VOV4.M’nông: Tâm rnôk âk nau kan điện n’hâm sial tâm Tây Nguyên mâp ơm nau jêr tâm nau trok tâm, ntrơn ntŭk gŭ, đah âk nau tâm in it ndrel roh nau rnă njrăng đăp mpăn, ri tâm nkuăl Ea H’Leo, n’gor Dak Lak hŏ geh ăp nau dơi đah âk nau kan leo lor. Rnoh geh văng sa bah bôk nau kan geh nsum ma nau geh jêng tâm nau rêh, kloh, djăt, kơt tĭng pháp luật, nê lah ăp nau dơi gay ma nŭih ntơm ntuh kơl, n’gâng kan tâm nkuăl ndrel ƀon lan geh nau dơi, kơl an nau kan leo nsĭt nau săk geh văng sa rêh jêng, ƀư nau dơi ân trong hun hao lŏ rgum nau ntrŭnh ăp nau kan điện n’hâm sial tay, ƀư ueh nau dăng bah nkuăl.

            Ngih mhe ndâk 100 mét vuông bah rnăk yuh Phan Thị Hồng Phượng tâm thôn 5, xã Đliê Yang, nkuăl Ea H’Leo, ngai đah n’gâng điện sial bah Bôk nau kan Phong điện Tây Nguyên knŭng 200-300 mét. Ngih aơ êp jâng yôk ngai ngăn bah năp nơh, yơn rnơm geh điện sial ndâk njêng ma bu nkra trong ma ntŭk aơ jêng ueh. Ur sai yuh Phượng hŏ ndăn nau nê gay ma pơk ntŭk tăch ndơ, tăm âk kao êp ngih gay ma kơl ân năch tât nklih rup tâm ntŭk điện sial.

            ‘Ntơm nar ndâk nau kan jêh, nŭih ƀon lan tâm thô 5 geh âk nau ueh ngăn yor geh trong hăn. Ê nkoch ôh, bah năp nơh ta aơ ngai, mô geh nŭih tât, yơn rnôk aơ ri năch tât âk. Bu hăn ŭnh, nkih rup đah n’gâng điện sial ndrel ntŭk ta aơ. Nau rêh ta aơ rgâl âk ngăn, rnơm tâm điện n’hâm sial da dê”.

            Bôk nau kan Phong điện Tây Nguyên tâm xã Đliê Yang, nkuăl Ea H’Leo, lah nau kan điện n’hâm soan bôk năp tâm Dak Lak ndrel lam nkuăl Tây Nguyên, yor rmôt kan HBRE ntrŭnh ntơm năm 2017. Wa Nguyễn Hoàng Hiệp-Groi Giám đốc ƀư nau kan mbơh, nau kan aơ geh nau dăng 28,8 MW, geh 12 n’gâng Turbin, geh tât ntŭk ntrơn ntŭk gŭ ndrel drăp ndơ bah 84 rnăk ƀon lan. Aơ lah nau kan mâp âk nau jêr. 84 rnăk lah 84 nau mĭn êng êng.

Lah mô kơl rklaih ân ueh ri mra geh nau tâm rkeh, tâm phong ƀư nau mô ueh âk. Đah nau tâm ban nuih n’hâm bah n’gâng kan ndrel nau nsôih kâp, nsôih nchră nau bah rmôt kan, ăp ntŭk kol mpeh nau trok tâm neh ntrơn ntŭk gŭ geh doh rklaih. Bôk nau kan hŏ geh nkra ueh ndrel mpoh điện tâm khay 11 năm 2019. Wa Hiệp ngơi:

            “UBND nkuăl ndâk Rnâng kan kơl rklaih ntrơn ntŭk geh nau kơl an bah rmôt kan tăch rgâl. Tâm rnôk ƀư, ntŭk kan tâm rgop nsum đah Ntŭk mbơh nau kan neh ntu bah n’gor, nkuăl ƀư nau kan leo trok tâm neh geh ntrơn ƀư. Ăp rnoh geh trôk tâm geh nchih mbơh kloh. UBND ăp xã nsing tâm rnoh rnăk geh ndơn prăk trok tâm, rnih neh ndrel drăp ndơ tâm neh dŭm âk gay ma mbơh tât gưl kan ba lơ gay ma ân dŏng ndrel jêh nê nsing tâm nau kan ngăn gay ma trok tâm neh ntu ân ƀon lan”.

