VOV4.M’nông - Năm 2021, gay nkoch n’hao gĭt wât mpeh nău dơi kon se, mât njrăng, uănh mât kon se tâm rnôk nuh srê; nkre ntop kơl kon se geh khuch tă bah srê Covid-19, Khay kan yor kon se năm aơ rgum bôk nău: “ndrel ty đăp mpăn ƀư tĭng nău dơi kon se, mât njrăng kon se tâm rnôk trôk nar lơh, nuh srê”. Đah bôk nău aơ, ta nkual Tây Nguyên ndrel lam dak dôl geh âk nău ƀư ngăn ngên đah kon se.

         Ngoay tâm âk nău ƀư ngăn ngên bôk năp ta Dak Lak lah Tơm prăk nkrem ntop kơl kon se n’gor aơ lĕ ƀư chop khâl, an ndơ n’hanh ntĭm njrăng n’gang kop srê Covid-19 an ăp oh kon se ta Ntŭk ntop kơl nău rêh jêng chùa Bửu Thắng (nkual ƀon têh Buôn Ma Thuột). Wa Lâm Đình Nhiên, Kruanh Tơm prăk nkrem ntop kơl kon se n’gor Dak lak an gĭt, dôl mbơh ƀư ntop kơl ndâk njêng 4 mlâm jay tâm kơl; chop khâl ntrŭt nsổ ăp rnăk wâl geh kon se sôt rmanh, rnăk wâl geh kon se rmok dak ta ăp nkuăl Cư M’gar, Krông Pắk, Cư Kuin n’hanh Krông Bông. Ntop kơl ndơ sa kah, ndơ dŏng khlay n’hanh mât uănh săk soan, but uănh ji play nuih bah ndul me n’hanh ăp nău koet nte ta kon se.

  Ŭch ăp trong tŏng ăp đăp mpăn an ăp kon se tâm rnôk srê

                   “Tơm prăk nkrem mbra rgum kuăl jă, rgŏ jă ăp ngih pah kan, rmôt kan, doanh nghiệp n’hanh ngih pah kan chính phủ gay geh tơm prăk ntop kơl ăp nuĭh ji ach o kơt ji play nuih bah ndul me; chop khâl ăp kon se geh sôt rmanh, rmok dak. N’hanh khlay lơn nar aơ lĕ ntop kơl 30 rkeh prăk an kon se kon đơi ta ntŭk bah Chùa Bửu Thắng gay ntop kơl du gâl ndơ sông sa, ndơ dŏng tâm ăp nar srê n’hanh ntĭm ăp mon tâm trong njrăng n’gang nuh srê Covid-19”.

         Ta Trung ương, Tơm prăk nkrem ntop kơl kon se Việt Nam n’hanh N’gâng kan Lao động-Thương binh n’hanh xã hội lĕ ntrŭnh ntop kơl nar sa an rlău 4 rbăn kon se lah F0 n’hanh F1 an nkhah êng rgum gay njrăngv n’gang srê Covid-19. Tĭng nĕ, kon se dôl săm ji, nkhah êng dak si rgum mbra dơi ntop kơl prăk sa ăp nar đah rnoh kơl 80.000 prăk/du mon, dơi kơt tĭng tât lĕ năm aơ.

         Srê têh Covid-19 lĕm n’hanh khuch tay tât nău rêh, săk soan n’hanh nău geh bah kon se. Tĭng kơp uănh, tâm rnoh 30 n’gor geh nuĭh ji ntưp Covid-19, geh 18 n’gor mbơh geh kon se tâm rmôt F0 n’hanh F1. Tâm nĕ, Bắc Giang dôl geh rnoh kon se an nkhah rgum âk ngăn đah hang rbăn mon. Wa Nguyễn Thị Nga, Groi Cục trưởng Cục trẻ em, N’gâng kan lao động Thương binh n’hanh Xã hội an gĭt, ntŭk kan dôl kuăl jă nău ndrel ty, kơl bah ăp rmôt kan, êng nuĭh tâm n’hanh bah dih dak gay kon se Việt Nam rlet rlău lvang aơ, kơl ăp oh geh nău rêh uĕh ang lơn.

