VOV4.M’nông - Ndrel đah lam dak, nar ntri cử tri ăp n’gor tâm nkual Tây Nguyên hŏ mpơl nău dơi n’hanh nău way bah he đah nău nklăch phiếu hăn sơch Đại biểu Quốc hội khoá 15 n’hanh Đại biểu HĐND ăp gưl năm kan 2021-2026. Aơ lah nar rgum rhơn mƀak ngăn bah lam ƀon lan, mpơl nău dơi n’hanh nău way bah he tâm nău sơch ăp nuĭh ntơh măt tŏng geh nuih n’hâm uĕh lŏng, tŏng nău gĭt blău, di lah nuĭh ntơh măt an nău mĭn, nău mpŏng n’hanh nău dơi ƀư tơm bah ƀon lan.

Ta Ngih dak si Đa khoa nkual Tây Nguyên, nău ƀư njrăng n’gang srê Covid-19 dơi mât uĕh, ƀa ƀơ dơi uănh nđôi tĭng nău ntrŭnh mrô 3088/QĐ-BYT bah n’gâng kan dak si an mpeh “Kôp rnoh ndơ ƀư ngih dak si đăp mpăn njrăng n’gang srê Covid-19 n’hanh ăp nuh srê trong n’hâm”. Tĭng nĕ, gay tŏng ăp rnoh ndơ ƀư “Ngih dak si đăp mpăn”, trong kan tâm pă, ƀư trong hăn êng rhŏ trong kan uănh nđôi, săch uănh kop srê dơi ngăch ƀư. Lĕ rngôch ăp nuĭh tâm ngih dak si an ƀư mbơh dak si n’hanh uănh nđôi duh săk. Ta mpông pêr ngih dak geh ntĭm trong, đah nuĭh geh nău siăk, duh, hor muh, ji mlông ko, rhăt ntang tâh, jêr nsôr, ji ŏk hăn trong êng n’hanh but uănh ta jrô but uănh săch uănh Covid-19 dơi an êp mpông pêr dâl, tŏng ăp mô an lăp nuĭh ji ntôn ntưp tâm ngih dak si. Nuĭh ji, nuĭh rnăk wâl rnôk lăp ngih dak si an tĭng nău ntĭm pă bah ngih dak si, wăn bok put mbung, mô soh n’hak lêng lang, mô rgum âk nuĭh, mât tâm ƀah đêt ngăn 2 mét đah nuĭh bah meng.

Mbơh săk soan an nai dak si ta trong lăp bah ngih dak si Đa khoa nkual Tây Nguyên

Tĭng nai dak si Võ Minh Thành, Groi Kruanh Ngih dak si Đa khoa nkual Tây Nguyên, đah nău nchrăp rjăp, tâm pă nău kan na nê̆ ndrel ăp trong mkra tâm ban đah nău way kan, dak si, ndoh ndơ, ntŭk nkoch mbơh, Ngih dak si nchrăp rdâng đah ăp nu nău dơi geh, tŏng ăp đăp mpăn an nuĭh ƀon lan, nuĭh kan dak si, n’hŭch đêt ngăn rnoh khuch bah srê tât nău ƀư bah ngih dak si.

“Bah rnôk ntơm ntoh nuĭh ji bôk năp tâm rơh srê tal 4 aơ ri ngih dak si lĕ ntơm uănh nđôi, rhăt jăp tay trong kan njrăng n’gang srê. Tât aƀaơ lĕ rngôch nuĭh ji tât but uănh kơt nuĭh bah dih tât ngih dak si dơi uănh kơt F0 jêng an tŏng ăp trong kan njrăng n’gang srê ta rnoh âk ngăn geh mbơh dak si n’hanh uănh nđôi duh săk n’hanh ntơm ăp trong njrăng n’gang srê êng kơt bok put mbung, uănh duh săk n’hanh tâm ƀah. Aƀaơ mpôl hên lĕ pă âk ntŭk uănh nđôi bah rnôk nuĭh ji lăp ngih dak si n’hanh ăp nuĭh ji knŭng geh 1 hê tâm wâl hăn mât rong”.

Hôm ta Ngih dak si Hiăn n’hanh Klơm soh-ntŭk dôl săm an 3 nuĭh ji Covd-19 ta Dak lak, trong kan tĭng rjăp nău ntrŭnh mpeh njrăng n’gang srê, rchăng n’gang srê Covid-19 bah nău wơt dơn, săm nuĭh ji. Đah 3 nuĭh ji dôl săm, Ngih dak si lĕ pă 4 ekip kâp tâm pleh, du ekip kâp uănh geh 1 hê nai dak si, 2 hê điều dưỡng n’hanh 1 hộ lý. Tĭng nĕ, ekip kâp uănh mbra uănh nđôi rjăp bah rnôk nuĭh ji lăp mpông pêr gay pă ntŭk, nkhah êng.

