VOV4.M’nông: Nar ntri (22/7), Ƀan rđău đă njrăng, n'gang nuh srê Covid-19 n'gor Gia Lai ƀư rgum hop ndal gay an ƀư ăp trong kan jăch ndăn njrăng, n'gang nuh srê lôch n'gor năl geh nuĭh  ji ntưp đah SARS-CoV-2. Mbơh ta rơh hop, kơp ntơm bah nar 26/4 tât nar 22/7, Gia Lai năl geh 21 nuĭh ntưp ji đah SARS-CoV-2, tâm nê, geh 5 nuĭh hŏ bah ji sĭt luh bah nhih dak si.

Ta năp nău tât krit nji bah nuh srê, Ƀan rđău đă njrăng, n'gang nuh srê Covid-19 n'gor Gia Lai đă ăp n'gâng kan dơi kan ngăch ƀoi tĭng, ôp uănh ăp tŏng lĕ rngôch, kơi ntop ăp ntŭk geh tât n'hanh joi ndăn ngăch nuĭh, leo ƀư uănh năl mham an ăp nuĭh ƀĭt ndeh n'hanh ntŭk rgum âk nuĭh ƀon lan  gŭ ta nkual ƀon têh Pleiku. Manh ƀư mpă wêl thị trấn Kbang, ƀon Tà Kơ, (xã Sơ Pai, nkuâl Kbang) n'hanh ăp ntŭk geh tât ăp nuĭh ji; sŏk ntil mham uănh năl ngăch an ăp nuĭh F1, F2, tâm ban kơt puh nkhĭt kaman ăp ntŭk nuh srê geh tât ăp nuĭh ntưp ji./.

Nuĭh rblang: Điểu Thân