VOV4.M’nông: Yor khuch bah srê Covid-19, âk khay rlau aơ, ăp ntŭk kan nchuăn rdeng năch ta Dak Lak geh khuch ntơm 70-80%, mô lah geh ntŭk ri nsrŭng nau kan. Bah năp nau tât jêr kơt nê, rmôt kan nchuăn rdeng Dak Lak đă ăp ntŭk kan n’gâng kan n’huch rnoh soay, prăk rdeng mô lah têk jong tay nar trok rnon, ndŏ bảo hiểm ân nŭih pah kan gay ăp ntŭk kan dơi rlet nau jêr rnôk aơ.

            Công ty TNHH du ntŭk kan Tăch rgâl ndrel ƀư nau nchuăn rdeng năch Hải Cường, nkuăl ƀon têh Buôn Ma Thuột, geh 8 bôk ndeh nsưng bŭch nchuăt trong Đak Lak-Hà Nội, đah rlau 30 nŭih pah kan geh nŭih ƀĭt ndeh, kơl nŭih ƀĭt, kế toán, nchuăn sŏk ndơ. Wa Nguyễn Hải Cường-Giám đốc Công ty TNHH Tăch rgâl ndrel nchuăn rdeng Hải Cường mbơh, yor srê ji âk khay rlau aơ ma rnoh năch n’huch, ăp ndeh mô dơi hăn nchuăn rdeng tă bah Dak Lak hăn Hà Nội ndrel ma rlŏ ma nê ri ƀư ntŭk kan mô geh prăk. Bol ma mô geh prăk yơn lah ntŭk kan aơ hôm ndŏ ăp ntil soay, mô lah ƀư nau rgop prăk BHXH ân nŭih pah kan tĭng nau ntrŭnh. Lah mô geh kơl an năn ri ntŭk kan aơ mra mô hôm dơi pah kan:

             ‘Tâm rơh aơ ri ntŭk kan tăch rgâl bah hê hôm ntop prăk êng roh dơm 100 rkeh/khay. Rnoh prăk aơ geh prăk trok ân nŭih pah kan, manh ntŭk drâm ndeh, prăk trong hăn, prăk kon bah ngân hàng. Phung hên dăn đă đah ntŭk kan n’gâng kan kơt lah N’gâng kan gung trong, n’gâng kan soay bah n’gor, ăp Ngân hàng n’huch rnoh prăk kon, soay VAT, prăk hăn trong…Knŭng kơt nê ri mơ phung hên dơi rdâng tay rnôk geh srê gay ma geh nkân ri dơi plŏ kan tay”.

            Rmôt kan nchuăn rdeng năch Dak Lak geh 40 ntŭk kan nsum, đah bơi tât 18 rbăn ndreh rdeng năch ndrel ăp ntil êng. Wa Phạm Văn Mạnh-Kruanh mrôt kan nchuăn rdeng năch Dak Lak, yor srê Covid-19 ntoh luh plŏ tay khuch ngăn tât ăp nau kan nchuăn rdeng năch rgâl bah ăp ntŭk.

            Ngăn lah, rnoh ndeh nchuăn rdeng năch kơt lah ndreh rdeng năch, ndeh buýt, ndeh taxi kŏ geh koh gưl nau nchuăn rdeng ntơm 70-80%, tâm rnôk nê ăp ntŭk kan kŏ manh prăk tă bah ngân hàng gay ma rvăt ndeh nchuăn rdeng năch. Êng nê, ăp ntŭk kan hôm trok prăk khay ndrel kơl an prăk roh kan pah ân nŭih kan bah nơm, rgop BHXH, BHYT, prăk ndŏ ân trong hăn, prăk mât nâp trong, prăk soay ăp ntil, prăk kon ngân hàng…

            Wa Phạm Văn Mạnh mbơh, bah năp nau jêr mhe ntoh, rmôt kan hŏ ƀư săm ƀŭt mbơh đă tât ăp ntŭk n’gâng kan gay ma kơl an ăp ntŭk kan tâm rnôk geh srê Covid-19 hôm dôl geh tât khuch:

             ‘Phung hên hŏ geh nau ntrŭnh đă N’gâng kan tơm prăk ndrel soay uănh gay ma leo soay VAT đah ntŭk kan tăch rgâl gay ma n’huch jur 1-2% rđil 10% kơt nau ntrŭnh bah năp nơh, mpeh ngân hàng phung hên kŏ ŭch khân păng rgum lơi rnoh mô kâp prăk kon tâm 12 khay bah năm 2021, hôm đah nau rgop BHXH, phung hên kŏ đă Bộ Lao động-Thương binh-Xã hội geh nau rgop đah Bảo hiểm n’gor dăn mô kâp ndŏ prăk rgop bảo hiểm ân nŭih pah kan tâm du năm, mra rgop rnôk ntŭk kan pah kan nâm ơm”.

            Wa Lê Đình Minh-Groi Giám đốc N’gâng kan gung trong nchuăn rdeng n’gor Dak Lak kơp dơn, rnôk aơ n’gâng kan hŏ ndơn geh nau njoăl kuăl jă nau kơl an bah rmôt kan nchuăn rdeng bah Dak Lak. N’gâng kan kŏ rgum nkô̆ nau gay ma đă mbơh tât UBND n’gor ndrel ăp ntŭk kan geh tât ƀư nau mô kâp trok prăk ndal ân ntŭk kan, ntŭk tâm boh nau kan nchuăn rdeng tâm lam n’gor:

            ‘Rnôk aơ, tĭng nau đă bah rmôt kan nchuăn rdeng Dak Lak, UBND n’gor hŏ jao ân N’gâng kan tơm prăk, Sở Lao động Thương binh ndrel xã hội, N’gâng kan gung trong, dak si, soau n’gor, ngân hàng, bảo hiểm...rgum mĭn ntĭm nti bah Trung ương ndrel nau dơi ƀư nau kan ngăn tâm nkuăl gay joi lih nau kan kơl an ăp ntŭk kan nchuăn rdeng năch tâm rnôk nsrŭng nau kan gay ma njrăng rdâng srê Covid-19 rlet rlau nau jêr rnôk aơ. Rnôk tâm ban jêh nau ƀư kan ri ndŏ ân UBND n’gor rklaih kơl tĭng nau ntrŭnh bah pháp luật”./.

                                    Nŭih rblang: H’Thi