VOV4.M’nông: Ăp n’gor tâm Tây Nguyên lah nsum ndrel Dak Lak lah êng hŏ tât tâm yan mih. Yơn lah, xã Ea Siên, nkuăl têh Buôn Hồ, n’gor Dak Lak hôm ê geh mih, ntŭk n’gar dak kro suăt ƀư bơi tât 2000 ha tơm tăm geh khuch ndrel rlau 1.400 rnăk nŭih mô tŏng dak dŏng.

Mir cà phê hvi rlau du ha dôl tâm rnôk klih play bah rnăk wa Hứa Văn Quân, tâm xã Ea Siên, nkuăl têh Buôn Hồ dôl ma rdâng đah kro phang hô. Tơm cà phê dôl ma tâm rnôk rong play ri nklăp lah ân ndrih ueh, yơn tơm ri lŏ kro, play nse bơi ma rŭng. Wa Hứa Văn Quân mbơh, lah tâm bar pe nar tât ma mô geh mih, mir tơm mô geh tŏ dak, ri nau roh dơm lah nau mra tât dơm:

‘Rnôk aơ, kơt ăp năm bah năp nê mô geh kro phang ri tơm cà phê play têh lơn ngăn, yơn lah bri prăng ri ma tơm mô dơi hun hao ôh, ƀư jêng play jê̆ lơn rđil ăp năm, Nau khuch prăng bri ƀư tơm cà phê kro ranh, play nse rŭng âk, mô lah geh ntŭk tơm lĕ khĭt”

Tâm kơt ma nê, mir cà phê tăm nsum ma mbo hvi 1,4 ha bah rnăk wa Siu H’Niê, thôn 2B, nkuăl têh Buôn Hồ kŏ dôl ma rdâng đah nau kro phang jâk. Wa Siu H’Niê nkoch, năm e rnoh aơ ân geh rlau 4 tấn cà phê rnglay, 5 tấn mbo, yơn năm aơ kro phang ƀư tơm tăm kro phang, mbo, cà phê khĭt. Nua geh bah rnăk wa Siu H’Niê knŭng nsing tâm 1,4 ha neh aơ, yơn lah geh prăng bri ƀư kro hêng:

‘Bri duh nar kơt aơ ri mbo khĭt lĕ kro lĕ hôm, năm e ri hên geh 20 rkeh ri năm aơ doh dơm, hôm cà phê kŏ dôl ma kro n’ha, rŭng play. Dak nglay ri suăt kro lĕ hôm. Lah bar pe nar đŏng mô geh mih ri mra roh âk dơm. Nua khuch prăng bri lơh khuch hô ngăn”.

Tĭng nau kơp bah UBND xã Ea Siên ân saơ, yan mih năm 2021, lam xã geh bơi tât 2000 ha tơm tăm ăp ntil, tâm nê geh 1.500 ha tơm tăm jŏ năm lah cà phê, tiêu, mắc ca, nhãn, hôm e lah rlau 5000 ha lah tơm gleh nar, geh: ba, mbo, tuh ndrel ma rmĭt.

Tĭng wa Nguyễn Quốc Cường-Kruanh UBND xã Ea Siên, nau kro phang tâm lam xã geh tâm âk ngăn, ngăn lah tâm yan vai. Yơn lah, nau prăng bri geh nkra tâm yan mih kơt aơ lah mô mâp gẹh. Wa Cường nkoch, yor nau geh lah tơm dak mô geh, dak kơl tuch tăm ndrel rêh jêng ngăn lah tă bah nglau dak Ea Mích, Ea Blang ndrel ăp nglau hoch, jăng dak jê̆. Nau ma ê saơ mih ƀư ăp ntŭk nglau dak, jăng dak kro suăt. Rlau ma nê ăp nglau dak lah nglau Ea Mích ndrel Ea Blang âk năm ê kuih kuai nau têm dak mô geh âk kơt bôk năp ƀư jêng kro suăt lơn. Kro suăt mô êng knŭng khuch ngăn tât 2000 ha tơm tăm, ma hôm ƀư rlau 7.500 nŭih tâm xã mô tŏng dak dŏng:

‘Prăng bri geh tâm xã lơh khuch ngăn tât nau kan tŏ dak ân tơm tăm ndrel nau rêh jêng. Mpeh dak dŏng ri UBND xã đă tât nkuăl têh Buôn Hồ ndâk ntŭk n’gar dak rgum pom tă bah nglau Krông Búk Hạ tât trạm ta thôn 2A gay ma rklaih dak dŏng ân ƀon lan tâm ăp thôn, leo tŏ ân tơm tăm ri xã kŏ mbơh ăp nau kan kuih kuai, ê nkra ân nâp 2 ngloau dak Ea Mích ndrel Ea Blang mô lah ân ndâk nkra tay ăp nglau hoch dak êng gay ma kơl an nau tŏ dak tâm nkuăl”.

Nau khuch bah prăng bri tâm nklang yan mih ntoh ngăn bri mih, nar mô ueh, lơh ma lơh khuch ngăn tâm Tây Nguyên./.

Nŭih rblang: H’Thi