VOV4.M’nông - Ta năp nu nău srê Covid-19 dôl jêr jŏt ta Campuchia, Tahen n’har bri n’gor Dak Nông n’hanh ăp rmôt kan dơi kan lĕ n’hao ăp trong mkra jăch ndal, uănh nđôi nkual n’har bri, mô dơi an geh nău lăp, rlet rlău mô tâm di ƀư ntưp rêng srê.

         N’gor Dak Nông geh trong n’har bri jong 141km kâng n’har đah n’gor Mondulkiri (Campuchia), ntŭk lĕ kơp dơn ăp nuĭh ntưp Covid-19 ntưp tâm nsum mpôl. Đại tá Phan Quý Vỹ, Groi Chính ủy Bộ chỉ huy Tahen n’har bri n’gor Dak Nông an gĭt, ta năp nu nău jêr jŏt bah srê Covid-19 ta Campuchia, mô dơi mô geh nuĭh Việt Nam bah đah ri n’har bri rlău n’har bri sĭt dak gay dêr. Yor nê, N’gâng kan ntĭm rđau Tahen n’har bri n’gor đă cán bộ, tahen 12 pôih tahen n’har ƀri mô dơi an thơ tha njrăng n’gang, n’hao lơn tay trong kan uănh nđôi rjăp nkual mpông n’har bri, trong hăn, trong luh lăp:

Kruanh n’gor Dak Nông uănh nđôi trong kan n’hao uănh njrăng srê Covid-19 ta trong n’har bri

         “Gay ơm njrăng n’gang srê, Tahen n’har bri lĕ ƀư 25 rmôt ntŭk kâp ta ntŭk tâm n’har bri đah rmôt njrăng n’gang srê ƀa ƀơ uănh nđôi ăp trong har, ăp nkual hô geh rlău n’har bri n’hanh lăp. Mpôl hên lĕ ƀư tĭng rjăp ntĭm đă bah gưl bah lơ, bah N’gâng kan mât njrăng bri dak n’hanh UBND n’gor mpeh trong kan rchăng n’gang srê Covid-19, mô an nuĭh rlău n’har bri lăp ta dak bah dih lăp tâm nkual. Nkre mpôl hên ƀư uĕh trong kan nkoch trêng, rgŏ jă ƀon lan ƀư tĭng uĕh nău njrăng n’gang srê n’hanh râng ntrong leo saơ ăp nuĭh tih kơt ăp nău ƀư luh lăp, rlet rlău n’har bri mô tâm di gay ơm mkra”.

Ndrel đah mât 100% rnoh ta ăp pôih n’har bri. N’gâng kan ntĭm rđau Tahen n’har bri n’gor Dak Nông lĕ đă N’gâng kan ntĭm rđau tahen n’gor ntop kơl tay cán bộ, tahen tâm ăp Đại đội bộ binh gŭ ta trong n’har bri rhŏ an trong kan njrăng n’gang srê. Nkre đăp ăp xă n’har bri n’hao tay Tiểu đội dân quân rnâng kan ăp ntŭk njrăng n’gang srê Covid-19.

Rmôt tahen n’har bri Dak Nông uănh nđôi ta ăp trong har, trong luh lăp ta nkual n’har bri

Ndrel đah rmôt tahen, nău kan dak si n’gor Dak Nông lĕ ƀư cán bộ ăp ntŭk kâp n’har bri đah trong way ƀư “njrăng n’gang dŭt n’hâm, saơ ơm, nkhah ngăch, săm tam, mkra lôch, ngăch đăp mpăn nu nău”. Wa Hà Văn Hùng-Groi Kruanh N’gâng kan dak si n’gor Dak Nông an gĭt, aƀaơ geh 100 y nai dak si tâm plĕ kâp n’hanh cán bộ, tahen njrăng n’gang srê lăp. Lĕ rngôch ăp nuĭh hăn nsŏng n’har bri rnôk gĭt saơ dơi rmôt kan dơi kan ndơ̆ hăn nkhah êng tĭnh di nău ntrŭnh.

“N’gor Dak Nông abaơ mô hŏ kơp dơn nuĭh ntưp, yơn mpôl hên mô thơ tha, ăp ntŭk kan hôm e ƀa ƀơ uănh nđôi, ƀư ăp trong njrăng n’gang srê rjăp. Nău kan dak si lĕ tâm rgop đah ăp n’gâng kan, nău kan ƀư rjăp rgum nking n’gang lăp bah ăp nuĭh geh ntoh bah Campuchia sĭt. Aƀaơ geh nklăp 2000 nuĭh geh dak si n’hanh n’har bri ƀa ƀơ kâp uănh măng nar ta ăp ntŭk kâp mô an ăp nuĭh lăp. Rmôt way kan kỹ thuật, mpôl hên sŏk ta ăp ntŭk, ntĭt nsa ăp ntŭk kâp uănh ta nkuăl Cư Jut ri mbra sŏk rmôt dak si Cư Jut, lah gŭ ta nkuăl Dak Mil rĭ rmôt ta Dak Mil hôm ta 2 mpông n’har bri mpôl hên đă rmôt Ntŭk uănh nđôi kop ji n’gor sĭt ntop kơl”.

Ta năp nĕ, n’gor Dak Nông lĕ an công văn ntĭm rđau ăp n’gâng kan nău kan, ăp rmôt, nsum mpôl, ăp ntŭk kan rmôt vũ trang, ăp ntŭk mô dơi thơ tha lah thơ tha tâm trong kan njrăng, n’gang srê; n’hŭch ăp nău ƀư, ƀư rgum âk nuĭh mô khlay. Nkre an ƀư tĭng rjăp ăp trong mkra tŏng ăp đăp mpăn, tĭng wăn bok put mbung, rao kaman... tĭng di nău ntrŭnh. Ăp rmô kan dơi kan mât uănh rjăp nău luh lăp, nkhah êng, uănh nđôi dak si; nkre nchrăp ăp ndoh ndơ khlay nchrăp pơk hvi nuĭh luh lăp tâm di đah nu nău srê tĭng nuih n’hâm hun hao yơn an tŏng ăp đăp mpăn.

Nuĭh răk rblang: Y Sưng Phê Ja