VOV4.M’nông: Ndrel đah âk nkuăl bah lam dak, srê Covid-19 dôl ma khuch ngăn tât nau rêh jêng, văng sa bah n’gor Dak Lak. Gay rdâng ma srê, n’hao nau ê nkra, tăch rgâl kŏ kơt lah nau kan, lĕ ƀon lan, ntŭk kan ndrel n’gâng kan bah n’gor dôl ntrŭt dăng nau rdâng dŏng đah nau kan mhe, rƀŏng tât nau kan mrô. Kan ntrŭnh rgâl ntơm geh ƀư leo snĭt nau geh ueh tĭng di nuih n’hâm ƀư 2 ntil kan, nkre njrăng rdâng srê ndrel hun hao văng sa rêh jêng.

            Công ty TNHH Nchuăn rdeng năch An Phước lah ngoai tâm ăp ntŭk kan nchuen rdeng têh ngăn tâm nkuăl ƀon têh Buôn Ma Thuột, đah nklăp 80 bôk ndeh rdeng ndơ, rdeng ndơ tuch tăm hăn ăp n’gor ndrel tăch luh dak ba dih. Wa Phạm Đông Thanh, Giám đốc Công ty ân gĭt, srê Covid-19 geh ntơm bôk năm 2020 tât rnôk aơ lơh khuch ngăn tât nau kan bah công ty. Ăp năm ê geh srê, tâm di năm nchuăn rdeng geh 300 rbăn tấn ndơ tuch tăm, yơn rnôk aơ n’huch ri mô hôm geh 205, nau văng sa n’huch đŏng. Gay dơi rdâng ma srê, Công ty hŏ nchrăp ntrŭt dăng nau dŏng nau kan mbơh ngơi gay ma joi nŭih kan nsum, ƀư nau kan, ký nau ton lan, nkre rđau nau kan săk tam lơh:

            ‘Ntrơn rgâl mrô lah ntrong kan ueh khlay ngăn gay n’hao nau săk tam bah nau kan ê nkra, tăch rgâl bah rmôt kan, ngăn lah tâm rnôk geh srê kơt rnôk aơ, Đah rmôt kanm ăp hợp đồng mô lah ăp nau kan êng đah năch ri ân njoăl bah Email, mô lah ăp hoá đơn, săm ƀŭt kŏ geh ƀư bah email. Prăk ri njoăl bah tỏng Internet Banking. Kơp n’ăp ma nau rđau kan ri dŏng tâm Internet, kơt lah ăp mạng xã hội mô lah phần mền êng ân ntŭk kan, bah ăp nau kan nê gay ƀư n’huch bah tâm mâp”.

            Wa Lương văn Minh, Groi Kruanh rmôt kan tăch rgâl bah n’gor Dak Lak mbơh, lam n’gor geh bơi tât 18 rbăn ntŭk kan. Srê Covid-19 hŏ khuch ngăn tât nau kan bah ăp rmôt kan ndrel kơt dŏng nau kan nkoch mhe, ntrơn rgâl mrô geh uănh lah trong hăn nchâp gay ăp ntŭk kan geh dơi rêh, hun hao tâm rnôk aơ. Âk ntŭk kan tâm n’gor kŏ nchrăp rgâl mhe ndrel ntơm geh nau dơi. Mpeh mrôt kan kŏ dôl ma nsôih ndâk ntŭk kan tâm nthoi mrô bah ntŭk kan gay kơl an ân ăp nŭih:

            ‘Rmôt kan tăch rgâl bah n’gor kŏ dôl tâm mâp ƀư nau ndâk Ntŭk kan tâm nthoi ntrơn rgâl bah ntŭk kan. Trong hăn dăch tât mra ân geh ƀư nau nthoi ndrel ntrơn rgâl mro ân rmôt kan. Bah nê, ăp rmôt kan tăch ndơ bah mạng Online, jêh ri nau kan tăch rgâl bah ntŭk kan tâm rnôk geh srê ji kơt aơ”

            Hăn nsum ma ƀon lan, ntŭk kan tăch rgâl tâm nau geh bah srê hôm geh nau tât khuch, jêr, ăp gưl kan, ntŭk kan bah n’gor Dak Lak kŏ dôl ma ntrŭt dăng ngăch nau ƀư ăp nau kan kơt tĭng nau kan mbơh, mrô mhe. Wa Ngô Việt Hồng, Groi N’gâng kan soay bah Dak Lak mbơh, ăp nau tă geh bôk năp geh nau snôih ngăn. Rnôk aơ, 100% ntŭk kan tăch rgâl bah nkuăl ntrŭnh nau đăng kí kơp uănh ndrel soay điện tử. N’gor dôl ma ntrŭt dăng nau sŏk soay, tơm prăk tâm nau tăch neh, ndeh, ô tô bah trong điện tử:

            ‘Bah nau ƀư ăp nau kan tăch rgâl bah điện tử, mbơh ân kloh rah vah tâm ăp ntŭk nkoch mbơh nau, ri nkre njrăng rdâng ân srê ân geh săk rnglay, n’huch nau khuch ân nŭih ndŏ soay ndrel cán bộ soay. Tal 2, mpeh nau jŏ jong, nau kan mbơh ân kloh rah vah mpeh rnoh soay, rnoh ndŏ, du nau rêh điện tử kơt ri ri ngăn lah nơm ƀư ân ueh nau kan lon’.

            Wa Nguyễn Tuấn Hà, Groi Kruanh UBND n’gor Dak Lak mbơh, tâm rnôk srê ji tât jêr, nau kan ntrơn rgâl mrô geh nkuăl lah nau kan ndal. Khay 3/2021, n’gor Dak Lak hŏ nchră nau ntrŭnh ân rjăp mpeh nau ntrơn rgâl mrô n’gor Dak Lak lvang năm 2021-2025, trong rƀŏng tât năm 20230. Tâm nê, bah năp măt, n’gor mra dŏng nklăp 300 rmen ntuh kơl ân nau kan ntrơn rgâl mrô, nsôih njêng nhoat dăng rjăp ân nau hun hao văng sa, rêh jêng tâm nkuăl:

            ‘Kơp năl ntrơn rgâl mrô geh nau kan ƀư nau dơi bah nau kan cách mạng công nghiệp tal 4, lah nau gay ma Dak Lak tĭng ân hăn, hăn nsum ndrel mra dơi hao jêng mpeh nau kơt tĭng khoa học công nghệ tâm ăp ding bah nau rêh jêng. Rđau kan n’gor uỷ, UBND n’gor nsôih săch luh nau săhc ntrơn rgâl mrô gay ma rgâl ân rgum ăp nau kan gay ma mât ăp diong nau kan văng sa rêh jêng bah n’gor”.

            Srê Covid-19 dôl ma geh khuch ngăn tât ăp ding bah nau rêh. Nau kan kơt tĭng nau kan mhe mhe, rƀŏng tât geh ntrơn rgâl lah nau kan tơm ndrel n’gor Dak Lak dôl ân saơ nau nchrăp, nsôih ƀư nau kan bah nơm gay nchrăp nau ƀư ân ueh nau kan 2 ntil kan, nkre njrăng rdâng srê săk tam ndrel hun hao văng sa rêh jêng./.

Nŭih rblang: H’Thi