VOV4.M’nông: Ta nkual ƀon têh Buôn Ma Thuột, n'gor Dak Lak aƀaơ geh du nkual công nghiệp n'hanh bar rkŭm công nghiệp đah nklăp 4.000 nuĭh dôl pah kan. Ta năp nău tât krit nji bah nuh srê Covid – 19, ăp công ty, nhih máy mô lah xí nghiệp hŏ n'hanh dôl an ƀư âk trong nkra njrăng n'gang tĭng nău rđău đă bah Trung ương tâm ban kơt ta n'gor gay đăp mpăn an nuĭh kan tâm ban kơt ƀư njêng tăch rgâl.

          Công ty Cổ phần thép Đông Nam Á ta Nkual công nghiệp Hòa Phú, nkual ƀon têh Buôn Ma Thuột, n'gor Dak Lak geh rlău 600 cán bộ, công nhân viên n'hanh nuĭh dôl pah kan. Wa Lê Thị Tuyết Hạ - Groi tổng giám đốc công ty nkoch, nău kan ƀư njêng tăch rgâl bah doanh nghiệp nkre đah đăp mpăn njrăng n'gang nuh srê, jêng qui định 5K mpeh dak si dơi mbơh an ƀư n'hanh tĭng ƀư lhăt tât tĭng rmôt pah kan ƀư njêng.

“Lor bôk năp lah tĭng ƀư quy định “5K” bah Bộ Y tế. Nkre công ty đă lĕ rngôch ăp nuĭh luh lăp tâm công ty ân mbơh ngăch dăng n'hâm suan, hăn tĭng mbor puh nkhĭt kaman; tâm pă du rmôt gay mâp năch  n'hanh dơn si ƀŭt si tra gay der mâp ăp nuĭh bah ngai mâp đah nuĭh tâm công ty. Rlău ma nê, mpôl hên hôm tĭng ƀư an gŭ srang ngai tâm pă nuĭh gŭ kâp kan ta rmôt nkra si ƀŭt; ntŭk gŭ sa nsum ri ƀư mpêr nching…. Gay đăp mpăn njrăng n'gang nuh srê geh nău tam n'hanh đăp mpăn ƀư njêng".

          Hôm Công ty TNHH Xuân Hòa way ƀư njêng loih cơ khí ta Rkŭm công nghiệp Tân An 1, phường Tân Lợi, nkual ƀon têh Buôn Ma Thuột aƀaơ geh bơi 100 nuĭh kan. Tĭng ƀư njrăng n'gang nuh srê lhăt, công ty hŏ tâm pă mbor hăn puh nkhĭt kaman ta mpông luh lăp; tâm pă nuĭh tâm pleh gŭ kâp weh duh săk, dăn đă ăp nuĭh luh lăp tâm công ty rao ti puh nkhĭt kaman, ntĭm nti mbơh ngăch dăng n'hâm suan, phăt n'hanh đă wăn bok put mbung; rdâk njêng nkual an gŭ rgum êng rnă ntêm lor n'hanh tât rơh puh nkhĭt kaman lam jâng gung. Wa Trần Thị Thanh Hoa – Kruanh mât nuĭh kan Công ty Xuân Hòa an gĭt, ăp nuĭh kan bah doanh nghiệp hŏ dơi mbơh ăp tŏng ăp nău way njrăng n'gang nuh srê rnôk plơ̆ sĭt đah rnăk wâl n'hanh gŭ rêh ta ntŭk.

         “Mpôl hên đă lĕ rngôch công nhân tâm công ty rnôk lĕ mông pah kan ri ân sĭt sŏng dăng tât jay, der mâp đah âk nuĭh tâm rnôk dja, dơn luh bah dih jay rnôk geh nău khlay dơm gay mât đăp mpăn ngăch dăng n'hâm suan, mât rnoh ngăch nău kan.”

          Ta nkual ƀon têh Buôn Ma Thuột, n'gor Dak Lak aƀaơ geh 106 doanh nghiệp gŭ kan ta 2 nkual - rkŭm công nghiệp rgum, đah nklăp 4.000 nuĭh pah kan.

          Tĭng wa Đoàn Ngọc Thượng – Groi kruanh UBND nkual ƀon têh Buôn Ma Thuột, ta năp nău tât mô gĭt năl lor bah nuh srê Covid – 19, lơn lah nuh srê hŏ lăp tâm du đêt nkual, rkŭm công nghiệp ta âk n'gor tâm lam dak, lơh khuch khat dŭt têh, UBND nkual ƀon têh hŏ đă ăp doanh nghiệp ta n'gor ntơm pah kan njrăng n'gang nuh srê ta rnoh dŭt hô.

Njêng mpôl leo hăn rsong uănh lĕ rngôch ăp doanh nghiệp, lah saơ ntŭk tih pah kan njrăng n'gang nuh srê mbra dơi rmal lhăt. Ntơm bah nê, lor nchrăp rdâng lơh đah nău nsrôih dŭt âk đăp mpăn tĭng ƀư "rnoh tât kan ndrop" nkre hun hao wăng sa- rêh jêng kon nuĭh nkre njrăng, n'gang nuh srê geh nău tam.

         “Gay tĭng ƀư jăp pah kan njrăng, n'gang nuh srê Covid – 19 geh nău tam tâm let năp tay ta ăp nkual, rkŭm công nghiệp ri lor bôk năp ân tĭng ƀư jăp pah kan nkoch trêng gay ăp doanh nghiệp tĭng jăp ăp tŏng ăp trong njrăng, n'gang nuh srê tĭng trong ntĭm nti bah Bộ Y tế. Mât jăp rnoh nuĭh công nhân dôl pah kan tâm ăp công ty. UBND nkual ƀon têh mbra tĭng kơn dăn đă ăp nhih máy, xí nghiệp tâm pă ntŭk gŭ, ntŭk sa ta ntŭk an nuĭh kan lah geh tŏng ndơ; way kơp uănh ăp ndeh rklư rdeng ndơ, lơn lah ăp nuĭh ƀĭt ndeh ta ăp nkual geh nuh srê plơ̆ sĭt mpeh tĭng ƀư nău mplơ̆ ndơ ta ăp doanh nghiệp”.

Rơh ntoh luh nuh srê COVID -19 tâl 4 dja, Dak Lak hŏ năl geh 5 nuĭh ntưp đah kaman SARS –CoV – 2, tâm nê geh 4 nuĭh hŏ bah ji n'hanh dơi sĭt bah nhih dak si. N'gor hŏ an gŭ rgum êng, an gŭ srang ngai êng rlău 200 nuĭh F1, an gŭ êng ta jay rlău 20.500 nuĭh. Gay bah ir geh ma nău ntưp rêng nuh srê COVID -19 ntưp rêng lam ƀon lan, bah măng nơh tât aƀaơ, ăp nhih pah kan dơi kan hŏ rgum lĕ n'hâm suan gay ƀoi tĭng têl, nchih gĭt ntŭk n'hanh uănh năl ăp nuĭh ji geh tât. Nău đăp mpăn rêh jêng an ăp rnăk geh mpă wêl dơi tĭng ƀư ryôt ryiăt đŏng./.

Nuĭh rblang: Điểu Thân