VOV4.M’nông - Nŭng nar 31/5 N’gâng kan dak si mbơh tay 1 hê ji Covid-19 ta Dak Lak, lah nuĭh ji mrô 7186. Nuĭh aơ gŭ ta thôn 7, xă Cư Mốt, nkuăl Ea H’Leo, lah F1 bah nuĭh ji ta nkual ƀon têh HCM. Ta năp nu nău jêr jŏt bah kop srê, nkuăl Ea H’Leo lĕ ngăch ƀư ăp trong nchoeng n’gang nkual srê. Jêh du nar, rlău 600 nuĭh F1, F2 n’hanh F3 lĕ dơi joi, 10 ntŭk dôl ƀư đă nchoeng n’gang. Nău tâm ƀah kon nuĭh lĕ dơi ƀư ngăch.

         Wa Nông Ngọc Thiết, Kruanh UBND xă Ea Wy, ntŭk geh ăp ntŭk geh tât nuĭh ji 7186, an gĭt, bah 10 mông măng 30/5, rmôt kan dơi kan ta ntŭk lĕ ƀư ntŭk kâp njrăng, nchoeng n’gang ăp nkual quán Thanh Dậu, quán cà phê tơm jri, ntŭk sa 3 Khía, jrô but uănh ji Nha khoa Việt Pháp 2, nkre ƀư joi ăp F1, F2:

                   “Đah ăp trong mkra ri kơp uănh geh 27 nuĭh F1, ăp nuĭh F2 bơi 200 nuĭh đŏng. Mpôl hên lĕ ƀư 5 ntŭk kâp njrăng tay ăp nkual geh nuĭh F0 vĕ rlău. Ăp ntŭk kâp njrăng lĕ dơi mbơh tâm loa rađio. Mpôl hên mbơh an Ngih dak si xă joi tay ăp nuĭh F1, F2 n’hanh F3. Mpeh nău aơ mpôl hên kuăl jă nuĭh ƀon lan gĭt ăp nău mbơh hăn mbơh tay nai dak si”.

Nkual ntŭk kâp njrăng thôn 6b xă Cư Mốt

         Hôm ta xă Cư Mốt, ntŭk kơp dơn nuĭh Covid-19 mrô 7186, bah măng 30/5 tât aƀaơ n’gâng kan ƀon lan xă lĕ joi n’hanh ndơ̆ nkhah rgum 15 nuĭh F1. 150 nuĭh F2 n’hanh 180 nuĭh F3 lĕ dơi ntĭm nkhah êng dak si. Ƀon lan ndâk njêng đŏng 5 ntŭk kâp njrăng nchoeng n’gang ta 3 thôn 6a, 6b n’hanh thôn 7 đah 2.500 nuĭh ƀon lan. Wa Võ Văn Lệ, Groi Kruanh UBND xă Cư Mốt, an gĭt: du ntŭk nchoeng n’gang, n’gâng kan ƀon lan xă lĕ pă 7 nuĭh geh rmôt dân quân, mpôl druh ndăm, Rmôt bu ur n’hanh Công an mât uănh ta ntŭk. Trong kan rhŏ an nuĭh ƀon lan tâm nkual nchoeng n’gang di ƀon lan uănh khlay:

“Mpôl hên jao du rmôt 2 druh ndăm n’hanh bu ur rnôk nuĭh ƀon lan tâm nkual nchoeng n’gang geh nău ŭch ri mbra tâm mâp rmôt druh ndăm kơl kan bah mpôl hên mbra hăn rwăt ăp ndơ ŭch dŏng bah nuĭh ƀon lan gay pă an nuĭh ƀon lan. Ủy ban Mặt trận kuăl jă gay rgŏ jă cán bộ công chức kơt viên chức ta ntŭk geh du gâl nău rgop bah nơm an trong kan njrăng n’gang srê aơ”.

Tĭng wa Nguyễn Văn Hà, Kruanh UBND nkuăl Ea H’Leo, kơp tât 2 mông nar 31/5, ntŭk aơ lĕ joi geh 62 nuĭh F1, rlău 300 nuĭh F2. Aƀaơ lĕ rngôch nuĭh F1 lĕ dơi ndơ̆ nkual nkhah êng rgum bah n’gor ta nkual Ký túc xá ngih sam ƀŭt Cao đẳng Công nghệ Tây Nguyên. Jêh uănh năl geh 47/62 nuĭh mô ntưp rơh 1 đah Sars-CoV-2. Bah 9 mông nar 31/5 UBND nkuăl lĕ ƀư tâm ƀah lam kon nuĭh tĭng ntĭm đă 15 bah Thủ tướng Chính phủ đah nkuăl têh Ea Đrăng, xă Ea Wy.

Nchoeng n’gang nkual quán Ba Khía xă Ea Wy

Wa Nguyễn Văn Hòa mĭn lah, n’gâng kan ƀon lan lĕ ƀư trong đăp mpăn ndơ dŏng rhŏ an nău rêh nuĭh ƀon lan. Ndrel đah nĕ, UBND nkuăl lĕ pă nuĭh way mât uănh an tĭng ntŭk kan n’hanh đă ăp rmôt kan dơi kan an rmal rjăp ăp nuĭh tih nău ntrŭnh gŭ tâm ƀah kon nuĭh:

“Văn hóa geh nău kan an uănh nđôi ăp nău kan văn hóa mât uănh, Nội vụ ri uănh nđôi mpeh nău chroh rƀŭn hôm công an ri uănh nđôi ăp ndeh ndơ̆ wơt rdêng năch sĭt. Đah ăp xă, ăp jrô gưl kan lah an geh nu nău tih ri nău kan nĕ mpeh đah nuĭh djôt bôk. Mô thơ tha roh njrăng n’gang yơn geh n’hâm soan nchrăp lor, mô tât ndal”.

Rơh ntoh srê Covid-19 tal 4 aơ, Dak Lak lĕ kơp dơn 4 nuĭh ji nĕ lah ăp nuĭg ji mrô 3237, 3334, 3836 n’hanh 7186. Ntŭk aơ lĕ nkhah êng rgum, nkhah êng dak si rhiăng nuĭh F1, nkhah êng ta jay rlău 5 rbăn nuĭh n’hanh rlău 3 rbăn nuĭh rêh tâm nkual nchoeng n’gang.

Nuĭh răk rblang: Y Sưng Phê Ja