VOV4.M’nông: Nar 12/7, n'gor Dak Nông năl geh tay nuĭh ntưp đah kaman SARS-Cov-2 sĭt bah nkual ƀon têh Hồ Chí Minh. Nuĭh ji 31604 lah yuh C.T.Q, deh năm 1966, gŭ ta xã Đắk Wer, nkuâl Dak Rlâp, n'gor Dak Nông. Tĭng ôp uănh nuh srê, nklăp 3 mông ôi nar 8/7, yuh Q manh ndeh rdeng nuĭh ji njŭn sai lah P.T.T, deh năm 1962, hăn xạ trị ta nhih dak si Bình Dân (371 Điện Biên Phủ, phường 4, quận 3, nkual ƀon têh Hồ chí Minh).  Ta nhih dak si lĕ 2 hê ur sai geh ƀư test ngăch n'hanh mô mpơl ntưp đah Covid-19. Tât nklăp 9h măng ndrel nar, yuh Q manh ndeh rdeng nuĭh ji rdeng sai sĭt (mô hŏ gĭt năl ndeh rdeng ji n'hanh nuĭh ƀĭt ndeh).

Ôi 9/7, yuh Q. hăn tât Nhih dak si xã Đắk Wer mbơh n'hanh dơi ntĭm nti gŭ êng ta jay. 11h30 măng 11/7, Ntŭk rgum mât kân kop ji n'gor Dak Nông tăng geh nău lư yuh Q lôch uănh năl geh ntưp đah kaman SARS-Cov-2. Tâm măng nê dĭl, mpôl kan dak si n'gor Dak Nông hŏ njŭn yuh Q hăn gŭ êng, sŏk ntil mham tât 10h nar 12/7 lôch jêh uănh năl RT-PCR năl yuh Q ntưp đah Covid-19. Ndrĭ tât kêng măng nar 12/7, n'gor Dak Nông hŏ năl geh 3 nuĭh ntưp covid-19, lah ăp nuĭh sĭt bah nkual ƀon têh Hồ Chí Minh.

Lôch geh mbro ăp nuĭh ntưp kaman SARS-Cov-2 sĭt bah nkual ƀon têh Hồ chí Minh, n'gor Dak Nông hŏ geh si ƀŭt njuăl ngăch ntĭm nti dơn, tĭng ƀư uănh năl 3 tơ̆ đah nuĭh sĭt bah nkual ƀon têh Hồ Chí Minh gay njrăng, n'gang nuh srê Covid-19./. 

Nuĭh rblang: Điểu Thân