VOV4.M’nông: Nău lư bah Ƀan rđău đă njrăng n'gang  nuh srê COVID -19 n'gor Dak Lak, tâm nar ntri 26/7, n'gor dja hŏ năl geh tay 11 nuĭh ntưp SARS-Cov- 2, tâm nê geh 6 nuĭh ntưp tâm lam ƀon lan. Krông Năng lah nkuâl năl geh nuĭh ntưp đah SARS –CoV -2 dŭt âk đah 5 nuĭh. Nkual ƀon têh Buôn Ma Thuột năl geh tay 3 nuĭh ntưp đah SARS –CoV-2.

Nkuâl Ea Kar năl geh 2 hê geh tât bah tơm nuh srê Bình Dương. Nkuâl Krông Pách năl geh 1 hê plơ̆ sĭt bah nkual ƀon têh Hồ Chí Minh. Geh tât 6 nuĭh ntưp tâm ƀon lan dơi năl saơ tâm nar 26/7, n'gâng kan dak si Dak Lak hŏ ƀoi tĭng, njŭn an gŭ rgum êng n'hanh ƀư sŏk mham uănh năl ngăch 14 F1; ntĭm nti Trung tâm Y tế ăp nkuâl ƀư puh dak si kaman ntŭk gŭ rêh ta jay nuĭh ji n'hanh ăp ntŭk nuĭh ji tă weh tât. Ndrĭ, kơp tât 5h kêng măng nar 26/7, n'gor Dak Lak hŏ năl geh 128 nuĭh ntưp đah SARS-CoV-2 ta 13/15 nkuâl, thị xã  n'hanh nkual ƀon têh. Bar nkuâl mô hŏ năl geh nuĭh ji lah nkuâl M'Đrăk n'hanh Cư Mgar.

Nuĭh rblang: Điểu Thân