VOV4.M’nông: Gay đăp mpăn ân nau pă điện kơl an rơh thi tốt nghiệp THPT năm 2021 mra geh, Điện lực Dak Nông hŏ ndâk nau nchrăp điện, đăp mpăn pă điện ân ăp ntŭk thi. Rơh thi tốt nghiệp THPT năm 2021, n’gor Dak Nông geh 7000 kon sa đăng kí râng thi tâm 18 hội đồng thi. Gay đăp mpăn nau pă điện kơl an ân rơh thi, Công ty điện lực Dak Nông mbơh mra mô koh điện tâm ntŭk gay nkra tĭng nau nchrăp, tâm ăp nar geh rơh thi. Êp nê, công ty rđau ăp điện lực tâm dâng pah kan sŏng đah ăp ngih săm ƀŭt geh ƀư thi ndrel ăp ntŭk kan bah hội đồng gay kơl an rơh thi gay ma tâm rgop uănh tủ điện hạ thế, trong điện bah ngih săm ƀŭt gay ma năn saơ ăp nau tât, mbơh ân ngih săm ƀŭt rgâl ăp ntil ndơ dŏng điện mô hôm nâp.

Nkre lah, tâm ăp ntŭk thi, ntŭk kan điện pă nŭih mât ndrel ăp rmôt ƀư nau kan tâm ăp trạm biến áp, gay ma năn rklaih lah geh nau tât, ngăch pă điện ân ăp ntŭk nti ngăch ngăn. Wa Lê Huy Hiệp, Groi Giám đốc công ty Điện lực Dak Nông mbơh:

  ‘Công ty hŏ ndâk nau kan ngăn gay ma uănh ăp ntŭk thi gay ma đăp mpăn pă điện tâm rơh thi. Công ty rđau ăp rmôt kan điện lực tâm grop mêt uănh lŏ geh điện, geh ăp trong rse, trạm biến áp gay ma rklaih ăp nau kol khuch tâm ăp ntŭk thi. Rmôt kan hŏ nchrăp máy mpoh ang điện têm ân ăp ntŭk thi gay ma đăp mpăn kơl an bah năp, tâm ndrel jêh rơh thi”./.

Nŭih rblang: H’Thi