VOV4.M’nông - Tâm ăp nar bah năp, ta n’gor Dak lak na nao kơp dơn ăp nuĭh ntưp Covid-19 mhe. Đah nuih n’hâm “Ntŭk ŭch geh druh ndăm tât”, ăp mpôl druh ndăm nkual ƀon têh Buôn Ma Thuột, n’gor Dak Lak, dôl nar măng rgop soan ndrel ăp rmôt êng ntop kơl nking n’gang srê Covid-19. Ban Thường trực N’gor đoàn Dak Lak lĕ ntĭm rđău ăp gưl Đoàn mât uĕh tay nău kan bah 270 rmôt ntop kơl njrăng n’gang srê Covid-19.

                   Ntŭk kâp njrăng ta mpông pêr mpeh bah dâng nkual ƀon têh Buôn Ma Thuột, ntŭk uănh nđôi srê ta ntung dak krong 14, trong Hồ Chí Minh (QL 14 lvang rlău xă Hòa Phú) du nar măng wơt hang rbăn nuĭh lăp ƀư sam ƀŭt mbơh tơih săk soan. Ndrel dah ăp rmôt kan êng, ăp mpôl druh ndăm kơl kan râng kâp njrăng, ntĭm trong hăn, kơl nuĭh ƀon lan ƀư sam ƀŭt mbơh tơih n’hanh nglăp săk tâm măy. Nô Y Phong Êban, Bí thư Đoàn xã Hòa Phú, nkual ƀon têh Buôn Ma Thuột an gĭt:

         “Rmôt druh ndăm bah xă ri râng bah kêng măng nar 31/5 rnôk ntơm geh ntŭk uănh nđôi srê ta quốc lộ 14 ta xă. Jêh rnôk rơh srê mhe ngăn ntoh tay ta nkual ƀon têh Buôn Ma Thuột geh đă đŏng Thành đoàn Buôn Ma Thuột đă tay du đêt đồng chí đoàn viên ta ăp ntŭk bah rkum 1. Aƀaơ du ntŭk kan đă 3 đồng chí tât ta aơ ntop tay, êng đoàn xă lĕ đă n’hao bah 2 đồng chí tât 3 đồng chí du ôi. Jêh râng ta aơ ri ăp băl nĕ nkhah êng ta jay”.

Rmôt druh ndăm râng kâp ta ntŭk uănh nđôi srê ntung dak krong 14

         Ndrel đah druh ndăm ta ntŭk, ta ntŭk kâp njrăng ntung dak krong 14 hôm geh 8 druh ndăm kơl kan bah nkual ƀon têh Buôn Ma Thuột tât ntop tay. Yuh Trần Thị Huyền Thương, đoàn viên Ngih sam ƀŭt Cao đẳng Công nghệ Tây Nguyên, nkoch:

         “Yor nuĭh ƀon lan sĭt n’ăp măng nar na nao jêng ăp băl an pah kan lĕ măng nar n’hanh an tâm pă kâp. Nău gŭ âm, ngêt sa rlu rlău bah ăp băl kơt rgum ta aơ dâl. Dŭt jêr đŏng, yơn đah nuih n’hâm druh ndăm ri mpôl hên hôm e nsrôih ndrel nuih n’hanh n’hanh ndrel ty ndrel n’gâng kan ƀon lan, ndrel đah ngih dak ndrel soan njrăng n’gang srê n’hanh mpŏng he mbra lơh dăng đah chôt srê”.

         Aƀaơ, lĕ rngôch 21 xă phường bah nkual ƀon têh Buôn Ma Thuột lĕ ƀư plơ̆ tay rmôt druh ndăm hăn lor, ƀư tĭng nkoch trêng njrăng n’gang srê an nuĭh ƀon lan, ntop kơl kâp njrăng ta nkual choeng n’gang, ntŭk kâp njrăng srê ta ăp trong hăn,  n’hanh wơt dơn, tâm pă ndơ dŏng kơl nuĭh ƀon lan n’hanh ăp rmôt nkual geh nchoeng n’gang... Yuh Nguyễn Tuyết Sinh, Groi Bí thư Đoàn phường Thành Công, nkual ƀon têh Buôn Ma Thuột, Dak Lak an gĭt:

         “Mpôl hên ŭch rêng hvi du nău aƀaơ chôt srê dŭt jêr jŏt jêng ăp băl druh ndăm ta ntŭk geh nuih n’hâm râng kơl kan gay lăp rmôt druh ndăm hăn lor bah nkual ƀon têh, ri nkual ƀon têh ŭch rgum ri he dơi râng uĕh lơn”.

