VOV4.Mnông – Jêh rnôk ăp nuĭh F1 geh 3 tơ̆ uănh năl mham mô ntưp đah Kaman Sars-CoV-2, rlău 140 nuĭh ƀon lan tâm nkual nchăng n’gang an gĭt jêh 2 rơh uănh năl mham mô ntưp, pơh bah năp, UBND n’gor Dak Lak lĕ an rơih jăng nchăng n’gang đah nkual ƀon lan gŭ ta hẻm 189/1 trong Mai Hắc Đế, phường Tân Thành, nkual ƀon têh Buôn Ma Thuột, n’gor Dak Lak-ntŭk kơp dơn 2 nuĭh ji Covid-19. Răm rhơn yor lĕ rơih jăng nchăng n’gang yơn, nuĭh ƀon lan mô dơi thơ tha, mô njrăng đah trong kan njrăng n’gang srê Covid-19.

          Lor rnôk rơih jăng nchrăng n’gang, ăp cán bộ dak si tâm kho ao n’gut lĕ puh rao kaman n’glĕ  dŭt ta nkual ƀon lan gŭ hẻm 189/1 trong Mai Hắc Đế, phường Tân Thành, nkual ƀon têh Buôn Ma Thuột-ntŭk kơp dơn 2 nuĭh ji Covid-19. Jêh nĕ, ăp n’gar nking, ntŭk kâp dơi rơih jăng. Kruanh UBND phường Tân Thành răk nău ntrŭnh an rơih jăng nchăng n’gang n’hanh an sam ƀŭt kơp dơn lĕ jêh nar tâm nkhah đah rlău 100 nuĭh ƀon lan. Dơn sam ƀŭt kơp dơn, wa Bùi Trung Khánh an gĭt:

Rmôt kan dơi kan rơih jăng rse nchăng n’gang

          “Mpôl hên saơ dŭt rhơn, răm m’ak, yor tâm nar bah năp lĕ ƀư uĕh nău ntrŭnh bah ngih dak, bah chính phủ mpeh nkhah êng dak si, tĭng rjăp ăp nău ntrŭnh bah ƀon lan. Tâm nar tât mpôl hên nkhah êng tay jay n’hanh uănh nđôi săk soan ntop tay 7 nar, rnôk nĕ lah săk soan đăp mpăn ri mbra hăn kan nâm ơm”.

          Lor rnôk, tâm măng 8/5, kơp dơn 1 hê ntưp Covid-19 ta hẻm 189/1 trong Mai Hắc Đế lah nuĭh ji mrô 3237. Tâm măng 8/5 dâl, n’gor Dak Lak lĕ an  nchăng n’gang, nkhah êng ƀon lan ta hẻm aơ đah 47 rnăk,  144 nuĭh. Tâm rnôk nchăng n’gang, nău kan dak si lĕ sŏk uănh năl mham 2 tơ̆ an lĕ rngôch rnăk ƀon lan ta aơ, an saơ mô ntưp đah Sars-CoV-2. Wa Lê Thị Ngọc Hương ta hẻm 189/1 trong Mai Hắc Đế, phường Tân Thành, nkual ƀon têh Buôn Ma Thuột nkoch:

          “Jêh bơi 20 nar saơ rngot ngăn n’hanh mpŏng mô geh nuĭh tâm aơ kơt nău nĕ tay. Bôl bơi 20 nar gŭ tâm nkual nkhah êng dŭt lah ji nuih, yơn uănh nđôi nsum saơ ăp nuĭh tâm ban nuih n’hâm, mpŏng nuh srê ngăch bah, gay nuh srê mô hôm lăp tâm nkual ƀon lan gŭ kơt aơ tay”.