            Jêh geh nau dơi bah Bôk nau kan Phong điện Tây Nguyên, Ea H’Leo lŏ ntrŭnh ƀư du nau kan êng, âk lơn 14 tŏ nau kan bôk năp. Nê lah nau kan Ngih máy điện sial Ea Nam, yor rmôt kan Trung nam ntuh kơl.

            Tĭng wa Nguyễn Văn Hà, Kruanh UBND nkuăl Ea H’Leo, nau ntul rlong ngăn bah bôk nau kan mhe lah dŭt têh yor nau rklaih rnoh nau kan tâm rnôk knŭng rlau du khay, lŏ geh tâm rnôk srê Covid-19 tât. Tâm ăp nau jêr kơt nê, ngăn lah mpeh nau trok tâm nau ntrơn pă neh ndrel ăp nau nchâp đă mpeh nau ngăch kan, nŭih tơm ntuh kơl geh rnôk hăn der trong, ŭch hăn rvăt neh bah ƀon lan kơt dôl ma geh âk tâm ăp bôk nau kan điện sial êng. Rnơm nau nchrăp, nau nsôih ƀư bah n’gâng kan, rmôt kan hŏ kơl an ăp ntŭk dơi geh nau doh rklaih ăp nau kol. Aơ lah nau ma ăp bôk nau kan êng mâp, rnôk dôl ma jêr rklaih ân nâp.

            Wa Nguyễn Văn Hà nkoch, gay bôk nau kan geh nau dơi, nŭih tơm ntuh kơl ân geh ƀư kan ân nâp, n’gâng kan ân geh ngơi hăn nsum ma nau kan, nsôih ƀư nau kan ân kloh, kơt tĭng nau ton. Đah nkuăl Ea H’Leo, nê lah dơi gay ma lŏ rgum, ntrŭnh ăp nau kan êng, rƀŏng tât nau ƀư ân jêh trong điện sial 3000 MW bah nkuăl:

            ‘Rnôk bôk năp, âk nŭih ƀon lan bu mô ŭch ôh, bu mô kơl. Phung hên rnơm đă ăp bu ranh ƀon, kruanh ƀon, bí thư chi bộ, Kruanh thôn mô lah nŭih geh bu rnơm tâm rgop nsum ndrel cán bộ xã, rđau kan nkuăl tât nkoch bri, mbơh kloh gay ƀon lan geh gĭt ndơ roh, ndơ geh bah nau kan têh bah n’gor, nkuăl. Rnôk lôch geh nau mbơh, ƀon lan bu gĭt ndrel tâm ban nuih n’hâm jêh ri ndơn. Tâm nkuăl Ea H’Leo ntơm sa ơm tât rnôk aơ ê geh nau tâm rkeh nau kan đah ƀon lan ndrel ntŭk kan ntuh kơl điện n’hâm soan. Nê lah nau nsôih bah hên, nau aơ hŏ rgum nau tâm nau dơi bah nau kan điện sial tâm nkuăl”.

            Nar aơ, Ea H’Leo hŏ ntoh ngăn du ueh bah du ntŭk geh âk điện n’hâm sial tâm nkuăl Tây Nguyên đah bơi tât 100 n’gâng, geh nklăp du rmen 300 rkeh KWh điện tâm ăp năm. Ndrel ma nau rgop ma rhiăng rmen prăk ân tơm prăk bah nkuăl, pă tay điện ân lam dak, ri ăp nau kan êng hôm rlau 60 km trong bê tông kơl an ân ƀon lan rêh jêng ndrel tuch tăm, kơl an ndâk 13 ngih rƀŭn rgum ndrel ngih kơl an...Nau dơi bah nau kan điện sial tâm Ea H’Leo lah rnơm nau dăng, nau kan tŏng têh, mro hăn nsum ma nau ngơi, ndrel nau kan tâm ban đah nau ƀư ueh geh nuih n’hâm ndrel ăp nau geh jêng ân tâm ban bah ăp ding./.

                        Nŭih rblang: H’Thi