VOV4.M’nông: Kơp tât 4h kêng măng nar 29/7, n'gor Dak Lak năl geh tay 7 nuĭh ntưp Covid-19 n'hao lĕ rngôch rnoh nuĭh ntưp lam n'gor 185 nuĭh. N'gor hŏ dơn wơt tay âk rnoh nuĭh bah nkual tơm nuh srê sĭt n'hanh nău groi nđôi dơi đă ƀư lhăt tay. Tĭng nău lư bah Ƀan rđău đă njrăng n'gang nuh srê Covid-19 n'gor Dak Lak, 7 nuĭh mhe ntưp dơi năl geh ta 4 nkuâl nkual ƀon têh lah: nkuâl Cư M’gar 3 nuĭh; nkuâl Krông Bông 2 hê; nkuâl Krông Păk 1 hê n'hanh nkual ƀon têh Buôn Ma Thuột 1 hê. Tâm rnoh ăp nuĭh ntưp mhe, dơn geh du hê dơi năl geh ta nkual an gŭ rgum êng, ntưp bah tơm nuh srê ơm gĭt năl bah năp nê nơh. Hôm ƀa ƀă, geh sĭt tă bah tơm nuh srê n'gor Bình Dương da dê. N'gor Dak Lak tâm ăp nar mhe aơ năl geh tay âk nuĭh bah nkual  ƀon têh Hồ Chí Minh, Bình Dương n'hanh ăp n'gor mpeh bah dâng plơ̆ sĭt. Âk nuĭh ji năl ntưp geh tơm luh bah nkual nuh srê dja da dê n'hanh n'gor dôl an tĭng ƀư groi nđôi lhăt ma công nghệ thông tin đah nuĭh plơ̆ sĭt bah nkual nuh srê./.

Nuĭh rblang: Điểu Thân