VOV4.M’nông: Rơh thi tốt nghiệp THPT năm 2021, lam n’gor Dak Lak geh 19.800 kon se đăng kí râng thi, đah 32 ntŭk thi tâm ăp nkuăl, nkuăl têh ndrel nkuăl ƀon têh Buôn Ma Thuột. Gay nau pă điện geh đăp mpăn, kloh aih tâm rnôk geh rơh thi, Công ty điện lực Dak Lak tâm grop nsum đah N’gâng kan ntĭm nti ƀư nau kơp ăp ntŭk thi, rmôt thi, ăp ntŭk in sao đề thi ndrel chấm thi. Bah nê, ndâk ndrel ƀư nau kan leo dŏng, trong điện ân ueh ndrel tâm ban. Wa Nguyễn Văn Hảo-Kruanh ntŭk kan pă rđau Công ty Điện lực Dak Lak mbơh, bol ma srê Covid-19 geh nau tât jêr, yơn ăp mrôt kan tâm dâng hŏ ntrŭnh ƀư ueh trong điện, rklaih nau tât ndal gay ma rdâng nau tât, nchrăp ăp ndơ dŏng, kŏ kơt lah n’hao nau mât njrăng tâm ntŭk, rklaih lah geh nau tât, đăp mpăn nau tâm mâp mbơh ngơi 24/24 tâm lôch nar geh rơh thi:

  Mêt uănh trong sre điện tâm ntŭk geh rơh thi tốt nghiệp THPT

  ‘Rơh thi THPT năm 2021 tâm Dak Lak geh 2 ntŭk thi khlay ngăn nê lah ta Khách sạn Dakruko (ntŭk in sao đề thi) ndrel ngih săm ƀŭt Cao đẳng Sư Phạm Dak Lak (ntŭk chấm thi), bar ntŭk aơ phung hên jao ân bar ntŭk kan Điện lực Bắc ndrel Nam Buôn Ma Thuột ƀư nau uănh ndâk ƀư ăp nau kan pă điện ân nâp ueh. Bar ntŭk kan kŏ geh máy mpoh ang nchrăp ndrel công ty kŏ geh du máy nau dăng 250kwA lah geh nau tât ri mra leo nŭih ndrel ma ndơ dŏng tât gay ma pă điện ân năn, mô ân geh nau khuch tât nau in sao đề thi ndrel chấm thi”./.

Nŭih rblang: H’Thi