VOV4.M’nông: Tâm ăp rơh tâm mâp đah cử tri đah nŭih ân geh săch lăp ntơh măt HĐND ăp gưl tâm Dak Lak mhe aơ, âk nŭih hŏ ntoh bôk nau kan bah nơm du ntrong ueh ngăn. Ngăn lan, ăp nŭih lah bu ur rnoi mpôl đê̆ rơh bôk năp ân geh râng săch hŏ geh ndâk ăp bôk nau kan ngăn, tâm dăch nau ngăn, geh cử tri kơl an.

            Lôch rơh mâp cử tri bonh đă nau săch kan, yuh Vi Thị Kiều Chi (rnoi Tày) nŭih ân geh săch lăp ntơh măt HĐND n’gor Dak Lak năm kan 2021-2026 hŏ ndơn geh nau kơl an, rgop nau ngăn bah cử tri gay ma lŏ jêh nkô̆ nau bah bôk nau kan bah nơm. Lah nŭih mom ngăn geh râng ân geh săch lăp kan bah rmôt kan mrô 1 (nkuăl ƀon têh Buôn Ma Thuột), yuh Vi Thị Kiều Chi nkoch, nơm mra ndâk bôk nau kan geh nsum ma nau mât nau dơi ndrel nau geh jêng bah đoàn viên, druh ndăm ndrel kon se. Tâm nê uănh khlay tât nau n’hao lơn nau mât chăm ân ăp kon se tâm nkuăl jru, nkuăl ngai, ndrle nkuăl rnoi mpôl đê̆. Tĭng yuh Vi Thị Kiều Chi, rơh bôk năp geh ŭch lăp pah kan ri âk nau ê gĭt, yơn yuh rnơm tâm nau kan bah nơm ndâk ndrel ma mbơh bah năp cử tri, lah nau tâm dăch ma nkuăl nơm:

             ‘Tâm bôk nau kan ri êng săk gâp lah êng ndrel kŏ lah ntoh măt ân ăp rmôt kan Đoàn ri kŏ ndâk dơi bôk nau kan dăch ngăn tâm nau ƀư ăp nau kan, nau dơi ndrel nau geh jêng ân ăp nŭih đoàn viên, druh ndăm, kon se. Êng nê ri săk gâp nơm kŏ lah bu ur ndrel gĭt kloh nau kan bah nŭih bu ur ri gâp kŏ rgum âk tâm ăp nau kan geh tât nau mât chăm ân bu ur ndrel kon se tâm nkuăl tâm rơh tât”.

            Hôm yuh H’Jai Hmok, rnoi Rđe, rơh bôk năp geh ŭch lăp kan ntoh măt HĐND xã Dray Bhăng, nkuăl Cư Kuin, yuh hŏ ndâk bôk nau kan rgum tâm nau rgum ăp nŭih bu ur rnoi mpôl đê̆ tĭng chroh. Rmôt bu ur xã hŏ ntrŭnh âk nau kan kơl an bu ur rnoi mpôl đê̆, n’hao nau geh, rnơm nau rgum âk mpưm oh nur bu ur râng tâm nau kan, rgop nau tâm nau kan hun hao văng sa, têk n’huch rnoh ach o nsum bah xã hôm rlau 5%. Lah geh nau dơi lăp kan ntoh măt HĐND tâm rơh tât, đah nkô̆ nau ŭch nâp ndrel ntrŭt dăng nayu kan tâm nkuăl lah du nau kan tơm lah ăp nŭih bu ur, yuh H’Jai Hmok mra ndâk nau kan tâm di gay ma rgum bu ur râng ăp nau kan, kơl an bu ur hun hao văng sa ndrel ndâk njêng rnăk vâl tâm ban, đăp mpăn:

             ‘Âk ngăn nŭih ƀon lan tâm nkuăl rêh tĭng nau moh geh moh sa ndrel mô ŭch râng nau kan ma bu, khânm păng rêh êng, yoor ri tâm bôk nau kan tât ri gâp mra ƀư ân nau kan bonh đă. Bôk năp lah leo nau kan, nkô̆ nau kan geh nau rgum gay râng, gay bu gĭt kloh saơ tă bah bôk nau kan nê ân tâm di ngăn ri bu saơ nau tâm rgum ndrel ăp nŭih bu tĭng chroh ri saơ geh nau tâm di ndrel khân păng mra ndrel lăp pah kan ma nơm”.

