VOV4.Mnông- Gay ma ntrŭt đă nău kan “Kon hoc 3 nău kan ueh” n’hanh mĭn kan mom tâm ngih nti THPT, n’gor Dak Lak lĕ mbơh ƀư nău kan “Ngih jay kon hoc 3 nău ueh n’hanh ntŭk mĭn kan an kon hoc” ta du đê̆ ngih nti THPT. Ntŭk kan mhe aơ geh knơm mbra jêng ntŭk tâm nđŭr, tâm mâp đah kon hoc n’hanh nai nti gay ma ntrôl tay lơn nău kan mĭn kan tâm kon hoc.

Bâh năm nti aơ, ngih nti THPT Trần Phú lĕ ndơ̆ lăp dŏng “ntŭk mĭn kan mom” bâh ngih nti. Aơ lah nău kan geh Đoàn n’gor Đak Lăk kơl an mbơh ƀư đah rnoh prăk kan klâp ma 50 rkeh prăk, dŏng ntŭk rƀŭn rgum bâh nai nti geh nkra mhe, ƀư an ueh tay jêng ntŭk hvi aih, geh tủ săm ƀŭt uănh răk đah ăp ndrôm săm ƀŭt mpeh mĭn uănh khoa học, ntĭm nti chính trị, lí luận, ntơm njêng nău kan, pla n’hơ ăp ntil nău nchrăp kan, nău mĭn kan bâh kon hoc lĕ geh giải tâm ăp rơh tâm rlong. Vàng Ngọc Đan, kon hoc nti jrô 12A1 an gĭt, lôch geh giải ngoăy ta năm e nơh, năm aơ Đan ndrel đah rmôt kan bâh nơm geh ƀư tay nău nchrăp tâm rlong mĭn kan khoa học kĩ thuật gâl n’gor. Tâm nău geh rơh gŭ nkhah tâm ƀah êng tĭng ăp nău ntrŭnh njrăng rdâng Covid-19, ntŭk mĭn rklă kan mom bâh ngih nti lĕ jêng ntŭk tâm di gay ma rmôt răk uănh tay săm ƀŭt kơt kan, tâm mbơh mpeh ăp bôk nău kan.

        “Rnôk ma hên nti trực tuyến rĭ geh mâp âk nău jêr jŏt rnôk tâm mbơh nău kan đah nai nti. Ba kơi tay lôch nuh srê nă dơi oi rĭ hên mbra geh tâm mâp đah nai nti, mbra geh dŏng nău rklă kan aơ gay ma hên dơi geh tâm mâp đah nai nti dơh nơih lơn gay ma dơi geh âk nău kan mhe”.

        Nô Trần Minh Tú, Bí thư đoàn ngih nti THPT Trần Phú an gĭt, aơ lah ntŭk ntêm an kon hoc n’hanh nai nti gay ma tâm mbơh nău kan, mĭn uănh khoa học n’hanh rdâk njêng nău mĭn kan, ntrong kan an ăp rơh tâm rlong.

        Gay ma ntrŭt đă kon hoc mĭn rklă nău kan n’hanh tât râng mĭn uănh khoa học, ăp năm ngih nti lĕ geh rgŏ jă rơh tâm rlong mĭn kan khoa học kĩ thuật gâl ngih nti n’hanh săch ăp nău nchrăp kan ntoh lư gay ma râng tâm rlong gâl n’gor. Năm nti aơ, rơh tâm rlong lĕ geh rgŏ jă ƀư bâh khay 11 n’hanh aƀaơ dôl geh dơn ăp nău tâm rgop, nău dăn kan bâh kon hoc mbơh dăn kan. Lôch geh săch ăp nău kan, nău mĭn geh dơi tâm di rĭ mbra geh pă an nai nti ntĭm n’hanh kơl an kon hoc ƀư lôch ăp ntil ndơ gay ma râng tâm rlong.

        “Đah ntŭk rklă mĭn nău kan mom mbra geh mbơh ƀư du đê̆ nău kan gay ma ndâk nsơm nău mĭn kan an kon hoc. Bôk năp lah mpeh rơh tâm rlong mĭn kan khoa học kĩ thuật gâl n’gor. Ta meng nĕ rĭ tâm năm nti 2021-2022, n’hao nău dơi mpôl kan chi đoàn nai nti ntĭm kon hoc, mbơh nti nău tă blău kan khoa học kĩ thuật mhâm ƀư n’hahnh geh nău mbơh tơih mhâm jêng, mbra geh mbơh nti na nê̆ an geh ntil ƀư lôch ƀư dŭt ueh mbra dơi geh n’hanh nsĭt tât ntŭk mĭn kan mom aơ gay ma pla n’hơ”.

