VOV4.Mnông – Ôi 24/6, ta Ngih pah kan Chính phủ, Groi Thủ tướng Vũ Đức Đam, Kruanh ban ntĭm rđău ngih dak mpeh njrăng n’gang srê Covid-19 rƀŭn pơk sŏng dăng đah kruanh n’gor Đồng Nai mpeh ăp trong njrăng n’gang srê aƀaơ. Ntoh ngơi ta ntĭm rđău ta rơh rƀŭn, Groi Thủ tướng Vũ Đức Đam lah, Đồng Nai geh ntŭk êp TP.HCM, rlău n’gul rkeh phung pah kan tâm nkual công nghiệp, geh ndrâm dak lêng, mâp đah Bình Dương,... lah an srê lăp mbra “dŭt jêr jŏt”, yor nĕ an uănh nđôi rjăp nuĭh hăn bah TP.HCM, Bình Dương hăn Đồng Nai n’hanh rlơ̆ tay. Groi Thủ tướng lah rjăp: Uănh nđôi rjăp mô di lah “nking trong nchăng mpông”, ma an ntrôl dăng kơt dŏng công nghệ thông tin gay uănh nđôi nuĭh hăn nsong. Đah phung pah kan, ngăn lah nuĭh dôl rêh ta ntŭk êng, pah kan ta ăp doanh nghiệp ta n’gor Đồng Nai, an geh trong mât uănh dơi geh nar na nê̆ tĭng ntŭk kan, ngih măy.

Nŭih rblang: Y Sưng Phê Ja