VOV4.M’nông - Ăp ngih sam ƀŭt THPT ta n’gor Gia Lai lĕ jêh ăp ndơ gay đăp mpăn an rơh tâm rlong tốt nghiệp THPT lam dak ƀư đăp mpăn, tâm rnôk srê Covid-19 dôl geh jêr njrăng.

                   Ta ngih sam ƀŭt THPT Nguyễn Bỉnh Khiêm, nkuăl têh Chư Sê, nkuăl Chư Sê, n’gor Gia Lai, ăp oh kon hŏk jrô 12 dôl ndăn nti tay, n’hanh mkra ăp đề rlong lor. Ăp nai bah ngih sam ƀŭt THPT Nguyễn Bỉnh Khiêm hôm tiăr nti an ăp oh nău mĭn nâp nâl gay ƀư bài tâm rlong dơi geh săk rnglăy âk ngăn. Nai Trần Thị Hồng Uyên, nai mât uănh nti tay tâm rlong môn Ngữ Văn, ngih sam ƀŭt THPT Nguyễn Bỉnh Khiêm an gĭt.

         “Tâm rnôk nti n’hanh ntĭm ri nai kon hŏk mpôl hên tĭng rjăp njrăng n’gang srê tĭng di 5K, 100% ăp oh râng tâm rnôk nti wăn bok put mbung, rao ty. Tâm rnôk srê jêr jŏt kơt aƀaơ, uĕh blău nti bah ăp oh mô đêt geh khuch, yor khuch srê bah năm e tât năm aơ. Nai kon hŏk, ngih sam ƀŭt, nai tâm rgop đah ăp rmôt kan ƀư tĭng nău nti tay rjăp, ntrŭt đă me bơ̆, nkah ntĭm oh kon nơm râng tŏng ăp lĕ jrô nti tay”.

                   Rơh tâm rlong năm aơ, Ngih sam ƀŭt THPT Nguyễn Bỉnh Khiêm (nkuăl Chư Sê) dơi pă 23 jrô tâm rlòng đah rlău 300 kon hŏk râng tâm rlong. Tĭng nai Nguyễn Hải Hà-Hiệu trưởng ngih sam ƀŭt THPT Nguyễn Bỉnh Khiêm, rnôk N’gâng kan ntĭm nti n’gor Gia Lai nchrăp săk, ntŭk kan lĕ ngăch pă, dăp ăp jrô tâm rlong tâm di. Bah meng nĕ, ngih sam ƀŭt hôm nchrăp tŏng ăp dak rao ty, bok put mbung, măy uănh duh săk... Gay đăp mpăn njrăng n’gang srê Covid-19 tâm lôch rơh tâm rlong.

         “Lah geh kon hŏk tâm F1, F2, ri an mbơh dâl đah n’gâng kan. N’gâng kan geh ntrŭnh mbơh săk soan an nai dak si lor rơh tâm rlong 7 nar gay gĭt nu nău mâp bah kon hŏk, cán bộ uănh tâm rlong. Kruanh n’gâng kan ntĭm nti n’gor lĕ jao lah an geh ăp nuĭh geh mâp đah ăp nuĭh F0, F1 ri ntŭk kan an trok dơn, gay m’hâm ƀư rơh tâm rlong tốt nghiệp THPT dơi ƀư rjăp”.

Kon hŏk tĭng rjăp nău wăn bok put mbung n’hanh puh rao kaman tâm rnôk nti

         Nai Trần Văn Lượng, hiệu trưởng ngih sam ƀŭt THPT Tôn Đức Thắng, nkuăl Đức Cơ an gĭt, rơh tâm rlong THPT năm aơ rlău ma ƀư tĭng rjăp trong kan njrăng n’gang srê n’hanh nti tay an kon hŏk, ngih sam ƀŭt hôm ntop kơl an kon hŏk geh nău rêh jêr jŏt gay ăp oh nău rêh uĕh lơ rơh tâm rlong:

         “Ngih sam ƀŭt mbra ƀư tâm rlong THPT tĭng 2 trong, lah srê ta kơt aƀaơ ri ngih sam ƀŭt mbra nti tay tốt nghiệp ta ngih sam ƀŭt. Ăp môn kon hŏk nti tay nai an nchih rgum nchrăp lor. Lah nu nău srê jêr jŏt ri nai mbra in lĕ rngôch ndrôm sam ƀŭt njuăl lor an kon hŏk gay kon hŏk nti êng pơk sŏng dăng tĭng nău ntĭm rđău bah n’gâng kan ntĭm nti. Kon hŏk rnoi mpôl đêt ta ngih sam ƀŭt dŭt âk, prăk jêr jŏt, ngih sam ƀŭt ntĭm rđău lah ăp sam ƀŭt nĕ ngih sam ƀŭt mbra ntop kơl prăk gay an kon hŏk n’hŭch oi hoach an ăp oh”.

         Rơh tâm rlong năm aơ lam n’gor Gia Lai geh rlău 14.000 kon hŏk dăn râng tâm rlong đah 39 ntŭk tâm rlong n’hanh 17 ntŭk nchrăp lor ta 17 nkuăl, nkual têh, nkual ƀon têh, đah 616 jrô tâm rlong. Nchrăp geh 1282 cán bộ uănh tâm rlong, 20 can sbộ groi nđôi n’hanh bơi 500 nuĭh kan pah kan rhŏ an ăp rmôt công an, nai dak si, đăp mpăn rnă njrăng.

         Wa Nguyễn Văn Long, Groi Kruanh N’gâng kan ntĭm nti n’gor Gia Lai an gĭt, N’gâng kan ntĭm nti Gia Lai lĕ ndâk ƀư ăp trong tâm rlong tốt nghiệp THPT đah 4 gưl gay rdâng đah srê Covid-19. Bah aƀaơ tât rnôk tâm rlong, ăp Hội đồng tâm rlong THPT ta n’gor Gia Lai nchrăp trong rdâng đah ăp nu nău ndal dơi geh gay rơh tâm rlong ƀư đăp mpăn, rhăt jăp, geh săk rnglăy âk ngăn.

         “N’gâng kan ntĭm nti lĕ ntĭm rđău an ăp gưl, ăp ntŭk kan mhe ƀư ăp nău kan an rơh tâm rlong di trong ntrŭnh, di trong nchrăp, nkre đăp mpăn ăp nău đă njrăng n’gang srê tâm nău srê covid-19 geh jêr jŏt. Tâm nĕ geh 4 trong ƀư tâm rlong di đah 4 gưl nu nău srê, ƀư tĭng rjăp nău đă 5K lor, tâm n’hanh jêh tâm rlong. N’gâng kan lĕ geh sam ƀŭt đă kon hŏk, nai râng râng tâm rlong, cán bộ uănh tâm rlong ƀư tĭng rnôk mbơh dak si bah năp 7 nar rnôk rơh tâm rlong n’hanh mbơh ăp nu nău đah ntŭk dăn râng tâm rlong, ăp rkum tâm rlong gay rblang, mkra”.

                   Nuĭh rblang: Y Sưng Phê Ja