VOV4.M’nông: Tĭng nau kơp bah Sở Lao động-Thương binh ndrel Xã hội n’gor Dak Lak, ntơm bôk năm tât nrôk aơ tâm nkuăl geh 31 tŏ rmok dak ƀư 39 nŭih kon se khĭt, âk rlau 2 tŏ rđil rơh aơ năm e. Rnoh aơ lah nau geh nkah lah ngăn mpeh nau kan mât njrăng kon se tâm rnôk yan mih mhe ntơm. Mhâm ƀư ân n’huch ăp nau rmok dak tâm kon se lah nau kan jêr ân geh nau nsum ty bah lam nau rêh.

Nkah tay ăp nar hŏ ƀư khân păng roh ngăn kon bu klô mpŭt bah nơm, yuh H’Bren Êban, ta ƀon Êmăp, nkuăl têh Ea Pôk, nkuăl Cư Mgar, n’gor Dak Lak mô hôm dơi nkân dak măt. Yuh nkoch, kon yuh ri păng pâl hô ngăn, ri ma ăp rnôk lah moh nau kan ri yuh kŏ leo kon hăn ndrel njrăng păng. Yơn lah, ôi lơ 9/6, yor geh nau kan gay ma rklaih ndal ri yuh ân kon nơm tĭng bŏ păng hăn tâm lŏ ngai ma ngih nklăp 300m. Ndri ma, knŭng du mlât mô năn uănh, kon yuh hŏ nchuăt hăn tât êp nglau dak mhe kuih tâm êp lŏ pâl êng, jêh ri rlât jâng tŭp tâm nglau. Rnôk saơ, sai yuh hŏ kdăt kơl kon, yơn lĕ lăn hôm:

  ‘Lah dơi rvăt nau rêh ân kon gâp ma rmen prăk ri gâp kŏ nsôih ma tăch ndeh ntu gay ma rvăt nau rêh ân kon gâp. Gâp knŭng ŭch âk kon gâp geh dâk rêh tay”.

Khĭt kon tâm rnôk rmok dak nê nơh, hôm geh n’ăp ma kon se bu klô 12 năm, kon nô Y Dro Niê-tâm ƀon Êmăp đŏng. Nô Y Dro Niê nkoch, 2 yan mih mhe aơ, jêh rnôk kơl me mbŏ ƀư lŏ, kon se nê rlu ti, jêh ri hăn pâl êng êp nê. Ntôn lah kon nơm blau re, nkre ma blau nau trong hăn kan lŏ mir ri nô Y Dro Niê mô nkah kon nơm. Mô gĭt ôh lah, nê lah nar dăch dŭt ma kon păng hăn pah kan nsum ma păng:

  ‘Rnôk nê nklăp 10h dĭng nar ri gâp ƀĭt ndeh công nông, păng ri hăn thay du mbok lŏ, jêh ri păng lah păng rgănh ri rnok nê gâp ân păng rlu, ma gâp joi mô hôm saơ, gâp ntôn lan păng yur tâm ntu ŭm, mô gĭt ôh lah hăn ndơm ndal ndŭng đah ri ngăn. Lôch sông mô saơ kon, ri gâp hăn ôp bu đah ri, ri gâp saơ tâm ntŭk dak nê geh ngăn 2 mlâm môk nthông”.

Tĭng nau kơp bah Sở Lao động thương binh ndrel xã hội n’gor Dak Lak, ntơm bôk năm tât rnôk aơ, tâm n’gor geh 31 tŏ rmok dak đah 39 nŭih kon se khĭt, âk rlau 2 tŏ rđil rơh aơ năm 2020. Rnoh nŭih rmok dak tâm kon se tâm 13/15 nkuăl, nkuăl têh, nkuăl ƀon têh bah Dak Lak. Krông Bông lah nkuăl geh kon se khĭt rmok dak âk ngăn, đah 8 nŭih. Bah kơi Krông Bông lah nkuăl Cư Mgar đah 6 nŭih. Tĭng wa Nguyễn Thị Thu Ba, Groi Kruanh jrâu kan Lao động, Thương binh ndrel xã hội nkuăl Cư Mgar, âk ngăn kon se rmok dak lah nkuăl jru, nkuăl ngai jêr jŏt mô geh gĭt ma nau re dak, nau ntĭm nti njrăng, rdâng rmok dak. Êng nê, Dak Lak geh nglau dak, dak jăng, dak hoch geh âk ngăn ndrel tâm âk ntŭk, geh rnoh n’gâr dak, nglau dak tŏ tơm tăm bah ăp ntŭk mât njrăng bri, ăp rnăk vâl tăm cà phê dŭt âk…ƀư nau khuch bah nau mrok dak lơn ma khuch n’ach.

