VOV4.M’nông: Bah khay 10 tât aƀaơ, n’gor Dak Lak kơp dơn rnoh nuĭh ntưp Covid-19 hao ndal n’hanh jêng ngoăy tâm âk “Ntŭk duh lư” mpeh srê Covid-19 bah lam dak. Ta năp nău jêr jŏt chôt srê, trong kan njrăng n’gang srê ta Dak Lak lĕ saơ ăp nău n’hŭch, ngăn lah đah nuĭh kan, nău dơi uănh năl n’hanh ngăch chuh vaccine. N’gor dôl nsrôih mkra ăp nău jêr jŏt n’hanh n’hŭch hao rnoh nuĭh ntưp.

N’gor Dak Lak tâm rơh 4 bah srê Covid-19 lĕ kơp dơn rnoh nuĭh hao bơi 5.000 nuĭh ntưp Covid-19 ăp nar bah năp. Tâm nĕ nkual ƀon têh Buôn Ma Thuột lĕ rlău 1 rbăn nuĭh. Tâm rnoh rlău 600 nuĭh ntưp mhe bah 2 pơh bah năp, tât 90% nuĭh saơ tâm ntŭk gŭ rêh, n’hao rnoh âk srê ta nkual ƀon têh hao gưl 4. Wa Vũ Văn Hưng, Kruanh UBND nkual ƀon têh Buôn Ma Thuột an gĭt, Covid-19 ta nkual ƀon têh aƀaơ dŭt jêr joi saơ tam.

          “Aƀaơ nuĭh tâm ntŭk gŭ rêh mô gĭt tu tơm ntưp ma nău khlay aơ lah nkô̆ nău nuĭh bah nkual srê sĭt mô mbơh săk soan n’hanh mô ƀư tĭng nkhah êng ta jay. Aƀaơ ƀư joi F1 ri dŭt jêr yor rnoh nuĭh âk. Yơn lah nkual ƀon têh ndâk njêng 21 phường xă ndâk njêng rmôt joi hôm, jêh nĕ geh rmôt joi bah nkual ƀon têh tay. Jêh nĕ Viện Vệ sinh dịch tễ Tây Nguyên ntop kơl an du rmôt gay joi, ƀư test ngăch lam nkual ƀon têh”.

Rmôt nai dak si ƀư test ngăch an nuĭh ƀon lan ta nkual ƀon têh Buôn Ma Thuột

          Rnoh nuĭh ji hao âk tâm rnôk rnoh lam vaccine ta n’gor Dak Lak aƀaơ dôl ta rnoh đêt ta lam dak. Kơp tât bôk khay 11, rnoh nuĭh dơi chuh nglay 1 geh 58,6% n’hanh chuh tŏng 2 nglay lah 9,11%. Rnoh nkŭm âk vaccine đêt ƀư hao nău ntưp rêng tâm ntŭk gŭ rêh kơt hao mpet an trong kan săm ji.

Wa Trịnh Quang Trí, Kruanh Ntŭk uănh nkân kop ji (CDC) n’gor Dak Lak an gĭt: Tât nar 30/10, n’gor Dak Lak lĕ dơn nklăp 1 rkeh dĭng vaccine njrăng n’gang Covid-19 bah Trung ương. Lah chuh lĕ rnoh vaccine aơ mbra tŏng lam geh 72% rnoh nuĭh dơi chuh nglay 1 n’hanh ngăch chuh mư dơi n’gor ntrôl ngăch.

          “Ăp ngih dak si xă phường aƀaơ chuh nklăp 200-300 nglay chuh an 1 ntŭk kan gưl xă du nar. Yor nê lam n’gor ngăch rĭng geh du nar nklăp 40.000. Lĕ rngôch rnoh vaccine chuh lôch bah năp nar 5/11. Yơn lah đah nĕ, nău nchrăp tâm khay 11/2021 mbra dơn tay ăp rơh vaccie êng. Êng nkual ƀon têh Buôn Ma Thuột, ton 100% nuĭh ƀon lan bah 18 năm let lơ mbra dơi chuh đêt ngăn du nglay vaccine njrăng n’gang Covid-19 bah năp nar 15/11/2021”.

