VOV4.M’nông -  Yan cà phê 2021-2022 nchrăp tâm yan pĕ lêh ngăn, Dak Lak ŭch hang rhiăng rbăn nuĭh gay pĕ lêh. Yơn lah, tâm rnôk srê Covid-19 hôm e jêr jŏt ri nău hăn nuĭh pah kan gay tŏng ăp nuĭh pĕ lêh cà phê, tŏng ăp đăp mpăn chôt srê, dôl lah nău uănh bah nuĭh ƀon lan n’hanh n’gâng kan ƀon lan ta Dak Lak. Tĭng nău mbơh bah N’gâng kan tuch tăm mât rong n’hanh hun hao ƀon lan Dak Lak, yan cà phê 2021-2022, Dak Lak geh rlău 209 rbăn ha, đah rnoh geh rlău 500 rbăn tấn.

Dak Lak rvê mô tŏng nuĭh pĕ lêh cà phê tâm rnôk chôt srê

Gay đăp mpăn nău pĕ lêh cà phê yan mhe dơi geh uĕh lap, ăp nkual an nchrăp ndâk njêng trong rgŏ jă nuĭh pĕ lêh cà phê an tâm di đah ăp nău geh chôt srê jêr jŏt. UBND n’gor jao an N’gâng kan tuch tăm mât rong n’hanh hun hao ƀon lan ƀư tơm, tâm rgop đah ăp n’gâng kan, nău kan uănh mbơh nău, ƀư, ntĭm UBND ăp nkuăl, nkual ƀon têh ndâk njêng trong pĕ lêh cà phê đăp mpăn, săk rnglăy.

Nuĭh rblang: Y Sưng Phê Ja