VOV4.M’nông – Bôl nu nău srê Covid-19 geh dŭt jêr jŏt, yơn 6 khay bah năp, n’gor Gia Lai hôm e geh hao jêng 9,7%. Săk rnglăy aơ dơi rgop bah n’gor nta an hun hao 2 nău kan wăng sa khlay lah ŭnh nar nkra njêng n’hanh mât rong công nghệ mhe. Nĕ lah nău năl dơi n’gluh tâm rơh rƀŭn Ban chấp hành Đảng bộ n’gor rơh tal 4 (pơk hvi) dơi N’gor ủy Gia Lai ƀư tâm nar 2/7. Tĭng nău mbơh ta rƀŭn, 6 khay bah năp, dĭng lĕ rnoh khlay nkra njêng công nghiệp bah n’gor geh rlău 11 rbăn rmen prăk, hao rlău 17% nkôp đah rơh aơ năm bah năp; dĭng lĕ prăk ntuh kơl lam kon nuĭh ta Gia Lai geh bơi 33.500 rmen prăk. Du n’gul tâm rnoh aơ dơi geh tă bah nău ƀư ăp nău nchrăp ƀư điện sial ta n’gor, đah rnoh prăk rlău 17 rben rmen. Ndrel đah nĕ, aƀaơ Gia Lai geh 33 nău nchrăp ƀư mât rong công nghệ mhe lĕ dơi an ntrŭnh ntuh kơl, đah rnoh prăk rlău 4.500 rmen prăk. Tâm năm bah năp, n’gor lĕ tăm mhe 131 ha bri, rgâl rlău 700 ha tơm tăm mô săk rnglăy.

Nŭih rblang: Y Sưng Phê Ja