VOV4.M’nông: Tâm ăp nar rlau aơ, n’gor Dak Lak mâp đah cử tri đah ăp nŭih ŭch geh lăp kan ntơh măt HDND n’gor gưl X, năm kan 2021-2026 tâm ăp mrôt săch kan tâm n’gor.

            Tâm ăp ntŭk mâp, jêh geh djăt ăp nau mbơh mpeh nŭih ân geh săch ndrel nchrăp bôk nau kan bah ăp nŭih rnôk geh săch lăp kan ngăn bah ntơh măt HĐND n’gor gưl 10, năm kan 2021-2026, ăp cử tri hŏ ntoh nau ôp mpeh nau mbơh bah ăp nŭih kan ân geh săch, tâm nchră sŏng, ƀon lan ƀư tơm ăp nau kan ma bar ding geh uănh khlay.

            Tâm nau nchrăp bôk nau kan, ăp nŭih hŏ nsing tâm nau kan rnôk aơ gay ma ntoh ăp ntrong kan, nau ƀư pah kan lah geh săch lăp pah kan HĐND n’gor, gay ma rgop nau hun hao văng sa, rêh jêng, ƀư ân ueh ndrel n’hao nau dơi mêt uănh bah HĐND, mât nau dơi ueh ngăn bah ƀon lan.

            Tâm ăp rnôk tâm mâp, tĭng cử tri mbơh, ăp nkô̆ nau kan bah ăp nŭih ân geh săch rgum ndrel ntoh nau dơi nau kan bah nŭih ntoh măt ân nau dơi bah ƀon lan. Yơn lah, du đê̆ nkô̆ nau kan hôm geh nau nsum nsum, ê geh lăp tâm nau tơm, ê geh ndŏ luh nau kan ngăn tâm nau rklaih ăp nau kan hôm kol, nau ê dơi dôl geh tâm du đê̆ nau kan, ntŭk kan. Cử tri Nguyễn Quyền, ta Phường Tân Thành, nkuăl ƀon têh Buôn Ma Thuột mbơh nau:

             ‘ Ăp bôk nau pah kan bah ăp nŭih mhâm ƀư ân lăp tâm nau kan ngăn, ngơi ri ân geh nsum ma nau kan. Yơn mô di rnôk aơ ma bôk nau kan nchih luh nkoch âk ma nau ngăn ri ê geh tâm di, ê tŏng dơi ma nau ŭch bah cử tri phung hên, Gâp ân lah, phung hên saơ nê lah nau ueh ngăn gay ƀon lan ƀư tơm gay đah ƀon lan ndrel ăp ntơh măt ân ƀon lan tâm mbơh ăp nau kan ma nơm ân geh ndâk njêng ngih dak pháp quyền nar lơn nâp, jăp ri nê lah nau ŭch bah ăp cử tri”.

            Cử tri kŏ sŏng rjăp ôp nau bah ăp nŭih mpeh nau kan geh tât nau ma nơm dôl kan, ngăn lah tâm nau geh tât gung trong, ăp ntŭk kan kơl an ƀon lan, ăp bôk nau kan geh ntrŭnh, ntuh kơl ndrel ƀư ân jêh yơn ê dơi geh dŏng săk tam, mô leo nsĭt nau săk rnglay ân ƀon lan. Cử tri đă ăp nŭih ŭch geh lăp kan lah geh dơi tâm năm kan tât ri gay ân geh djăt nau rgop mbơh bah ƀon lan, ngăn lah tâm rnôk mâp ma nŭih ƀon lan, ndrel ntrŭnh nau ƀư ngăn đah nau kan bah nơm, mô dơi knŭng nsrŭng tâm nau mbơh ton dơm dak.

            Bah nau tâm nchră, ăp nŭih lah rjăp mra mro tâm dăch, djăt nau rgop bah cử tri gay ma lŏ rđau rklaih mô lah mbơh nkoch tât ăp ntŭk kan geh nau dơi gay ma rklaih ăp nau ŭch ngăn bah ƀon lan, ƀư ueh nau kan bah nŭih ntoh măt ƀon lan. Ăp nau rgop bah cử tri mra lah nkô̆ nau khlay gay ăp nŭih lŏ ƀư ân jêh bôk nau kan bah nơm tâm rnôk săch kan kŏ kơt lah jêh rnôk jêng ntoh măt HĐND n’gor gưl kan mhe. Wa Vi Thị Kiều Chi, tâm rmôt kan săch mrô 1, nkuăl ƀon têh Buôn Ma Thuột, mbơh:

             ‘Jêh geh djăt nau mbơh rgop bah cử tri ri săk gâp kŏ saơ ân geh chiăr ti, ƀư ueh nau kan bah săk nơm gay lŏ geh nau ntĭm nti, uănh jru lơn mpeh nau mĭn ndrel mât tĭng ân tâm dăch ăp nau kan kŏ kơt lah gĭt kloh nau kan bah ƀon lan, geh kơt nê mơ nau nâp nau kan, nau nâp tam bah nau kan kŏ kơt lah jêh aơ lah kơt geh nau dơi lăp kan tâm rmôt kan ntoh măt HĐND n’gor nơm mra geh nau dơi nau ma nsing ngăn gay ma săk nơm lŏ ƀư ân jêh nau kan bah nơm”.

            Tâm rmôt kan săch mrô 9 nkuăl Cư Kuin, ăp nŭih ŭch geh săch lăp hŏ tâm mâp ma rlau 150 nŭih cử tri ntoh măt ân ăp xã Cư Êwi ndrel Ea Hu. Bôk nau kan bah ăp nŭih rgum nchră tâm nau dôl geh bah nkuăl gay ma ndŏ luh ăp nau kan ƀư tĭng kơt nau dăng tâm nau hun hao văng sa du trong nâp tam ndrel nâp nâl, tâm nê rgum tâm nau kan ndâk tâm nkuăl kơt tĭng nau kan mhe, ƀư ueh nau dơi geh jêng ơm bah ăp xã gay ma ndâk ân ăp ntil ndơ ntoh lư tĭng bôk nau kan “Du xã du ntil ndơ”, nsôih ndâk njêng ƀon lan mhe, ƀư ueh nau kan kơl an tâm nau rêh jêng, ngăn lah nau kan jut n’huch ach o, ji ngot; mât rnă njrăng chính trị, đăp mpăn nau rêh jêng tâm nkuăl.

            Rơh tâm nchră kơp dơn geh 17 tŏ nŭih ntoh nau đah rlau 30 nau mbơh, đă. Tâm nê, cử tri ŭch ăp nŭih lah geh nau dơi săch lăp pah kan ri ân geh ƀư ueh nau kan bah nơm, n’hao nau dơi bah nơm lah nŭih ntoh măt ân HĐND tâm nau kan kơl nchră ndâk ăp nau kan ân geh săk tam, tâm ban đah nau dôl geh bah nkuăl, ƀư nau kan ngơi hăn nsum ma nau kan ngăn, mât kơl an ân ueh ân nau rêh bah ƀon lan, nsôih ân ƀư ân dơi nau geh jêng, leo nkuăl Cư kuin jêng du nkuăl geh nau dơi ngăn bah n’gor. Rơh tâm nchră pơk trong gay cử tri geh mâp ndrel gĭt kloh lơn đah nŭih ŭch lăp kan, tă bah nê gay ma nkah, săch luh ăp nŭih tŏng nau dơi gay ma ƀư ntoh măt HĐND n’gor Dak Lak gưl X, năm kan 2021-2026./.

                        Nŭih rblang: H’Thi