          Nkual ƀon lan gŭ geh nchăng n’gang ta hẻm 189/1, trong Mai Hắc Đế, phường Tân Thành, nkual ƀon têh Buôn Ma Thuột geh 47 rnăk đah rlău 140 nuĭh, tâm nĕ geh 20 rnăk gŭ jay manh, lah nuĭh pah kan dah rŏng. Tâm rnôk nkhah êng nkual ƀon lan gŭ, ndrel đah nău tâm pă rmôt kâp njrăng gay đăp mpăn rnă njrăng, đăp mpăn njrăng n’gang srê, n’gâng kan ƀon lan lĕ kuăl jă ăp nuĭh ntop kơl ndơ sông sa n’hanh ndơ dŏng gay đăp mpăn nău rêh an nuĭh ƀon lan. Tĭng nĕ, lĕ geh 50 rkeh; rlău 5 tấn biăp bum, play; bơi 15 tấn phe; rhiăng thùng mì tôm n’hanh âk ndơ sa ăp ntil lĕ dơi ăp nuĭh lŏng bôk tôr an ăp ntŭk ƀon lan ntŭk aơ.

          Wa Trần Thị Dinh, Groi Kruanh UBND phường Tân Thành, nkual ƀon têh Buôn Ma Thuột, n’gor Dak Lak an gĭt: tâm nar tât, cán bộ lĕ rơih jăng, ƀon lan geh tay trong groi nđôi, uănh nđôi săk soan ăp nuĭh tâm nkual ƀon lan ntŭk aơ gay ơm mkra lah geh nu nău ntoh tay.

          “Jêh rnôk rơih jăng nchăng n’gang ri mpôl ntĭm rđău njrăng n’gang srê Covid-19 bah phường groi nđôi, nkoch trêng an kônh wa ƀư tĭng uĕh tay trong kan njrăng n’gang srê Covid-19 aƀaơ. Kônh wa geh siăk, duh săk, ji bôk ri kônh wa ôp đah ngih dak si phường Tân Thành gay geh trong ntĭm na nê̆”.

Nuĭh ƀon lan tâm nkual nchăng n’gang răm rhơn dơn sam ƀŭt kơp dơn lĕ jêh nar nkhah êng

          Tĭng nai dak si Nguyễn Trung Thành, Groi kruanh n’gâng kan dak si, nău kan dak si aƀaơ lĕ rgŏ jă ăp nuĭh rmôt kan râng njrăng n’gang srê Covid-19, tâm nĕ dak si xă, phường, nkuăl têh ta n’gor rgop dŭt têh an lôch uĕh uănh nđôi srê. Lah ntŭk bôk năp n’hanh ntŭk kan dak si dăch ƀon lan ngăn jêng trong kan dak sit a ntŭk-ngih dak si xă, phường, nkuăl têh geh nău kan khlay tâm njrăng n’gang srê Covid-19

          Tâm nar bah năp, rnôk ta n’gor Dak Lak kơp dơn 3 nuĭh ntưp đah Covid-19, ăp ngih dak si xă, phường, nkuăl têh pă rmôt kan kâp njrăng măng nar gay rdâng đah ăp nu nău srê lah geh. Nkre, n’hao uănh nđôi săk soan bah nuĭh ƀon lan ta ntŭk, saơ ngăch ăp nuĭh duh săk, siăk, jêr nsôr gay but uăh săk soan n’hanh mkra ngăch lah geh ntôn nuĭh ntưp Covid-19; nsrôih tâm ôp tâm nchră an mpôl ntĭm rđau njrăng n’gang srê ta ntŭk tâm rgop đah ăp ntŭk kan puh dak si kaman, ntĭm ăp rnăk, nkual ƀon lan gŭ răk rao ngih wâl, mbơh săk soan an nai dak si; mât uănh rjăp ăp nuĭh hăn sĭt bah nkual srê gay ơm ƀư tĭng nău ntrŭnh nkhah êng rgum, nkhah ta jay n’hanh đă cán bộ dak si uănh nđôi, uănh nđôi săk soan ăp nar đah nuĭh ƀon lan geh nkhah êng. Êp tât, N’gâng kan dak si Dak Lak mbra ndâk njêng mpô uănh nđôi n’hanh ƀư uănh nđôi ndal ăp ngih dak si gay nkra rgâl, nkah ntĭnh kơt ntĭm ăp ntŭk kan ƀư uĕh trong kan njrăng n’gang srê ta ntŭk./.

Nŭih rblang: Y Sưng Phê Ja