VOV4.M’nông: Ăp nar rlău aơ, ăp nău khoah tâm nău test ngăch COVID -19 n'hanh pă an si ƀŭt kơp dơn mô ntưp an nuĭh ƀon lan hăn rlău ăp ntŭk nking kâp njrăng nuh srê hăn luh rlău bah dih n'gor, hŏ ƀư nuĭh ƀon lan Dak Lak tŭp tâm nău krŭl krăl. Khân păng ân rvah nchuăt joi ntŭk gay uănh năl ngăch, âk nuĭh mô dơi joi geh pha lah plơ̆ sĭt. Nău rêh, nău kan nê geh rlơ̆ rlơt đŏng.

Njuĭh n'hâm jong lôch luh bah ntŭk mbơh ngăch n'hâm suan bah nhih dak si nkual ƀon têh Buôn Ma Thuột, n'gor Dak Lak, yuh Trần Thị Tuyết, ta Lâm Hà, n'gor Lâm Đồng an gĭt, nar 5/7 yuh n'hanh băl păng ncho ndeh honda hăn Gia Lai gay khâl băn bên. Rnôk yuh plơ̆ Dak Lak gay sĭt tay Lâm Đồng ri tăng nău lư n'gor Lâm Đồng đă lĕ rngôch ăp nuĭh luh lăp tâm n'gor ân geh si ƀŭt uănh năl mham kaman SARS –CoV -2 mô geh ntưp ji. Yuh ndăn joi tât nhih dak si nkual ƀon têh gay ƀư test ngăch yơn hăn tât nhih dak si dơn geh nău ơh lah nhih dak si hŏ manh rlu nău kan dja. Mô dơi ƀư uănh năl mham, mô geh si ƀŭt "hăn  lhoi" njăr trong hăn sĭt jay bah yuh Tuyết jêng ntoch jong tay.

“Hên dôl geh kol khan n'hanh mô gĭt mhâm ƀư gay sĭt lăp dơi tâm Lâm Đồng. Lah aƀaơ hao rlơ̆ tay pleiku lôch uănh năl hăn rlơ̆ tay, ncho ndeh mbro ân roh dŭt đêt 15- 16 mông ndrĭ ri dŭt krit an nuĭh ƀon lan. Dŭt mpŏng n'gâng kan dơi kan mhâm geh trong kơl nê nơh gay dơi rsong hăn dơh soih lơn du đêt”

Hôm nô Trần Anh Kiệt, nuĭh ƀĭt ndeh rdeng ndơ trong Buôn Ma Thuột – Nkual ƀon têh Hồ Chí Minh pha lah rvăch bôk ndeh plơ̆ sĭt jay dơm, pha lah an ndeh rlu nchuăt yor mô dơi joi geh ntŭk rhŏ ƀư test ngăch COVID-19.

“Bar pe nar bah năp nơh way geh Test ngăch đŏng yơn si ƀŭt hŏ lĕ nar dŏng, bu đă ân Test ri mơ dơi hăn, mô geh si ƀŭt nê ri he mô dơi hăn đŏng ôh, jŭr hăn tât ta nê bu đă plơ̆ sĭt tay đŏng.”

Wa Nguyễn  Ngọc Thịnh, Groi Giám đốc nhih dak si nkual ƀon têh Buôn Ma Thuột, an gĭt, tă bah nău ŭch test ngăch Covid-19 bah nuĭh ƀon lan hao âk ndal tâm rnôk ndơ dŏng test bah nhih dak si mô tŏng đah nău ŭch geh dŏng bah nuĭh ƀon lan jêng Nhih dak si ân manh rlu rhŏ dŏng nău kan dja.