            Ŭch geh lăp kan tâm âk nŭih rnoi êng êng, rgum âk nŭih rnoi mpôl đê̆ mpeh ba lơ lăp gŭ, yuh Hoàng Thị Huệ, rnoi Nùng, nŭih kan ntơh măt HĐND xã Ea Tam, nkuăl Krông Năng, n’gor Dak Lak ân âk nau kơl an nau kan mât nau vay ơm văn hoá ndrel ma nau hun hao văng sa bah nkuăl. Tâm bôk nau kan bah nơm, ndrel nau kan ndrel ăp gưl uỷ, n’gâng kan bah nkuăl bonh đă nŭih ƀon lan, rmôt kan râng ndâk njêng ƀon lan mhe geh n’hao, tâm nau ƀư Kruanh rmôt kan bu ur xã, yuh Hoàng Thị Huệ leo nau rgum nkô̆ nau ƀư ân geh tâm ban bu ur bu klô, ndâk nau kan “5 mô, 3 kloh”, kơl an nŭih bu ur ntrơn rgâl tơm tăm, mpa rong ndrel mât nau ueh ơm văn hoá bah ăp rnoi mpôl mpeh ba lơ lăp tâm nau kan ân geh bu săch lăp, Yuh Hoàng Thị Huệ lah rjăp:

             ‘Lah cử tri rnơm gay ma săch gâp lăp kan tâm HĐND xã dăch tât ri săk gâp nơm mra nsôih gay ma ƀư ân ueh ăp nau tă dơi tâm rơh rlau aơ, rgum djăt ăp nau đă mbơh tă bah gưl kan ba lơ kŏ kơt lah bôk nau kan bah gưl kan ba lơ gay ma ntrŭnh tât kônh wa ƀon lan”.

            Năm kan 2021-2026, n’gor Dak Lak mra săch luh 75 nŭih ntơh măt HĐND gưl n’gor, 514 nŭih ntoh măt HĐND gưl nkuăl ndrel 4.667 ntơh măt HĐND gưl xã. Tâm nê đăp mpăn tâm di nuih n’hâm nau ntrŭnh 1187 bah Uỷ ban Rnâng man Quốc hội, lah geh đê̆ ngăn 35% nŭih lah bu ur, nsôih rnoi bu ur ân geh săch lăp kan ngăn lah 305. Tât rnôk aơ, ăp rmôt kan săch hŏ ƀư jêh ăp nau kan mâp nŭih cử tri bonh đă bu săch tĭng nau ntrŭnh. Rnoh moh săk ndrel nau mbơh nkoch bah săk ăp nŭih kŏ geh lir tĭng tâm aơ ntŭk geh ma ƀon lan geh dơi gĭt kloh.

            Đah ăp nau kan geh ăp nŭih ŭch geh săch lăp mbơh tâm ăp rơh tâm mâp cử tri gay ma bonh đă bu săch kan rơh rlau aơ, mra kơl an cử tri gĭt kloh lơn mpeh nau nchrăp kan bah ăp nŭih rnôk geh săch lăp ntơh măt HĐND năm kan tât, tă bah nê gay geh nau săch luh ăp nŭih ntoh măt ngăn ngên geh nau dơi, tŏng nau blau, nau mĭn tâm nau săch kan geh tâm lơ 23/5 tât./.

Nŭih rblang: H’Thi