VOV4.M’nông: Tĭng wa Mai Đình Phong, Groi Kruanh jrâu kan mêt uănh-Điện lực Dak Lak, tâm ăp nar rlu lễ, ntrong mêt uănh êng ân saơ rnoh điện bah ntŭk ƀư nau kan tâm Ntŭk kan công nghiệp Hoà Phú, nkuăl ƀon têh Buôn Ma Thuột dŏng âk ndal, bah nau mêt uănh, saơ ntŭk kan aơ rnglăp dŏng máy tính gay ma joi prăk ma mrô mô tâm di, dŏng điện tih nau ân dŏng. Ntŭk pah kan aơ hŏ geh bu sŏk nsĭt, mhal prăk rnpoh rlau 70 rkeh. Kŏ đah nau ƀư tih mpeh nau sŏk ntŭng dŏng điện, mhe aơ, du rmôt kan bôk năp bah Dak Lak kŏ geh bu mhal rnoh prăk tât 285 rkeh.

Kơp ntơm bôk năm tât rnôk aơ, lam n’gor Dak Lak hŏ saơ 881 tŏ tih nau dŏng điện, đah rnoh prăk mhal bơi tât 950 rkeh. Wa Mai Đình Phong mbơh, ăp nau tih dŏng điện mô tâm di công suất lăp dŏng, ntŭng điện…mra lơh khuch ân ăp nŭih dŏng, kŏ kơt lah nau nâp nâl bah lam ntrong điện:

‘ Nau ma nŭih năch dŏng điện dŏng rgâl êng nkô̆ ŭch dŏng điện, rgâl nau dăng bah điện dŏng, mra tât geh nau khuch bah nau đăp mpăn, ndrel ngăn lah tâm n’gor hŏ geh nau ƀư tât khĭt nŭih. Ri bah nê kŏ đă nŭih năch dŏng, tâm rnôk dŏng điện ri ân geh kơt tĭng nau ntrŭnh mbơh đă, rnôk geh nau ŭch ƀư pơk hvi nau kan ri ân geh mbơh ma ntŭk ƀư kan điện, bar ding ân geh tâm nchră, tâm ban nau, gay đăp mpăn ân nau dŏng điện ueh ndrel săk nâp tĭng di nau ntrŭnh bah pháp luật”./.

Nŭih rblang: H’Thi