  “Nau kan mât njrăng kơl an kon se tâm rnôk aơ ê geh rjăp ngăn ôh, ntŭk pâl m’ak ê geh âk ri ma kon se gay dơi geh rgum rƀŭn pâl ueh ma âk ngăn kơt lah pâl êng tâm ngih mô lah tĭng me mbŏ hăn luh lŏ mir lah âk lơn. Rnoh nglau dạ tâm nkuăl âk, rnoh ntu jru tâm mir tâm lŏ ri ê geh gĭt lĕ ri ma ê geh ntŭk dơi geh pâng n’gâng gay ma nkhah njrăng”.

Wa Trần Phú Hùng, Giám đốc Sở Lao động-Thương binh ndrel Xã hội n’gor Dak Lak mbơh, tâm rơh rlau aơ, UBND n’gor ndrel Rnâng kan rđau nau kan kơl an kon se n’gor Dak Lak ntrŭnh âk nau kan gay ma njrăng rdâng nau khuch rmanh ân kon se tâm nkuăl lah nsum, nau khuch yor rmok dak tâm kon se lah êng kơt geh nau ndâk ntŭk pâl n’aih ân kon se tâm ăp nkuăl, leo bôk nau kan ntĭm nti re dak tâm ăp ngih săm ƀŭt, rgum nau leo dŏng ntŭk nglau nti re dak. Wa Hùng ân lah, ăp nau kan aơ bol ma geh nau ueh đŏng tâm rnoh ăp kon se geh re dak nar lơn ma âk, yơn lah, rđil ma nau ngăn ri ê geh tŏng. Gay dơi n’huch nau rmok dak tâm kon se ri ân geh nau leo lăp kan rjaơ lơn tay bah ăp ntŭk kan kơl an, ntŭk n’gâng kan ndrel ngăn lah nau leo lăp kan bah rnăk vâl:

  ‘Phung hên n’hao nau kan nkoch trêng tâm ăp ntŭk nkoch mbiưh nau mhâm ƀư gay ăp rnăk vâl geh kon ri nơm ân geh kơl an, mât njrăng rnôk ăp kon se luh bah dih. N’hao lơn tay nau kan ntĭm mbơh, geh ăp ntŭk pâng nkah mbơh tâm ntŭk nơih geh nau khuch rmanh rnôk rmok dak ân kon se. Du ding đă lŏ mhâm ƀư gay pơk hvi tay geh nau re dak ân ăp kon se, ăp kon se geh nau blau re ri mra n’huch dơi nau kan ân kon se rmok dak. Măt êng lŏ đă ăp gưl n’gâng kan njêng pơk luh ăp ntŭk pâl ân ueh, đăp mpăn rjăp ân kon se geh nau khuch ngăn tâm ăp khay rlu nti”.

Roh ngăn kon nơm yor ăp nau tât rmanh mô kâp geh kơt lah rmok dak lah ăp nau ji mô dơi nkoch lĕ ôh bah âk rnăk vâl. Mĭn lah, gay rdâng ân săk nâp tam nau kan rmok dak tâm kon se ri ân geh nau leo ălp kan, nau snôih ngăn bah ăp gưl, ăp ntŭk kan, ăp nkuăl, tâm nê geh nau kan bah rnăk vâl, ăp nŭih me mbŏ kon se lah nau khlay ngăn./.

            Nŭih rblang: H’Thi