Ơm geh lam hvi vaccine an lam ƀon lan lah trong tam ngăn gay njrăng n’gang srê Covid-19

          N’gor Dak Lak lĕ kơp dơn bơi 5.000 nuĭh ji Covid-19, tâm nĕ geh 50% rnoh nuĭh dôl săm. Dôl lah ngăn, 10 nar plơ̆ ma aơ, rnoh nuĭh ntưp tâm nar ta Dak Lak ta rnoh 3 mrô, rnoh nuĭh ntưp tâm ntŭk gŭ rêh âk đah âk ntŭk srê hô. Tĭng wa Nay Phi La, Kruanh N’gâng kan dak si Dak Lak, lah srê mô hŭch tâm ăp nar tât, ri n’gor mbra rgum soan an săm F0, n’hanh dŭt ŭch geh nău tât kơl.

          “An nchăng n’gang dâl bah dăp 1 n’hanh dăp tal 2 ta aơ mbra geh jêr jŏt đah nuĭh kan nai dak si râng săm ji mbăn ri đah nău kan dak si Dak Lak geh nklăp 30 nai dak si, mô dơi tŏng nău ŭch, tĭng nkô̆ nău nĕ an kuăl tay ntop kơl bah Trung ương kơt Ngih dak si Chợ Rẫy n’hanh rnôk nuĭh ji âk lơn ri nău kan dak si ƀư trong nchrăp dăn tay ndoh ndơ ngih dak si rdâng săm bah Ngih dak si nkual ƀon têh Hồ Chí Minh, Ngih dak si Bình Dương jêh rnôk lĕ jêh nău kan rhoăt sĭt gay nchrăp njrăng an nu nău mô uĕh ngăn bah n’gor”.

          Tâm rơh hăn uănh, ntop kơl n’gor Dak Lak nchăng n’gang srê tâm nar 27/10 mhe rlău, Mpôl pah kan bah Ngih dak si Chợ Rẫy nkoch mpeh nău way kan, nău blău săm ji đah nuĭh ji Covid-19. Tĭng Tiến sĩ, Nai dak si Nguyễn Trí Thức, Kruanh Ngih dak si Chợ Rẫy, Dak Lak an n’hŭch đêt ngăn nău ntưp rlơ̆ tâm ntŭk nkual săm, nkhah êng rgum; n’hŭch nuĭh ji mbăn; Đăp mpăn săk soan, nuĭh kan bah dak si n’hanh trong rgŏ jă râng bah nsum mpôl gay rhŏ nău kan jŏ jong đah srê Covid-19:

Rnoh nuĭh ntưp hao ngăch Dak Lak an ntop n’hao tay ăp nkual săm nuĭh ji Covid-19

          “Mpôl hên dăn đă n’hao nău dơi uănh năl. Tal 2 lah đah ngăch an mĭn ntŭk săm ngih dak si rdâng săm ntop tay nklăp bah 4 tât 5 rbăn nsưng, jêh nĕ mpôl hên rgop đah Ngih dak si hăn ăp ntŭk m’hâm ƀư jêh nĕ ăp trong nkhah êng F1 m’hâm ƀư gay dêr ntưp rlơ̆ tay n’hanh geh ăp nău đă gay N’gâng kan dak si n’hanh Chính phủ n’hao rnoh vaccine gay chuh njrăng n’gang an nuĭh ƀon lan n’gor Dak Lak”.

          N’gor Dak Lak dôl ndăn ƀư ăp nău kan ăp trong gay ntơm nking n’gang n’hanh nchăng n’gang srê Covid-19 ntoh tâm ntŭk gŭ rêh. Bah meng nău ƀư tơm bah n’gâng kan ƀon lan, ăp gưl, ăp nău kan geh tât, ăp nuĭh ƀon lan an tĭng rjăp ăp trong njrăng n’gang chôt srê di đah nuih n’hâm “Ăp nuĭh ƀon lah du hê tahen” ta “ntŭk kan” nchăng n’gang srê gay ơm uănh nkân chôt srê n’hanh plơ̆  đah nău rêh “nâm ơm mhe”./.

          Nuĭh rblang: Y Sưng Phê Ja