         Tĭng yuh H’ Hương Bkrông, Groi Bí thư Thành đoàn Buôn Ma Thuột, tâm nu nău srê jêr jŏt, bah khay 5 tât aƀaơ, Thành đoàn Buôn Ma thuột kuăl jă rgop ndơ sông sa an nuĭh ƀon lan tâm ăp tâm nkual nkhah êng, nchoeng n’gang n’hanh ntrŭt nsôr ăp rmôt dôl pah kan. Ndrel nuih n’hâm “Nchăng n’gang srê kở nchăng n’gang rlăng”, druh ndăm nkual ƀon têh Buôn Ma Thuột lĕ mât uĕh nău ƀư tơm hăn lor, kơl kan, măng nar ndrel đah n’gâng kan ƀon lan n’hanh ăp rmôt kan gay ƀư trong kan kơp uănh, joi, nkhah êng dak si, nchoeng n’gang nkual nkhĭt rdêl srê kơt nkoch trêng, rgŏ jă nuĭh ƀon lan ƀư tĭng rjăp ăp trong njrăng n’gang srê.

Rmôt druh ndăm râng wơt dơn n’hanh pă ndơ dŏng an ăp nkual nkhah êng

         “Êp tât Ban thường vụ Thành đoàn kơt Rmôt liên hiệp druh ndăm Việt Nam nkual ƀon têh mbra ƀư ăp rmôt ntop kơl. Bôk năp lah kualư jă ntrŭt nsôr ăp rmôt druh ndăm kơl kan ta ntŭk kâp Hòa Phú, rgum rnoh druh ndăm n’hanh druh ndăm rchong geh măt ta ăp nkual nchoeng n’gang ta nkual ƀon têh, mĭn an rgŏ jă ntop kơl. Tal 2 lah kualư jă gay rgŏ jă ndâk ƀư tay “Glah piăng măng”. Rơh srê năm 2020, ri rmôt “Glah pianưg măng” aơ pah kan dŭt săk rnglăy tâm nău ntop kơl n’gôn ăp ndơ sa măng an rmôt kan ta ăp ntŭk nchoeng n’gang ta nkual ƀon têh”.

         Hăn ndrel đah druh ndăm nkual ƀon têh Buôn Ma thuột, mhe aơ, Đoàn druh ndăm Công an n’gor Dak lak tâm rgop đah Thành đoàn Buôn Ma Thuột ndrel ăp nuĭh lŏng bôk tôr ƀư khâl, ntrŭt nsôr n’hanh an hang rbăn dĭng dak, âk thùng mì, rhiăng tăp djiăr n’hanh măt nglăp njrăng n’gang srê an rmôt ƀư tĭng naư kan njrăng n’gang srê ta 4 ntŭk kâp njrăng srê ta xă Hòa Phú, Cư Êbur, ntŭk nkhah rgum ta ký túc xá ngih sam ƀŭt Cao đẳng Công nghệ, hẻm Hà Huy Tập n’hanh Công an phường Tân An, nkual ƀon têh Buôn Ma Thuột

         Ta năp nu nău jêr jŏt bah srê Covid-19, Ban thường vụ N’gor đoàn Dak Lak lĕ ntĭm rđău ăp gưl đoàn mât tay nău kan bah 270 rmôt ntop kơl njrăng n’gang srê Covid-19; ƀư tĭng nău ntĭm rđău bah Ủy ban nhân dân n’gor Dak Lak ƀư tĭng ăp trong njrăng n’gang srê. Tâm nĕ, rgum ntrôl dăng trong kan nkoch trêng rgŏ jă nuĭh ƀon lan ƀư tĭng ăp trong njrăng n’gang chôt srê đah ăp nău ƀư kơt: an bok put mbung, dak rao ty an dơm tâm nkual nkhah êng, ntŭk âk nuĭh; ntop kơl prăk, ndơ dŏng khlay rhŏ an cán bộ tahen n’hanh ăp nuĭh ta nkual nkhah êng; ntop kơl nuĭh ƀon lan mbơh tơih săk soan, pă sam ƀŭt nkoch trêng, ntop kơl mbơh tơih săk soan an nai dak si, rnă njrăng đăp mpăn ta ntŭk kâp uănh srê./.

                   Nuĭh rblang: Y Sưng Phê Ja