         “Tâm ăp nar dăch aơ, mpôl hên uănh mĭn ngăn nău kơp uănh nuĭh kon se geh ntưp Covid-19 kơt nuĭh kon se an nkhah êng rgum tâm nuĭh F1. Đă ăp ntŭk mĭn lor ntop kơl ăp oh, uănh mĭn n’ăp đah ndơ kah, ndơ sông sa kơt ăp nău ŭch an kon se, lơn lah ăp nkô̆ nău mĭn khuch mô knŭng êng đah me bơ̆ bah ăp oh ma ăp oh nơm khuch hô đŏng”.

Aƀaơ Tơm prăk nkrem ntop kơl kon se Việt Nam rgŏ jă, ntop kơl ăp ndơ dŏng, ndơ dak si, kơt: Bok put mbung, dak toh, mỳ, kho ao... an kon se lah ăp nuĭh F0, F1, F2 ta n’gor Điện Biên. Nkre, rhoăt ngăch ƀư rgŏ jă, ntop kơl an kon se ta ăp n’gor ntŭk srê kơt Bắc Giang, Bắc Ninh.

Rƀŏng tĭng khay pah kan yor kon se năm 2021, du đêt n’gâng kan, nău kan lĕ geh sam ƀŭt ntĭm rđău mbơh ƀư ăp nău kan tâm khay pah kan yor kon se. Ủy ban Dân số, rnăk wâl n’hanh Kon se-N’gâng kan mât njrăng bri dak, N’gâng kan Văn hóa Thể thao n’hanh Pâl nđaih; N’gâng kan Thông tin n’hanh Truyền thông tâm rgop đah Hiệp hội đăp mpăn nău nkoch mbơh Việt Nam n’hanh du đêt n’gâng kan, nău kan geh tât ƀư tâm rlong “Kon hŏk đah đăp mpăn nău nkoch mbơh”; Trung ương Đoàn TNCS HCM ƀư Bôk nău kan ntơm ƀư khay rlu nti. Wa Nguyễn Thị Nga an gĭt tay:

Khâl n’hanh an ndơ kon se ta chùa Bửu Thắng-Dak Lak

“Cục trẻ em, N’gâng kan Lao động Thương binh n’hanh Xã hội dơi geh ntop kơl hăn ndrel bah ăp rmôt kan lam ntŭr neh ta Việt Nam kơt ăp rmôt kan nău rêh jêng. Tâm khay pah kan yor kon se mbra ƀư nar rgum nchră ma lơn lah ăp nar rgum nchră pơk sŏng dăng gay dơi nkoch ăp nău blău mpeh nău ntrŭnh mpeh pháp luật, nău kơl kơt ăp nău wât, nău blău ngăn ngên khlay an rnăk wâl, an kon se kơt nsum mpôl kon nuĭh gay he ndrel ty đăp mpăn ƀư tĭng nău dơi bah kon se, ngăn lah kon se geh khuch tă bah srê Covid-19”.

Cục Trẻ em lĕ geh sam ƀŭt ntĭm rđău N’gâng kan Lao động Thương binh n’hanh Xã hội ăp n’gor, nkual ƀon têh ntrôl dăng trong kan nkoch mbơh ta ăp trong mbơh nu nău, mạng xã hội, mạng viễn thông, nău blău njrăng kan lơh mbram kon se; njrăng n’gang sôt rmanh kon se; mât njrăng kon se ta ntŭk internet, nkoch trêng mpeh Tổng đài điện thoại ngih dak mât njrăng kon se (111) tât rnăk wâl, nsum mpôl nău rêh jêng n’hanh kon se. Ăp ntŭk n’hao ăp trong njrăng n’gang Covid-19 an kon se n’hanh tŏng ăp đăp mpăn an kon se tâm rơh srê, tâm nĕ đă uănh rnoh nuĭh, nchih săk nuĭh n’hanh nău ŭch bah kon se ta ăp ntŭk tâm ƀah kon nuĭh n’hanh ăp ntŭk nkhah êng rgum; dŏng tơm prăk bah Tơm prăk nkrem ntop kơl kon se gưl n’gor (lah geh) mô lah tơm prăk bah Prăk nkrem ntop kơl kon se Việt Nam n’hanh ăp tơm prăk rgŏ jă êng gay ntop kơl ndơ sa kah, ndơ dŏng khlay, dak si n’hanh ăp ndơ dak si ntop an kon se đah trong way ƀư mô an du hê kon se geh nău ŭch, mâp jêr jŏt ma mô dơi ntop kơl ngăch.

Nuĭh rblang: Y Sưng Phê Ja