“Aƀaơ ân dăn nău rgop bah Sở ngoăy lah rvăt di tĭng quy định jêng lah ân tâm rlong ndranh, bar lah dăn nchŏng đă nuĭh tơm ƀư ndranh đah rnoh dah âk nê nơh tĭng he nchroh rnoh âk nuĭh hăn tât he dăn nchŏng đă ƀư ndranh. Aƀaơ nău ŭch geh dŏng bah nuĭh ƀon lan tâm ban kơt doanh nghiệp đŏng dŭt âk ir".

Ndrel đah nhih dak si nkual ƀon têh Buôn Ma Thuột, ta n'gor Dak Lak geh 2 đơn vị đŏng ƀư rhŏ kan test ngăch COVID -19 nê lah nhih dak si Nhi Đức Tâm n'hanh phòng khám Đa khoa Hoàn Hảo. Yơn lah, tă bah mô hŏ geh nău dơi an bah Sở y tế, jêng lôch 2 nar yông pla nchih ƀư uănh năl test ngăch COVID -19, bar đơn vị dja hŏ an manh rlu rhŏ dŏng. Ndrĭ, tât rnôk dja, Dak Lak hôm sŭng nău kan rhŏ dŏng test ngăch COVID -19. Ăp nuĭh ƀon lan ŭch hăn tât ăp n'gor đă ân geh si ƀŭt lôch uănh năl mham mô geh ntưp đah SARS-CoV-2 pha lah gŭ kâp dơm. Nău rêh, nău kan pha lah kâp tĭng si ƀŭt uănh năl mham.

Tĭng wa Trịnh Quang Trí, Giám đốc Ntŭk rgum mât uănh kop ji n'gor Dak Lak si ƀŭt uănh năl test ngăch COVID -19 mbra kơp dơn êng du hê geh mô lah mô geh ntưp đah kaman ta rnôk sŏk mham uănh năl dơm. Păng mô geh nău tam jŏ  jong, mô dơi ton nuĭh dja mô geh ntưp tâm ăp nar let năp tay. Yor kơt nê̆ ân mĭn uănh di tay na nê̆ si ƀŭt lôch geh uănh năl test ngăch COVID -19 kơt "si ƀŭt hăn lhoi" gay rsong hăn n'hanh pah kan yor nău dja jêng mpet jâk mpeh roh huach prăk kaih dŏng n'hanh tơm nuĭh kan, tâm rnôk nău tam mô geh âk.  

“Aƀaơ he leo ƀư mhâm gay nuĭh ƀon lan sĭt bu hăn tât nhih dak si xã gay mbơh ngăch dăng n'hâm suan geh rƀah gĭt dơi. Hôm aƀaơ ma hăn uănh năl test ngăch dơn ƀư đah nuĭh ƀĭt ndeh taxi, ndeh rdeng ndơ hăn trong jong dơi ƀư dơm an khân păng, ndơ nê mơ nta trong dơh an nuĭh ƀon lan, mơ nta trong dơh an rdâng lơh nuh srê.”

Tĭng wa Nay Phi La, Giám đốc Sở y tế n'gor Dak Lak, lah du hê nuĭh dôl ma ndum nău ji tâm săk, ƀư uănh năl mham mô geh ntưp, yơn lôch nê mô gĭt ôi gĭt măng khân păng ntoh kaman ntưp rêng an nuĭh êng. Yor kơt nê̆ mpeh măt khoa học, lôch jêh uănh năl mô geh ntưp gay rsong hăn tât ăp n'gor ƀa ƀă mô geh rnoh khlay âk bol ma si ƀŭt dja geh nău tam ntơm bah 2 tât 3 nar. Nău dja jêng lah, kơp dơn uănh năl mô geh ntưp mô geh rnoh tam khay âk tâm pah kan njrăng n'gang nuh srê Covid- 19, yơn hôm ƀư nking kol jêr jŏt âk an n'gâng kan dak si n'hanh nuĭh ƀon lan, ƀư mbrơi mbluh soih trong hăn rdeng ndơ, ƀư mpet jâk tay an wăng sa an ăp n'gor./.

Nuĭh rblang: Điểu Thân