VOV4.M'nông: Ôi 26/11, Công ty Điện lực Dak Lak kan nsum đah UBND nkuâl Ea Kar ƀư pă an ndrôk kơl rnăk ach o ta buôn M’briu xã Cư Huê mât rong hun hao wăng sa rlău dơi jêr jŏt bah nuh srê.

        Buôn M’briu, xã Cư Huê, nkuâl Ea Kar, n'gor Dak Lak geh 268 rnăk, đah rlău 1.300 nuĭh, lĕ rngôch lah nuĭh Rđe. Ăp năm rlău aơ, nơm geh nău mât uănh ntuh kơl bah Ngih dak, nău ntop kơl bah nhih pah kan tâm njêng ma nău rêh bah nuĭh ƀon lan dơi n'hao geh, rnoh rnăk ach o hôm ta nâm 5%.

  Rơh pă an ndrôk nar aơ, bar rnăk ta buôn M’Briu dơi dơn bar mblâm ndrôk me đah rnoh khlay 20.000.000 prăk. Wa Y Don M’lô ta buôn M’briu rhơn rngot nkoch:

        “Rnăk gâp mpeh săk ach o ta buôn M’briu, nuh srê jêr jŏt mô dơi hăn kan, nău rêh krit jêr ngăn. Dơi pă an ndrôk rnăk wâl rhơn mƀak ngăn. Bar pe nar bah năp nơh nuĭh mpeh chi nhánh điện lực Ea Kar jŭr mbơh rnăk wâl dơi pă an ndrôk jêng hŏ ƀư ndrung n'gar n'hanh dăn găr pih ntil sĭt tăm hôm. Nar aơ dơn geh ndrôk mbra nsrôih mât chăm gay deh kon, jêh aơ tay geh tay prăk tăch ndrôk".

        Ndrel đah nău pă an ndrôk an ăp rnăk ach o, Công ty Điện lực Dak Lak hôm ƀư chop khâl, rgŏ jă n'hanh pă nklâm ndơ rnăk wâl dơi kơl, pă an bok put mbung dak si, dak si puh nkhĭt kaman n'hanh nkoch trêng tât nuĭh ƀon lan buôn M’briu, xã Cư Huê, n'hao nău gĭt êng njrăng, n'gang nuh srê Covid -19./.

Nuĭh rblang: Điểu Thân