VOV4.M'nông: Nuh srê Covid 19 hŏ khuch mô đêt tât nău kan ƀư njêng bah ăp doanh nghiệp lah nsum n'hanh doanh nghiệp ta Dak Lak lah êng. Tâm jêr jŏt, âk doanh nghiệp tâm trong kan ƀư njêng, nkret njêng cà phê ta Dak Lak hŏ mô rlu rgâl mhe, bên di đah nău kơt ơm mhe.

Lah doanh nghiệp way kĭn wâr cà phê rnglăy, cà phê mpli phin n'hanh mpli máy…wa Nguyễn Đình Viên, giám đốc Công ty TNHH PM Coffee Đăk Lăk an gĭt: Bol ma Covid-19 bol ƀư ntŭk tăch rgâl cà phê rngơt rngăt, yơn doanh nghiệp hôm ntuh kơl tay ndơ ntrŭp công nghệ, ƀư âk tay ntil ndơ geh ƀư, ntrôl dăng ndơ̆ rgâl mbrô gay ndơ̆ ndơ geh ƀư lăp kalơ ntŭk ndranh tăch rgâl điện tử đŏng. Nchroh nuh srê mbra dơi rdêl bah tâm let năp tay, ntŭk tăch rgâl mbra ơm dâk hao tay, jêng công ty nănh n'hao âk rnoh nkret njêng wơt lor bôk năp ntŭk tăch rnôk Tết bơi tât.

        “Nuh srê Covid mâp âk jêr jŏt đŏng, ăp ntŭk kan nchuăn rdeng srŭng gâng, kơt lah mô hôm geh nchuăn rdeng ndơ đêt ri mpôl hên ntơm lăp tâm rơh mbơh nti, mât chăm năch dŏng, hun hao săk ntơ lư. Ndrel đah nê ri rdâk tay săk geh, lôch jêh ăp ndơ geh ƀư mhe ta ntŭk tăch rgâl đŏng kơt: cà phê môi, cà phê kah khlay, cà phê săk tơm Tây Nguyên”.

        Wa Lê Văn Vương, Giám đốc Công ty TNHH ƀư njêng n'hanh tăch rgâl Vương Thành Công, nkual ƀon têh Buôn Ma Thuột an gĭt, bol tâm rdâng đah âk ntil jêr jŏt yơn công ty hôm geh nău mpŏng hun hao đŏng. Yor kơt nê̆, tâm rnôk manh rlu tăch ndơ gay njrăng n'gang nuh srê, công ty hŏ n'hao dăng nkoch n'hơ săk ntơ lư, joi băl tâm rsong tăch rgâl pơk sŏng dăng bah ngai n'hanh hŏ dâk hao tay nklăp 50 - 60% rđĭl đah ntơm nơh. Wa Lê Văn Vương nkoch:

       “Tâm rnôk nuh srê tât krit nji ri công ty Vương Thành Công hŏ nsrôih tâm ôp nău gĭt blău, nău dơi kan, nău tă ơm gĭt kan njêng jâng nsan an nuh srê hăn rlău mpôl hên geh ăp jâng nsing, ăp njuat ndăl gay mpôl hên hao chuat dăng lơn. Tâl 2, mpôl hên nsrôh nkoch n'hơ lam hvi ta ntŭk ndranh tăch rgâl điện tử, tâm ban kơt nkoch n'hơ ta online ăp săk ntô ndơ geh ƀư mhe gay n'hao tay nău ŭch geh rvăt năp bah nuĭh dŏng ndơ".

        Tĭng Sở Công thương Dak Lak, lôch an gŭ srang ngai lam rêh jêng kon nuĭh gay tĭng ƀư ăp trong njrăng, n'gang nuh srê, tât aƀaơ ăp doanh nghiệp bah n'gor hŏ mbrơi mbrơi dâk hao tay nău kan. Âk doanh nghiệp năl lah, lôch jong nar geh tât khuch tă bah nuh srê COVID-19 ri suan rvăt dôl geh trong rƀŏng hao tay. Yor kơt nê̆ ăp doanh nghiệp dôl n'hao ngăch an trong nchrăp ƀư njêng- tăch rgâl, wơt lor bôk năp suan rvăt mbra dơi hao dăng tâm ăp khay kêng dŭt năm.

Tĭng wa Phạm Minh Tấn, Groi bí thư Rnâng kan Tỉnh ủy Dak Lak: Nuh srê Covid-19 hŏ khuch têh tât nău kan bah doanh nghiệp tâm ban kơt nău rêh bah nuĭh ƀon lan. Yơn lah, đah nău nsrôih âk bah lam Đảng, lam ƀon lan, tât aƀaơ nô nău nuh srê ta n'gor hŏ, dôl dơi mât kân n'hanh ntrôl rŭch. Ăp rnoh tât mpeh wăng sa- rêh jêng kon nuĭh tât aƀaơ hôm hao âk rđĭl đah ndrel khay dja năm e nơh. Hao wăng sa bah n'gor geh nklăp 5,3%.

Lĕ rngôch sŏk geh ngân sách ngih dak ta n'gor nchroh geh rlău 5 rbăn n'gul rmen prăk, hao 3% rđĭl đah ndrel khay dja năm e nơh. Gay tĭng ƀư geh nău dơi ăp nău kan năm 2021, ăp khay kêng dŭt năm, ăp gưl ủy, n'gâng kan, nsum mpôl; ăp nhih pah kan, đơn vị, nkuâl tâm n'gor hôm grêt dêh ngăn ngăn đŏng, ndơ̆ luh ăp trong nkra, tĭng ƀư ngăch ngăr, geh nău tam đah nuih n'hâm nsrôih âk, nkre đah pah kan njrăng, n'gang nuh srê đah hun hao wăng sa- rêh jêng kon nuĭh. Wa Phạm Minh Tấn, Groi bí thư Rnâng kan Tỉnh ủy Dak Lak lah rjăp:

       “Nuh srê Covid-19 tât khuch bơi 2 năm aơ hŏ khuch têh tât hun hao wăng sa- rêh jêng kon nuĭh, yơn he way ndơ̆ luh dâk bôk năp nău dơi, nău geh di bah nuĭh ƀon lan n'hanh way tĭng ƀư di nău rđău đă bah Trung ương, bah Chính phủ lah tĭng ƀư nău dơn kan "ndrop", lah nkre rgum hun hao wăng sa- rêh jêng kon nuĭh, nkre đăp mpăn pah kan njrăng n'gang nuh srê Covid-19 n'hanh ăp ntil trong tăch rgâl êng ƀa ƀă. Mô thơ tha, mô uănh lhơ, mô roh nău njrăng gay mhâm ƀư nta ăp trong dơh gay he rgum ăp tơm ndơ gay đăp mpăn chính trị, hun hao wăng sa- rêh jêng kon nuĭh, đăp mpăn rnă njrăng, njrăng n'gang neh dak rdâk njêng lam trong kan chính trị tâm lam n'gor".

       Ăp nău nsrôih bah mpôl doanh nghiệp ta n'gor Dak Lak (tâm nê geh ăp doanh nghiệp ƀư njêng, tăch rgâl cà phê) lor nchrăp "bên di đăp mpăn, ngăch rplăch" mbra rgop uĕh tâm nău hun hao wăng sa- rêh jêng kon nuĭh ta n'gor năm 2021. Lôch nê hôm du tơ̆ tay đŏng lah rjăp ntŭk gŭ kan tơm khlay bah n'gâng kan cà phê đah Dak Lak lah êng n'hanh Việt Nam lah nsum./.

Nuĭh rblang: Điểu Thân