        Tĭng nău mbơh bâh nô Trần Doãn Tới, groi Bí thư đoàn n’gor, kruanh Hội sinh viên n’gor Dak Lak, tâm năm aơ, geh nău kơl an bâh Trung ương hội sinh viên Việt Nam, n’gor Dak Lak lĕ geh săch mbơh 4 nău kan  “ntŭk mĭn rklă mom n’hanh ngih jay kon hoc 3 nău kan ueh” ta 4 ngih nti THPT ta ăp nkuăl Krông bông, Krông Păk, Ea Sup n’hanh nkuăl ƀon têh Buôn Ma Thuột. Aơ lah ăp ntŭk kan ntoh lư tâm nău kan mbơh tơih nău leo kan mô lah ta ngih nti ta nkual jêr jŏt, nkual n’har bri. Ăp nău kan geh rnoh kơl an lah 50 rkeh prăk, geh 2 nkô̆ nău, tâm nĕ “Ngih kon hoc 3 nău kan ueh geh ƀư đah tôl, rpaih loih geh ntưm ba năp; năp măt geh 1 bảng têh in nău mpŏng ŭch kan bâh Kon hoc 3 nău kan ueh”, mpeh ba kơi nglah jêng 3 rgăn gay ma an săm ƀŭt, n’ha đaih mô hôm dŏng, rchok nhựa, ntô lon n’hanh geh an ta tach jâng gung ngih nti. “Ntŭm mĭn rklă kan mom” geh ntŭk gay ma kon hoc tâm mâp tâm nđŭr, mĭn uănh khoa học. ăp nău kan hôm nha geh kơl an 100 ndrôm săm ƀŭt ăp ntil.

Nô Trần Doãn Tới an lah,  ăp nău kan aơ mbra geh ntop tay nău nsrôih kan gay ma ăp ntŭk mbơh ƀư tay geh săk rnglăy lơn ăp nău kan mom ndăm mĭn kan n’hanh kon hoc 3 nău kan ueh tâm ngih nti, nta nău nsrôih an kon hoc tiăr nti gơih nđơr mĭn uănh khoa học, njêng nău mhe n’hanh trong kan mhe tâm nău pah kan ntĭm nti gâl nti trung học phổ thông.

 Tâm let năp tay, nău kan “Kon hoc 3 nău kan ueh” n’hanh  “Mom ndăm mĭn kan mhe” rĭ mbra geh ƀư tĭng đah ăp ntŭk mĭn kan mhe ta ăp ntŭk kan tâm lĕ rngôch ăp ngih nti THPT tâm lam n’gor. Bâh 4 ntŭk mĭn kan bôk năp aơ rĭ mpôl hên mbra geh pơk hvi nău kan n’hanh nsrôih tât dŭt năm kan ta năm 2022 mbra geh 10 ntŭk mĭn rklă nău kan tâm ăp ngih nti. Bâh nĕ mbra lah nău nsrôih, rgŏ jă gay ma tâm let năp tay ăp ntŭk kan geh nsrôih, mhâm ƀư n’hao nău dơi kan n’hanh mbơh tơih an geh săk rnglăy nău kan kon hoc 3 nău kan ueh n’hanh nău kan mom ndăm rklă kan mhe”.

Ăp năm dăch aơ, Liên hiệp ăp hội khoa học n’hanh kĩ thuật n’gor Dak Lak lĕ tâm rgop đah ntŭk kan ntĭm n’hanh nti, ntŭk kan khoa học n’hanh công nghệ geh leo ƀư mbro ăp rơh ntĭm nti an mom ndăm, kon se. Năm e nơh geh 123 nău kan, ntil ndơ bâh 264 nuĭh kan, ntŭk kan tât râng. Tâm nĕ, giải đặc biệt geh an đah nău kan  “ndơ dŏng nchoăt dêng mpeh nău veh n’hanh mbơh rnoh dŏng dak máy” bâh du hê kon hoc ta xã Dŭr Kmăn, nkuăl Krông Ana. Rơh tâm rlong lah nău kan gay ma ndâk nsơm nău dơi kan n’hanh n’hao nău mĭn kan bâh ăp oh mom ndăm, kon e jê̆ ta Dăk Lăk, kơl an ăp oh geh tay nău gĭt, tiăr nti nău gĭt blău n’hanh ntrôl an nău kan tâm rlong nti, pah kan mĭn kan mhe.

Nuĭh rblang: Thị Đoắt