VOV4.M’nông: Bah năp nau tât jêr rdâng bah srê Covid-19, rnôk nŭih ta ưbah ăp nkuăl mpeh ba dâng mro sĭt tâm ntŭk nơm, Rnâng kan rđau nau njrăng, rdâng srê Covid-19 Gia Lai dôl nsôih ƀư ăp nau kan gay ma njrăng rdâng tâm ntŭk, tŏng dơi nau ƀư ăp gưl tât bah srê ji.

Ăp nar rlau aơ, ntŭk nkân njrăng srê Covid-19 tâm Quốc lộ 14, trong rlet bah ntung 110, tâm xã Ia Le, nkuăl Chư Pưh bah n’gor Gia Lai ndơn âk ngăn nŭih ƀon lan ndrel ndeh hăn, ngăn lah tă bah mpeh ba dâng sĭt n’gor. Tâm ăp nar, ntŭk aơ nkân njrăng 1000 nŭih. Đăp mpăn nau ân n’ho tâm quốc lộ ma hôm geh nkân njrăng srê, n’gor Gia Lai hŏ n’hao nau leo cán bộ ndrel cảnh sát giao thông, ƀư nau kan tâm pă nkhah trong, veh săk jăn, nkhah nkre tă bah mpông, tă bah ntŭk njrăng ta ntung 110 Gia Lai saơ ăp nŭih ntưp srê Covid-19. Trung tá Nguyễn Minh Tuấn, Kruanh rmôt cảnh sát Giao thông mrô 1, Công an n’gor Gia Lai ƀư nau kan ta aơ, mbơh:

‘Phung hên rgum dĭng lĕ ăp nŭih tâm rmôt lăp kan gay ma nkân njrăng srê ân nâp ân nau kan njrăng rdâng srê Covid-19 gay ma der nau kol trong, rmôt kan dak si ntop tay rmôt gay ma hăn mbơh nau dak si ân ngăch, đăp mpăn trong hăn n’ho ro ndrel leo nŭih hăn nkhah”.

Wa Siu Y Bé, Groi Kruanh UBND nkuăl Chư Pưh, n’gor Gia Lai mbơh, nkuăl ƀư ueh nau tâm rgop nsum đah ăp rmôt gay ma der nau jâk ân ƀon ảln nôk rlet trong:

“Rnoh nŭih sĭt ri âk ngăn, lah dơi rklaih mô năn ri mra khuch ngăn. Yơn lah, phung hên kŏ bonh đă ƀon lan, nơm ân geh mât nau njrăng ueh, tâm kơt tĭng gay ma geh mbơh nau tâm di nau ntrŭnh đă, mô dơi krap der bah trong teng êng êng, rlet ntŭk nkân njrăng gay ma mbơh nau dak si ân rjăp ndrel nkhah tâm di nau ntrŭnh đă”.

Ntơm 26/4 tât bôk pơh aơ, n’gor Gia Lai ndơn geh bơi tât 30 nŭih ntưp srê Covid-19. Rmôt nŭih nai dak si ƀư nau kan nchueng rdâng, joi trong ndal, xét nghiệm nkre ân ăp nŭih ntưp srê mhe. Ndrel ma nê nkuăl kŏ leo dŏng 21 ntŭk ƀư nkhah rgum nŭih, đah nau dơi ndơn rlau 3000 nŭih. 48 ntŭk tâm nkah êng kŏ geh uănh, nchrăp ăp ntŭk gay ma tŏng dơi đah nau ndơn geh tay nklăp 7000 nŭih.

Wa Nguyễn Thị Thanh Lịch-Groi Kruanh UBND n’gor, Groi Rnâng kan rđau nau njrăng, rdâng srê Covid-19 mbơh, rdâng đah ăp gưl bah srê, n’gor hŏ nchrăp aơ nau kan gay ma pă tŏng ndoh ndơ, ndrel dơi leo tăch ndơ tuch tăm. Mpeh nau nchrăp ntŭjk gay ma gŭ săm, Gia Lai ntrŭnh nau leo dŏng, ntrơn ngih dak si 331 (trong Phạm Văn Đồng, Pleiku) jêng 1000 nsiưng, ƀư nau săm ân nŭih ji jru. Ăp ngih dak si hiăn, ngih dak si klơm soh, Ngih dak si Y học cổ truyền ndrel ndâk săk soan (nkuăl ƀon têh Pleiku) kŏ nchrăp ăp nau dơi gay ma tŏng ƀư nau kan săm đah ăp nŭih ntôn ntưp srê ndrel ntưp srê Covid-19 đah rnoh mô lăng jâk ngăn:

‘Phung hên ndâk ngih dak si nkhah êng gay ma săm srê Covid-19, tŏng dơi nau ƀư nau kan ân nau nŭih ji dŏng nau ƀư nau kan leo lăp săm ngoại khoa, nglăp play leh êng, mô lah nŭih geh nau ji ơm jâk, ndâk du ntŭk kan gay ma ndâk n’hâm soan ân bu nŭih ji geh nau jâk, gay ma săm ân nkhah êng. Êng nê phung hên ndâk du ngih dak si săm ân nŭih ji geh nau ji mô lăng jâk đŏng”./.

Nŭih rblang: H’Thi