`VOV4.M’nông: Jêh 10 năm nsôih, tât rnôk aơ, rnăk yuh Y Glar ndrel nô A Dâu, rnoi Xơ đăng tâm xã Sa Bình, nkuăl Sa Thầy, n’gor Kon Tum mô knŭng rklaih ach o, ma hŏ geh rlet hao geh nau rêh ueh lơn. Ntơm bah neh cao su, bum blang ndrel ndrôk, ka…du năm rnăk vâl nô yuh geh geh ma rhiăng rkeh prăk.

            Dêh năm 1993 tâm du rnăk ach o lŏ âk oh nô, ri ma jêh lôch tri jrâu 9, yuh Y Glar gŭ tâm ngih gay ma kơl ma mbŏ kan lŏ mir. Tât năm 2011, Y Glar gŭ nô A Dâu ndrel geh me mbŏ bar đah ân manh rlau du ha neh mir. Nau rêh mâp âk nau jêr. Năm 2014, ur sai yuh geh n’gâng kan tâm nkuăl ntĭm mbơh ndrel pơk trong ân manh prăk Ngân hàng chính schá xã hội, đah rnoh prăk rlau 30 rkeh gay ma hun hao văng sa. Ntơm bah prăk aơ, nô yuh tăm du ha cao su, ndrel rvăt 2 mlâm ndrôk me, êng nê manh 2 ha neh gay ma tăm bum blang.

            Neh jêng, rnơm kơt tĭng nau kan tuch tăm mhe, du ha cao su bah rnăk vâl hun hao jêng ueh ndrel geh kor rtăk. 2 mlâm ndrôk geh kon geh 3 mlâm, ur sai yuh tăch gay ma rvăt tay 1,5 ha neh tăm bum, bời lời. Tât rnôk aơ, rnăk nô yuh mô êng rklaih ach o, ma hôm geh nau rêh ueh. Tă bah neh tăm cao su, bum blang ndrel rong ndrôk, joi ka…du năm rnăk yuh geh 100 rkeh. Mô knŭng kơt nê, mông ru, nar ru, ur sai yuh hôm hăn kan ân bu gay ma n’hao nau geh ân rnăk vâl. Mhe aơ, rnăk nô ndâk ngih nâp ueh.

            Nô A Dâu nkoch: Rơh tât, ur sai nô nchrăp rvăt tay neh gay ma ƀư  mir ndrel manh prăk ngih dak, đah rnoh prăk geh têm, ntrơn du ha bum blang jêng tăm cà phê. Rnôk aơ, 2 hê ur sai nô râng nau ntĭm nti nau kan tuch tăm, mât chăm cà phê. Nô A Dâu nkoch: Gay hun hao văng sa nâp nâl, ê lor ân geh nau mĭn gợih nsôih ƀư sâm geh, mô dơi ât ji ngot, ach o, geh nau blau tâm nau kan tuch tăm ndrel râng nau ntĭm nti kan. Êp nê, ân geh uănh ntil tơm tăm tâm di ma nkuăl neh nơm gay ma ntrơn rgâl, rnoh tăch rnôk aơ đŏng.

            Mô êng knŭng blau pah kan jan sa, yuh Y Glar ndrel nô A Dâu hôm mro nsôih kơl an ăp rnăk mâp nau jêr tâm ƀon. Ăp năm pă kan pah ân ntơm 3-4 nŭih, mra pă mbơh nau kan, ntĭm mbơh nau pa kan jan sa.

Ndơn gĭt mpeh nau kan bah rnăk yuh Y Glar ndrel nô A Dâu, wa Nguyễn Minh Thuận, Bí thư Đảng uỷ xã Sa Bình, n’gor Kon Tum mbơh: Aơ lah nŭih geh leo nsôih tâm rnăk vâl nsôih gay ma rklaih ach o ntoh ngăn tâm nkuăl. Mô êng kơt nê, yuh nô hôm râng ăp nau kan tâm nkuăl ƀư kơt pă neh, rgop nar kan tâm ƀon lan ndâk njêng ƀon lan mhe, ndâk njêng rnăk vâl geh nau blau, geh ueh lăng. Năm 2020, aơ lah ngoai tâm ăp rnăk ntoh lư geh gưl uỷ, n’gâng kan tâm nkuăl rnê nkhôm tâm nau kan “Lam ƀon lan tâm rnglăp ndâk njêng nau rêh văn hoá”./.

Nŭih rblang: H’Thi