VOV4.M’nông: Ta năp nău tât krit nji bah nuh srê COVID-19, kêng măng 31/5, UBND n'gor Lâm Đồng hŏ geh si ƀŭt njuăl ngăch mpeh nău an tĭng ƀư tay lĕ n'hâm suan ăp trong njrăng, n'gang nuh srê. UBND n'gor Lâm Đồng dăn đă ăp n'gâng kan, ăp nsum mpôl, ăp ntŭk mât bôk kan chính trị, rêh jêng kon nuĭh, UBND ăp nkuâl, nkual ƀon têh tâm n'gor an ƀư lĕ n'hâm suan ăp trong nuh srê COVID-19.

Tâm nê, đă lĕ rngôch ăp nuĭh hăn sĭt bah nkual geh nuh srê ân dŏng trong an gŭ rgum êng 21 nar, kơp ntơm bah 5h kêng măng nar 31/5. Ăp nuĭh mô tĭng jăp mbra geh rmal lhăt tĭng di nău way. Êng ăp nuĭh sĭt bah nkual geh mpă wêl, an gŭ srang ngai êng ta nkual ƀon têh Hồ Chí Minh n'hanh ăp n'gor Bắc Giang, Bắc Ninh... ntơm bah nar 18/5 tât aƀaơ, ân mbơh ngăch dăng n'hâm suan, tĭng groi nđôi n'hâm suan ta jay n'hanh ton mô hăn luh bah dih tât rnôk tŏng 14 nar.

Ndrel đah nê, UBND n'gor Lâm Đồng rđău đă rlu lĕ rngôch ăp ndeh rdeng năch sĭt bah nkual ƀon têh Hồ Chí Minh mpeh n'gor Lâm Đồng. Ăp nar nđăp nsao, rhơn năm deh ân manh rlu; khĭt yot mô dơi rgum rlău 30 nuĭh ta ndrel du rnôk n'hanh tĭng  ƀư jăp nău way 5K. Tâm rnôk dja, n'gor Lâm Đồng mô an cán bộ, công chức, viên chức n'hanh nuĭh kan luh bah dih n'gor./.

Nuĭh rblang: Điểu Thân