VOV4.M’nông – Kêng măng 16/6, ta nkual ƀon têh Buôn Ma Thuột, Ủy ban MTTQ Việt Nam n’gor Dak Lak ƀư sŏk dơn ntop tay 1 rmen prăk bah ăp rmôt kan, êng nuĭh ta lam n’gor Dak Lak kơl prăk nkrem rwăt vaccine n’hanh ndơ dak si njrăng n’gang srê Covid-19. Tĭng nĕ, ntoh măt UBND nkual ƀon têh Buôn Ma Thuột lĕ an rnoh prăk 500 rkeh prăk; Công ty Điện lực Dak Lak an rlău 355 rkeh prăk; du đêt doanh nghiệp ta nkual ƀon têh Buôn Ma Thuột an rnoh prăk bơi 200 rkeh prăk.... Dĭng lĕ rnoh prăk ma Ủy ban MTTQ Việt Nam n’gor Dak Lak sŏk dơn kêng măng aơ lah 1 rmen prăk. Jêh rnôk sŏk dơn, Ủy ban MTTQ Việt Nam n’gor Dak Lak lĕ njuăl lĕ rngôch an tơm prăk nkrem rwăt vaccine ngih dak rhŏ an trok rwăt vaccine n’hanh ndơ dak si njrăng n’gang srê Covid-19.

Ntoh măt Công ty Điện lực Dak Lak an 355 rkeh prăk an ntoh măt Ủy ban MTTQ Việt Nam n’gor Dak Lak

Kơt nĕ, kơp tât rnôk aơ jêh rlău du pơh rƀŏng tĭng nău kuăl jă Ủy ban MTTQ Việt Nam mpeh nău rgop prăk rwăt vaccine n’hanh ndơ dak si njrăng n’gang srê Covid-19, lĕ geh âk rmôt kan, êng nuĭh ta Dak Lak kơl rnoh prăk hao tât bơi 7 rmen prăk.

Nŭih rblang: Y Sưng Phê Ja