VOV4.M’nông - Rnôk bah năp, ta n’gor Dak Lak lĕ kơp dơn 82 rơh kuăl sŏk rnon prăk điện bah nuĭh ƀon lan, mô lah đă uănh năl nău ntŭng điện... Nău na nao geh ăp rơh kuăl sŏk prăk điện n’hanh ntêt nkri nset điên ƀư âk nuĭh ƀon lan klach. Ngih pah kan dơi kan mbơh lor nuĭh ƀon lan an njrăng đah ăp rơh kuăl rlăm săk gay dêr geh mplư rlăm.

         Wa Trần Văn Nho-jay ta hẻm 447 trong Lê Duẩn, phường Ea Tam, nkual ƀon têh Buôn Ma Thuột, an gĭt, khay 6 mhe rlău, wa dơi tăng nău kuăl bah mrô điện thoại mha đă trok prăk điện rlău 370 rbăn prăk. Yor lĕ trok prăk điện hôm jêng wa mô ntôn, kuăl tât tổng đài điện lực gay năl ri gĭt nĕ lah du trong rlăm:

         “Khân pơng lah rnăk wâl gâp dôl rnon prăk điện n’hanh đă trok bah năp 4 mông kêng măng gay dêr nset điện. Gâp ôp aƀaơ trok m’hâm heh ri khân pơng lah jêh rnôk dơi dơn nău nchih ri kích tâm trong link gay mbơh mã khách hàng jêh nĕ mbra ntĭm trong trok prăk. Gâp saơ ntôn geh nău jêng nset măy. Jêh nĕ gâp kuăl tât Tổng đài điện lực tĭng mrô 19001909 gay mbơh, ri bu ur tổng đài lah nĕ nuĭh rlăm jêh”.

Ăp mrô điện thoại lĕ kuăl tât nuĭh ƀon lan Dak Lak gay rlăm

         Dơi nău kuăl điện thoại ôp prăk điện tâm ban kơt nĕ đŏng, wa Trương Văn Sơn, ta thôn 11, xă Hòa Phú, nkual ƀon têh Buôn Ma Thuột, rblang:

         “Rnăk wâl gâp lah nsum geh khay mô năn trok prăk điện, ri geh mrô điện thoại kuăl tât nkhah lah công ty trok prăk. Jêh nĕ rnăk wâl lĕ trok prăk hôm yơn lĕ geh kuăl sŏk tay, yơn saơ mrô điện thoại nĕ pơng mham. Rnăk wâl đă đah công ty lĕ trok prăk điện hôm ma ndơ lơh lŏ geh điện thoại rlăm săk kơt nĕ”.

         Tĭng kơp dơn bah Ntŭk mât uănh nuĭh dŏng điện lực Miền Trung, bah khay 5 tât aƀaơ, ta n’gor Dak Lak lĕ geh 82 nău nuĭh ƀon lan dơi nău kuăl bah mrô điện thoại mha, sơm săk lah nuĭh kan điện đă trok prăk điện; mô lah nuĭh bah ngih pah kan Công an dôl uănh nđôi nu nău nuĭh ntŭng điện... Nuĭh kuăl điện đă trok mô lah uănh năl nău mbơh lah mô mbra nset điện. Du đêt nuĭh hôm ntĭm an bu trong ƀư ăp tĭng trong link njuăl tă bah điện thoại.

         Jêh uănh năl, công ty điện lực Dak Lak mĭn lah aơ nău ăp rơh kuăl rlăm, tâm nĕ geh âk mrô mô di ta Việt Nam. Ăp rơh ưal aơ rlăm nuĭh dŏng điện, ntŭng nu nău mbơh gay rlăm prăk tâm tài khoản điện thoại, tài khoản ngân hàng... Lah đah nuĭh ƀon lan an  njrăng rnôk dơn ăp nău kuăl điện thoi ôp prăk gay dêr geh rlăm, wa Hà Văn Chương-Groi Kruanh công ty điện lực Dak Lak, nkoch kloh:

Nuĭh ƀon lan njrăng rnôk dơn nău kuăl bah ăp điện thoại mha

         “Công ty điện lưc Dak Lak lah tât ăp nuĭh dŏng: bôk năp lah nuĭh dŏng knŭng trôk prăk điện tă bah ăp kênh na nê̆ mô lah ăp rmôt sŏk an kơt lĕ ƀư tĭng ăp khay bah năp nĕ. Tal 2 lah nuĭh dŏng an dŭt n’hâm njrăng rnôk mbơh nu nău săk nơm an ăp nuĭh mham. Tal 3 lah ăp nău mbơh mpeh nu nău điện ri wơt dơn tă bah ăp kênh na nê̆ bah điện lực bah sa ơm tât aƀaơ mô geh tă bah điện thoại; nău an ntop kơl ri nuĭh dŏng dơi kuăl tât ntŭk mât uănh nuĭh dŏng 19001909 gay điện lực ntop kơl”.

         Rnôk bah năp, trong ƀư rlăm tă bah điện thoại lĕ geh ta âk ntŭk tâm lam dak. Ăp rơh kuăl rlăm săk aơ dơi ƀư tăm bah sim rác, mô lah ăp phần mêmg kuăl êng. Aơ lah nău rlăm công nghệ mhe n’hanh mô hŏ dơi rmal lôch. Yor nĕ, nuĭh ƀon lan an n’hao njrăng ăp nău kuăl ôp rnon, đă năl uănh nđôi...., mô knŭng êng prăk điện ma n’ăp ăp sam ƀŭt ndơ dŏng êng gay dêr geh sŏk in drăp ndơ./.

                                       Nuĭh rblang: Y Sưng Phê Ja