt, jêng kônh wa đăp mpăn gŭ ta jay. Aƀaơ hin plơ̆ tay nău nâm ơm jêh nĕ hăn nkoch trêng, nkah ntĭnh kônh wa an ƀư uĕh njrăng n’gang srê”.

    Ủy ban Mặt trân Tổ quốc lah ntŭk bôk năp wơt dơn ntop kơl njrăng n’gang srê Covid-19

          Ta lam n’gor Dak Lak, ăp rmôt kan covid ntŭk gŭ rêh ta ăp thôn, ƀon, tổ dân phố lĕ hăn ndrel đah ăp rmôt hăn leo lor, kơl kan râng njrăng n’gang srê. Tât aƀaơ n’gor hôm e mât 4.218 rmôt covid ntŭk gŭ rêh ta 15 nkuăl, nkual têh, nkual ƀon têh, n’gâng tơm lah ăp acns bộ mặt trận, nsum mpôl ƀon lan. Nău kan khlay bah ăp rmôt lah groi nđôi ăp nuĭh tât bah nkual geh srê, nău ƀư tĭng nkhah êng ta jay, nkoch trêng rgŏ jă ƀon lan ƀư tĭng uĕh ăp nău ntrŭnh mpeh njrăng n’gang srê. Wa H Kim Đoa Byă, Kruanh ban dân vận, Kruanh UBMTTQ VIệt Nam n’gor Dak Lak an gĭt, rlău ma tâm pă nău kan ta bah dâng, mặt trận ăp gưl hôm mât ƀư tơm tâm nău kuăl jă, rgŏ jă ăp nuĭh an trong kan njrăng n’gang srê ta ntŭk; mbơh ƀư du đêt ntrong kan uĕh, trong ƀư mhe gay ntop kơl an ăp rmôt râng njrăng n’gang srê ta ntŭk bôk năp.

          “Dơi mât uĕh nuih n’hâm tâm yô̆ tâm kơl ta ntŭk gŭ rêh, lơn lah ăp rnăk n’hanh ăp nuĭh lĕ geh nău kan lơn tâm nău njrăng n’gang srê. Tal 2 lah lĕ geh âk nău kơl, tâm rgop kơt piăng sa tâm kơl mô lah ăp piăng mô sŏk prăk. Ăp nuĭh ƀon lan lĕ wât nău kan âk lơn tâm nău njrăng n’gang Covid, kơl an n’gâng kan ƀon lan tâm nău rgŏ jă ăp nuĭh gay kơl an ăp nkual nkhah êng kơt ăp ntŭk kâp uănh n’hanh ăp ntŭk nchoeng n’gang”.

Mặt trận Tổ quốc ăp gưl n’gor Dak Lak lĕ mât uĕh ƀư tơm tâm rnglăp, rgum nuĭh ƀon lan râng njrăng n’gang srê.

          Wa Phạm Minh Tấn, Groi Bí thư rnâng kan N’gor ủy Dak Lak uănh lah, Mặt trận tổ quốc ăp gưl n’gor Dak Lak lĕ mât uĕh nău ƀư tâm rnglăp rgum lĕ ăp rơh kơn nuĭh ƀon lan râng njrăng n’gang chôt srê Covid-19 ta ntŭk. Tă bah trong mặt trận tât n’gor lĕ wơt dơn bah ăp ntŭk kan, rmôt kan, doanh nghiệp, nuĭh lŏng bôk tôr dĭng lĕ rnoh prăk rlău 34,5 rmen prăk; 10.000 dŭng đăp mpăn nău rêh, 200.000 kôp kit uănh năl ngăch covid-19 n’hanh âk ndơ dak si gay rhŏ trong kan njrăng n’gang srê Covid-19. Mặt trận Tổ quốc ăp gưl lĕ rgŏ jă n’hanh njuăl ndơ hang rhiăng tấn ndơ sông sa gay kơl nuĭh ƀon lan ta ăp nkual nchoeng n’gang n’hanh ntop kơl ăp rmôt njrăng n’gang srê.

          “Mặt trận Tổ quốc lĕ ƀư tĭng dŭt uĕh nău aơ, đah ăp trong kuăl jă tâm rgop ndơ đah ndoh ndơ gay kơl nuĭh mâp jêr jŏt. N’gor ủy, n’gâng kan ƀon lan ăp gưl, gưl ủy đảng n’hanh lĕ trong chính trị kơp dơn da dê nău geh dŭt têh bah Mặt trận Tổ quốc tâm nar bah năp. He nsing nơm mât uĕh soan têh tâm rnglăp rnoi mpôl he mbra dơi ntrôl rŭch chôt srê Covid-19”.

          Mât uĕh nău tâm tâm rnglăp, rgum nuĭh ƀon lan, Mặt trận Tổ quốc ăp gưl n’gor Dak Lak dôl nsrôih rgop đah n’gâng kan ƀon lan mât uănh, ntop kơl nuĭh ƀon lan. Nău du nuih n’hâm, tâm rnglăp n’hanh nău wât bah ăp nuĭh tâm ntŭk gŭ rêh mbra jêng soan dăng gay ndrel nking n’gang, ntrôl rŭch chôt srê, ơm ndơ̆ nău rêh plơ̆ tay nâm ơm./.

          Nuĭh rblang: Y Sưng Phê Ja