VOV4.M’nông:  Bah bôk khay 11/2021 tât aƀaơ, n’gor Gia Lai lĕ saơ du đêt ntŭk srê Covid-19 ta ăp ƀon lan rnoi mpôl đêt ta nkual ƀon têh Pleiku n’hanh nkuăl Đăk Đoa. Naư ntưp dơi năl geh tât nău way rgum nsum mpôl, lơn lah nău ƀư khĭt ôm.

Ăp nar aơ, xă Hà Bầu, nkuăl Đăk Đoa jêng ntŭk srê mhe bah n’gor Gia Lai. Tâm rlău du pơh bah năp, ƀon lan lĕ kơp dơn bơi 200 nuĭh ntưp Covid-19 ta 6 ƀon rnoi mpôl đêt. Tâm nĕ, êng ƀon Nú geh 88 nuĭh. Dŭt âk F0 aơ dơi năl lĕ hăn ngêt sa tâm du ntŭk khĭt ƀư 2 nar 10 n’hanh 11/11. Wa Dương Thị Kim Quy-Groi Kruanh UBND xă Hà Bầu, nkuăl Đăk Đoa an gĭt:

“Mpôl ntĭm rđău lĕ jao an rmôt Covid-19 ta ntŭk gŭ rêh ta bah dâng thôn, n’hŭch rgum âk nuĭh; nuĭh ntŭk êng bah ƀon, xă ri nchih săk. Ntĭt nsa, nuĭh Yuăn saơ srê kơt nĕ ri tât su nhang, jêh nĕ sĭt. Yơn kônh wa ri êng, an gŭ nhŭp jâng nhŭp ty, nkoch bri, ngêt sa du mbâr, ngêt du ka chok ndrănh. Jêng, dŭt jêr njrăng n’gang srê”.

Tĭng way ơm, lĕ ƀon rgop ndơ sông sa bn’hanh rnăk wâl ƀư khĭt ôm tâm 3 nar

Hôm ta nkual ƀon têh Pleiku, aƀaơ 3 ƀon Jrai geh nchoeng n’gang yor saơ rhăng nuĭh ntưp Covid-19, geh tât ăp nău khĭt ôm. Wa Rơ Châm Thót-Bí thư chi bộ ƀon Ốphường Hoa Lư-nkual ƀon têh Pleiku) an gĭt, ƀư khĭt ôm tĭng nău way rnôk srê dôl jêr jŏt ƀư ƀon geh 77 nuĭh ntưp srê.

“Rnôk geh nuĭh khĭt ri kônh wa rgum, khân pơng ngêt ndrănh yăng ti djôt ndrănh tâm kơl, sŭr djăr dŭt âk; ri mpôl băl, tĭng nău geh bah oh nô tâm rnăk wâl. Dŭt âk lah djăr, sŭr; gŭ nsum, ngêt nsum. Ƀư 2 tât 3 nar, nar tal 4 mư lĕ, dŭt khuch săk soan, wăng sa. Aƀaơ ri mât nâm ơm kơt nĕ, mô hŏ dơi jŭt jăng”.

Aƀaơ hin, ta Gia Lai geh nklăp 1000 ƀon bah nuĭh rnoi đêt ta ntŭk tâm 17 nkuăl, nkual têh, nkual ƀon têh. Đah ăp rnoi đêt ta Tây Nguyên, ri nsum mpôl dơi saơ tâm ăp nău ƀư pah kan jan sa, nău rêh way ơm. Yơn tâm rnôk srê Covid-19 dôl geh jêr jŏt, aƀaơ lơ jêng du nău nking n’gang đah trong kan njrăng n’gang srê bah n’gor. Wa Lê Văn Quang-Kruanh UBND phường Hoa Lư, Nkual ƀon têh Plaiku an gĭt, gay mkra nău aơ, an lăp dŭt n’hâm bah lĕ trong chính trị, lơn lah an mât ƀư tơm bah ăp nuĭh nsing nơm tâm ntŭk gŭ rêh, rgŏ jă nuĭh ƀon lan, tĭng rjăp, kơl ăp trong njrăng n’gang srê:

Âk ƀon rnoi mpôl đêt ta nkuăl Đăk  Đoa, Gia Lai dôl nchoeng n’gang gay joi nuĭh srê, sŏk F0, F1 luh bah dih ntŭk gŭ rêh.

“Tâm nar nchoel n’gang, ta ƀon Ốp geh du jay khĭt. Mpôl hên lĕ rgum lĕ trong chính trị gay nkoch trêng an rnăk wâl geh nuĭh khĭt, năl uănh nău mĭn; mô ƀư ta jay. Jêh rnôk rnăk wâl tâm ban ŭch nău nkoch trêng, ri nchrăp kuih ntu lor, njŭn nuĭh roh, ƀư tâp bôr, mô rgum, dêr nău ƀư khĭt bah nuĭh ƀon lan rnoi đêt”.

          Nuĭh rblang: Y Sưng Phê Ja