Ndrel đah nĕ, trong kan puh rao kaman bah lơ ngih dak si dơi ƀư ƀa ƀơ, ndŏk nja dơi tâm pă, mkra tĭng naư ntrŭnh, na nê̆ rnôk cán bộ dak si lăp du jrô êng gay tơ̆ kho ao jêh nĕ mư ntơm hăn uănh, but ji jêh nĕ tât jrô êng tŏ kho ao gay mkra tĭng nău ntrŭnh. Nai dak si Châu Đương, Kruanh ngih dak si Hiăn n’hanh klơm soh n’gor Dak Lak an gĭt:

“Aƀaơ ngih dak si lĕ pă nkual, pă trong hăn ntơm bôk năp. Lĕ rngôch ăp nuĭh ji, nuĭh rnăk wâl dơi mbơh an nai dak si đah mã QRcode jêh mbơh lah geh nău ntôn, geh nău ji ri mpôl hên ndơ̆ jrô but uănh săch lor jêh nĕ jă nai dak si hăn but uănh, lah geh nău ji ri mpôl hên mbra leo tâm ntŭk nkhah êng jêh nĕ sŏk uănh năl mham gay mĭn nchroh. Lah ntưp mpôl hên ndơ̆ nkre nkual săm, lah mô ntưp mpôl hên hôm e săm đăp mpăn jêh nĕ ndơ̆ nkual nkhah rgum gay ƀư nkhah êng tay”.

Nuĭh kan dak si kâp uănh ta trong luh lăp gay uănh năl duh săk

Wa Nay Phi La, Kruanh N’gâng kan dak si n’gor Dak Lak an gĭt, gay dêr nu nău ntoh ntŭk srê tâm ăp ngih dak si, n’gâng kan dak si lĕ đă ăp Ngih dak si ƀư tĭng uănh lah tĭng kôp rnoh ƀư Ngih dak si đăp mpăn njrăng n’gang srê Covid-19 n’hanh ăp kop srê trong n’hâm tĭng nău ntrŭnh mrô 3088/QĐ-BYT nar 16/7/2020 bah n’gâng kan dak si. Mât uĕh ƀư tĭng rjăp ăp trong ƀư mpeh săch uănh, pă ntil, tâm pă tŏng ăơ trong uănh nđôi kaman tâm ngih dak, mô an ntưp lêng lang tâm ngih dak si. Ăp ngih dak su an ndâk njêng n’hanh uănh tay ăp rmôt hăn ăp ntŭk dun n’gang ngăch, ƀư rlong lor ăp nu nău geh, pă nkual nkhah êng tĭng nău ntrŭnh. Wa Nay Phi La an git:

“Nău kan dak lĕ ntĭm rđau đah ăp ntŭk kan an ndâk njêng tĭng nu nău êng an ntŭk kan nơm. Bôk năp dơi ƀư trong nkhah êng tĭng khoa jrô kan, mô lah nkhâh êng ăp rot jay n’hanh nu nău mô uĕh ngăn lah lam ngih dak si yor nê đă du rmôt kan n’hanh đăp mpăn trong kan but uănh săm ji kơt njrăng n’gang srê. Ta aơ đă ăp ntŭk ngih dak si nkuăl kơt ăp ngih dak si an geh trong ƀư lor tâm pă nuĭh kan tĭng mông nar gay m’hâm ƀư mô khuch tât trong kan but uănh săm ji, tal 2 nchrăp ndoh ndơ dak si kơt pă trong gay n’hŭch đêt ntưp tâm ngih dak si”.

Aƀaơ, Dak Lak geh nklăp 90 nuĭh dôl nkhah êng ta ngih  dak si n’hanh nkhah rgum, bơi 1.800 nuĭh nkhah ta jay. Trong kan joi, nchoeng n’gang, nkah êng n’hanh săm dôl dơi nău akn dak si ƀư dŭt n’hâm tŏng ăp đăp mpăn săk rnglăy. Đah ăp nău nsrôih bah nău kan dak si n’hanh nău rjăp bah nuĭh ƀon lan tâm nău ƀư tĭng ăp nău ntrŭnh mpeh njrăng n’gang srê, Dak Lak ndrel lam dak ndrel ty ntrôl rŭch srê, mât njrăng săk soan bah nsum mpôl.

Nuĭh răk rblang: Y Sưng Phê Ja