VOV4.M’nông: Kơp tât lơ 13/7, n’gor Dak Nông hŏ geh 3 nŭih ntưp srê Covid-19. Bah năp nau geh tât srê Covid-19 tât jêr, nau ntưp rêng tâm âk ntŭk, n’gor Dak Nông ƀư nau tâm nkhah nŭih tĭng nau rđau mrô 15 bah Thủ tướng Chính phủ ntơm 12h00 lơ 13/7 ân tât rnôk geh nau mbơh mhe. Tĭng nê, n’gor Dak Nông mra nsrŭng nau rgum nŭih ntơm 20 nŭih hao gŏ lơ. Mô rgum ntơm 10 nŭih hao gŏ lơ tâm ntŭk pah kan, ngih săm ƀŭt, ngih dak si, đă mât nau tâm ƀah nklăp 2m tâm ntŭk âk nŭih. N’huch nau rgum ndeh, rnoh nŭih tâm ndeh tâm n’gor. Bonh đă n’huch nŭih pah kan tâm ntŭk kan, n’hao nau pah kan trực tuyến. Đah nŭih tă bah nkuăl ƀon têh Hồ Chí Minh (rnôk aơ tâm nkhah tĭng nau rđau 16/CT-TTg) mpeh nau tât n’gor: Đă sŏk mham uănh năl Rêaltim PCR tâm ăp ntŭk nkân njrăng srê, nkhah rgum ân tât rnôk geh nau xét nghiệm mô geh ntưp ri ƀư nau nkhah êng tâm ngih xét nghiệm Reâltim PCR tĭng nau ntrŭnh bah n’gâng kan dak si./.

Nŭih rblang: H’Thi